Levonorgestrel

ករណីថ្នាំលេប：

ជាទូទៅ ឱសថនេះប្រើនៅក្នុងការពន្យារកំណើតជាបន្ទាន់សម្រាប់ស្ត្រី(ក្នុងអំឡុងពេល72ម៉ោងក្រោយការរួមភេទ)។

ករណីប្រើនៅក្នុងកងដាក់ស្បូន：

ជាទូទៅ ឱសថនេះប្រើនៅក្នុងការព្យាបាលដូចខាងក្រោម：

- ពន្យារកំណើត

- អាការៈធ្លាក់ឈាមច្រើនហួសហេតុនៅពេលមករដូវ

- អាការៈឈឺចាប់និងរោគសញ្ញាផ្សេងៗនៅពេលមករដូវ។

ករណីថ្នាំលេប：

លេប1ដង 1.5mg ក្នុងអំឡុងពេល72ម៉ោងក្រោយការរួមភេទ។

ករណីប្រើនៅក្នុងកងដាក់ស្បូន：

ប្រើចំនួន1(ផ្ទុកLevonorgestrel 52mg) បំពាក់នៅក្នុងស្បូន។

ករណីថ្នាំលេប：

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・អ្នកដែលមានបញ្ហាថ្លើមធ្ងន់ធ្ងរ។

・ស្ត្រីមានផ្ទៃពោះ។

ករណីប្រើនៅក្នុងកងដាក់ស្បូន：

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・អ្នកដែលកំពុងមានឬសង្ស័យថាមានជំងឺមហារីកនៅប្រដាប់ភេទ។

・អ្នកដែលកំពុងមានឬសង្ស័យថាមានជំងឺមហារីកដែលទាក់ទងនឹងអរម៉ូនស្ត្រីប្រូជេស្តេរ៉ូន(Progesterone)។

・អ្នកដែលកំពុងមានអាការៈធ្លាក់ឈាមនៅប្រដាប់ភេទខុសប្រក្រតីដែលមិនទាន់ដឹងអំពីមូលហេតុពិតប្រាកដ។

・អ្នកដែលមានទម្រង់ស្បូនខុសប្រក្រតី(ពីកំណើតឬដោយសារមូលហេតុណាមួយ) ឬ ស្បូនស្ថិតនៅទីតាំងខុសប្រក្រតីខ្លាំង។

・អ្នកដែលមានជំងឺឆ្លងនៅប្រដាប់ភេទ(លើកលែងករណីជំងឺកង់ឌីដ្យាស៊ីស(Candidiasis))

・អ្នកដែលធ្លាប់មានជំងឺកាមរោគ(លើកលែងជំងឺរលាកទ្វារមាសបង្កដោយបាក់តេរី ជំងឺកង់ឌីដ្យាស៊ីស ជំងឺរើម ជំងឺរលាកថ្លើមB ជំងឺឆ្លងវីរុសCytomegalovirus)ក្នុងអំឡុងពេល3ខែចុងក្រោយនេះ។

・អ្នកដែលមានជំងឺរលាកកស្បូនឬរលាកទ្វារមាស។

・អ្នកដែលមានជំងឺរលាកសរីរាង្គក្នុងត្រគាក(PID)។

・អ្នកដែលធ្លាប់កើតមានអាការៈរលាកភ្នាសក្នុងស្បូនក្រោយសម្រាលកូនឬធ្លាប់កើតមានបញ្ហារលូតកូនដោយសារជំងឺឆ្លងក្នុងអំឡុងពេល3ខែចុងក្រោយនេះ។

・អ្នកដែលធ្លាប់មានបញ្ហាកូនក្រៅស្បូន។

・អ្នកដែលធ្លាប់កើតមានអាការៈបាត់បង់ស្មារតីឬជីពចរខ្សោយនៅក្រោយពេលដាក់ឱសថនេះឬកងដាក់ស្បូនផ្សេងទៀតឬនៅពេលធ្វើការបើកកស្បូន។

・អ្នកដែលមានជំងឺថ្លើមឬបញ្ហាថ្លើមធ្ងន់ធ្ងរ។

・ស្ត្រីមានផ្ទៃពោះ ឬ ស្ត្រីដែលអាចនឹងកំពុងមានផ្ទៃពោះ។

ករណីថ្នាំលេប：

ផលរំខានរួមមាន ធ្លាក់ឈាមបណ្ដោះអាសន្ន ឈឺក្បាល ចង់ក្អួត អស់កម្លាំង ងងុយគេង អស់កម្លាំង ឈឺពោះផ្នែកខាងក្រោម វិលមុខ ឈឺដោះ ការមករដូវយឺតជាងមុន។ល។

