Magnesium oxide

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

- បន្សាបជាតិអាស៊ីតក្នុងក្រពះ ដើម្បីព្យាបាលជំងឺដំបៅក្រពះ ដំបៅគល់ពោះវៀនតូច(Duodenal ulcer) រលាកក្រពះ(រួមទាំង រលាកក្រពះស្រួចស្រាវឬរ៉ាំរ៉ៃ និង រលាកក្រពះដោយសារការប្រើប្រាស់ឱសថ) ភាពខុសប្រក្រតីនៃមុខងារប្រដាប់រំលាយអាហារផ្នែកខាងលើ(រួមទាំង អាការៈបាត់បង់ចំណង់អាហារដែលទាក់ទងនឹងបញ្ហាសរសៃប្រសាទ(Anorexia nervosa) ជំងឺក្រពះយារធ្លាក់(Gastroptosis) អាការៈនៃអាស៊ីតក្រពះកើនឡើងហួសហេតុ)។

- អាការៈទល់លាមក។

- បង្ការការកើតឡើងនៃជំងឺក្រួសក្នុងផ្លូវនោមដែលកើតឡើងដោយសារបណ្ដុំនៃសារធាតុCalcium oxalate។

ថ្នាំលេប：

・ករណីប្រើនៅក្នុងការបន្សាបជាតិអាស៊ីតក្នុងក្រពះ ：

មនុស្សពេញវ័យ：លេប1ថ្ងៃ0.5～1g ដោយបែងចែកជាច្រើនដងក្នុង1ថ្ងៃ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញារបស់អ្នកជំងឺ។

・ករណីប្រើជាឱសថបន្ទន់លាមកចំពោះអាការៈទល់លាមក：

មនុស្សពេញវ័យ：លេប1ថ្ងៃ2g ដោយបែងចែកជា3ដងក្នុង1ថ្ងៃ មុនឬក្រោយបរិភោគអាហារ។ ឬ ប្រើ1ថ្ងៃ1ដង2g នៅមុនពេលចូលគេង។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញារបស់អ្នកជំងឺ។

・ករណីប្រើនៅក្នុងបង្ការការកើតឡើងនៃជំងឺក្រួសក្នុងផ្លូវនោមដែលកើតឡើងដោយសារបណ្ដុំនៃសារធាតុCalcium oxalate：

មនុស្សពេញវ័យ：លេប1ថ្ងៃ0.2～0.6g ដោយពិសារជាមួយទឹកអោយបានច្រើន។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញារបស់អ្នកជំងឺ។

ផលរំខានរួមមាន រាករូស ។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ចង់ក្អួត ក្អួត ងងឹតមុខពេលក្រោកឈរ វិលមុខ ជីពចរដើរយឺត ក្រហមស្បែក មិនសូវមានកម្លាំង រួយខ្លួន ងងុយគេង (កម្រិតម៉ាញ៉េស្យូមក្នុងឈាមកើនឡើងខ្ពស់)។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថប្រឆាំងបាក់តេរីប្រភេទTetracycline(Minocycline, Doxycycline, Tetracyclineជាដើម), ឱសថប្រឆាំងបាក់តេរីប្រភេទNew quinolone(Enoxacin hydrate, Norfloxacin, Ofloxacin ជាដើម), ឱសថប្រភេទBisphosphonate(Etidronate disodium, Sodium risedronate ជាដើម), ឱសថCefdinir, ឱសថCefpodoxime proxetil, ឱសថMycophenolate mofetil, ឱសថDelavirdine, ឱសថZalcitabine, ឱសថPenicillamine - អាចធ្វើអោយការស្រូបនៃសារធាតុឱសថទាំងនេះថយចុះក៏ដូចជាប្រសិទ្ធិភាពនៃឱសថទាំងនេះ។ ដូច្នេះ គួរចៀសវាងប្រើប្រាស់ឱសថទាំងនេះក្នុងពេលតែមួយ។

・ឱសថAzithromycin, Celecoxib, Rosuvastatin, Rabeprazole, Gabapentin- អាចធ្វើអោយកំហាប់ក្នុងឈាមនៃឱសថទាំងនេះថយចុះ។

・ឱសថប្រភេទDigitalis(Digoxin, Digitoxin ជាដើម), ឱសថជាតិដែក, ឱសថFexofenadine - អាចមានឥទ្ធិពលដល់ការស្រូបឬការបញ្ចេញចោលនៃសារធាតុឱសថទាំងនេះ។ ដូច្នេះ គួរចៀសវាងប្រើប្រាស់ឱសថទាំងនេះក្នុងពេលតែមួយ។

・ឱសថPolycarbophil calcium - អាចធ្វើអោយសកម្មភាពនៃPolycarbophil calciumថយចុះ។

・ឱសថព្យាបាលការកើនឡើងកម្រិតប៉ូតាស្យូមក្នុងឈាម(ឱសថCalcium polystyrene sulfonate, ឱសថSodium polystyrene sulfonate) - អាចធ្វើអោយសកម្មភាពនៃឱសថទាំងនេះថយចុះ។

・ឱសថវីតាមីនដេ(Alfacalcidol, Calcitriol ជាដើម) - អាចធ្វើអោយកើតមានរោគសញ្ញានៃកម្រិតម៉ាញ៉េស្យូមក្នុងឈាមកើនឡើងខ្ពស់។

・ទឹកដោះគោក្នុងបរិមាណច្រើន, ឱសថជាតិកាល់ស្យូម - អាចធ្វើអោយកើតមានរោគសញ្ញា Milk-alkalisyndrome។ ប្រសិនបើកើតឡើង ត្រូវបញ្ឈប់ការប្រើប្រាស់ឱសថនេះ។

・ឱសថMisoprostol - អាចធ្វើអោយកើតមានអាការៈរាករូស។

・ការបរិភោគទឹកដោះគោក្នុងបរិមាណច្រើនឬឱសថជាតិកាល់ស្យូមក្នុងអំឡុងពេលប្រើប្រាស់ឱសថនេះ អាចធ្វើអោយកើតមានរោគសញ្ញានៃការកើនឡើងកម្រិតកាល់ស្យូមខ្ពស់ក្នុងឈាម(រោគសញ្ញាដំបូងរួមមាន ស្ងួតក នោមច្រើន បាត់បង់ស្មារតី ជាដើម) ដូច្នេះ គួរចៀសវាងការបរិភោគទឹកដោះគោក្នុងបរិមាណច្រើនឬឱសថជាតិកាល់ស្យូមក្នុងអំឡុងពេលប្រើប្រាស់ឱសថនេះ។

・ប្រើចំពោះអាការៈទល់លាមកដែលកើតឡើងភ្លាមៗ(ម្ដងម្កាល)។

・ត្រូវពិសារទឹកអោយបានច្រើន។ មិនអាចប្រើចំពោះអ្នកដែលមានមុខងារតម្រងនោមចុះខ្សោយនោះទេ។ គេអាចសម្រួលពេលវេលានៃការបង្ហាញប្រសិទ្ធិភាពរបស់ឱសថនេះ ដោយផ្លាស់ប្ដូរកំហាប់នៃឱសថ(3～4%→2～3ម៉ោង, 10～20%→6～12ម៉ោង,)។

ឱសថនេះមានសកម្មភាពដូចខាងក្រោម៖

- បន្សាបជាតិអាស៊ីតក្នុងក្រពះ។

- បង្កើតទៅជាអំបិលប៊ីកាបូណាតឬអំបិលកាបូណាត(BicarbonateឬCarbonate) ដែលមានលក្ខណៈមិនរលាយនិងពិបាកស្រូបចេញពីពោះវៀន។ សារធាតុទាំងនេះនឹងស្រូបយកជាតិទឹកចូលក្នុងពោះវៀន ធ្វើអោយរីកមាឌនិងលាមកមានលក្ខណៈទន់ ហើយនៅពេលចូលដល់ពោះវៀនធំ វានឹងភ្ញោចអោយពោះវៀនធំមានចលនា ដើម្បីបញ្ចេញលាមក។