ករណីប្រើនៅក្នុងកងដាក់ស្បូន：

ផលរំខានរួមមាន ការមករដូវខុសប្រក្រតី ធ្លាក់ឈាម ឈឺពោះ របូតកង ។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ក្ដៅខ្លួន ឈឺផ្នែកខាងក្រោមនៃពោះ មានសារធាតុខុសប្រក្រតីបញ្ចេញពីទ្វារមាស (ជំងឺរលាកសរីរាង្គក្នុងត្រគាក(PID))។

- រដូវមកយឺត ឈឺផ្នែកខាងក្រោមនៃពោះ ធ្លាក់ឈាមខុសប្រក្រតី (កូនក្រៅស្បូន)

- ឈឺឬហូរឈាមខុសប្រក្រតីក្រោយពេលដាក់កង (ធ្លាយស្បូន ឬ កងលៀនចូលផ្នែកកស្បូនឬតួស្បូន)

- ហើមពោះ ឈឺនៅផ្នែកខាងក្រោមនៃពោះ (ពងទឹកដែលកើតនៅក្រពេញអូវែរបែកធ្លាយ)។

ករណីថ្នាំលេប：

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថព្យាបាលជំងឺសាច់ដុំកន្ត្រាក់ឬប្រកាច់(Phenobarbital, Phenytoin, Primidone, Carbamazepine), ឱសថប្រឆាំងវីរុសហ៊ីវ(Ritonavir, Efavirenz), ឱសថRefampicin, ឱសថRifabutin - អាចធ្វើអោយសកម្មភាពនៃឱសថLevonorgestrelថយចុះ។

・អាហារបំប៉នដែលមានផ្ទុកសារធាតុSt. Johnʼs Wort - អាចធ្វើអោយសកម្មភាពនៃឱសថLevonorgestrelថយចុះ។ ដូច្នេះ គួរចៀសវាងប្រើប្រាស់អាហារបំប៉នបែបនោះ នៅពេលប្រើប្រាស់ឱសថនេះ។

ករណីថ្នាំលេប：

・ស្ត្រីមានផ្ទៃពោះមិនត្រូវប្រើប្រាស់ឱសថនេះទេ។

・ស្ត្រីបំបៅដោះកូន គួរចៀសវាងបំបៅដោះកូនក្នុងអំឡុងពេល24ម៉ោងបន្ទាប់ពីប្រើប្រាស់ឱសថនេះ ព្រោះសារធាតុឱសថអាចជ្រៀតចូលក្នុងទឹកដោះម្តាយ។

ករណីប្រើនៅក្នុងកងដាក់ស្បូន：

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនត្រូវប្រើប្រាស់ឱសថនេះទេ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។

ករណីថ្នាំលេប：

・ឱសថនេះមិនមានប្រសិទ្ធិភាពទប់ស្កាត់ការមានផ្ទៃពោះបានទាំងស្រុងនោះទេ។

・ក្រោយពេលប្រើឱសថនេះ ស្ត្រីអាចនឹងមានអាការៈធ្លាក់ឈាមជាបណ្ដោះអាសន្ន ដែលអាចច្រឡំនឹងការមករដូវរបស់ស្ត្រី។

・សារធាតុឱសថនេះក៏អាចត្រូវបានរួមបញ្ចូលគ្នាជាមួយសារធាតុអរម៉ូនស្ត្រីផ្សេងទៀតសម្រាប់ធ្វើជាឱសថពន្យារកំណើតដែលប្រើប្រាស់ជាប្រចាំ។

ករណីប្រើនៅក្នុងកងដាក់ស្បូន：

・សម្រាប់ស្ត្រីដែលមិនធ្លាប់ឆ្លងកាត់ការសម្រាលកូន មិនគួរជ្រើសរើសវិធីពន្យារកំណើតដោយដាក់កងជាជម្រើសទីមួយនោះទេ។

・ក្រោយពេលដាក់កងក្នុងស្បូន ប្រសិនបើមានអាការៈឈឺចាប់ឬធ្លាក់ឈាមខុសប្រក្រតី គួររួសរាន់ទទួលការពិនិត្យជាបន្ទាន់។

ឱសថមានទម្រង់ស្រដៀងទៅនឹងអរម៉ូនស្ត្រីប្រូជេស្តេរ៉ូន(Progesterone) និងមានសកម្មភាពដូចខាងក្រោម ៖

- ទប់ស្កាត់ការបញ្ចេញមេជីវិតញី

- ទប់ស្កាត់ការបង្កកំណើតរវាងមេជីវិតញីនិងមេជីវិតឈ្មោល

- ទប់ស្កាត់ការភ្ជាប់នៃស៊ុតបង្កកំណើតទៅនឹងភ្នាសខាងក្នុងស្បូន ធ្វើអោយស៊ុតមិនអាចលូតលាស់បាន។