Itraconazole

ករណីថ្នាំគ្រាប់：

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

-ជំងឺឆ្លងមេរោគផ្សិតនៅសរីរាង្គខាងក្នុង(ជំងឺឆ្លងមេរោគផ្សិតដែលស្ថិតនៅជ្រៅនៃរាងកាយ)：ជំងឺឆ្លងមេរោគផ្សិតក្នុងឈាម ជំងឺឆ្លងមេរោគផ្សិតនៅផ្លូវដង្ហើម ជំងឺរលាកស្រោមខួរដោយសារមេរោគផ្សិត ជំងឺឆ្លងមេរោគផ្សិតនៅក្រពះពោះវៀន ជំងឺឆ្លងមេរោគផ្សិតនៅផ្លូវតម្រងនោម។

-ជំងឺឆ្លងមេរោគផ្សិតនៅស្រទាប់ជ្រៅនៃស្បែក：ជំងឺSporotrichosis ជំងឺChromomycosis។

-ជំងឺឆ្លងមេរោគផ្សិតនៅស្រទាប់លើនៃស្បែក(លើកលែងជំងឺផ្សិតនៅក្រចកTinea unguium：ជំងឺRingwormឬTinea(នៅតាមដងខ្លួន ដៃ ជើង ក្បាល) ជំងឺកង់ឌីដាស៊ីស(ក្នុងមាត់ ស្បែក ក្រចក ភា្នសសើម ស្បែកជាដើម) ជំងឺTinea versicolor ជំងឺMalassezia folliculitis។

-ជំងឺផ្សិតនៅក្រចក(OnychomycosisឬTinea unguium)

ករណីថ្នាំទឹក：

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

-ជំងឺឆ្លងមេរោគផ្សិត：ជំងឺឆ្លងមេរោគផ្សិតក្នុងឈាម ជំងឺឆ្លងមេរោគផ្សិតនៅផ្លូវដង្ហើម ជំងឺរលាកស្រោមខួរដោយសារមេរោគផ្សិត ជំងឺឆ្លងមេរោគផ្សិតនៅក្រពះពោះវៀន ជំងឺឆ្លងមេរោគផ្សិតនៅផ្លូវនោម ជំងឺកង់ឌីដាស៊ីសនៅក្នុងមាត់និងបំពង់ក ជំងឺកង់ឌីដាស៊ីសនៅក្នុងបំពង់អាហារ ជំងឺBlastomycosis ជំងឺHistoplasmosis ។

-ជំងឺគ្រាប់ឈាមសណឺត្រូហ្វីលថយចុះលក្ខណៈក្ដៅខ្លួន(Febrile neutropenia)ដែលសង្ស័យថាបណ្ដាលមកពីមេរោគផ្សិត។

-បង្ការការកើតមានជំងឺឆ្លងមេរោគផ្សិតដែលស្ថិតនៅជ្រៅចំពោះអ្នកជំងឺមហារីកគ្រាប់ឈាមនិងអ្នកជំងឺដែលទទួលការវះកាត់ផ្លាស់ប្ដូរកោសិកាផលិតគ្រាប់ឈាម(Hematopoietic stem cell transplantation)ដែលអាចទាយដឹងថានឹងមានការថយចុះនៃណឺត្រូហ្វីល។

ករណីថ្នាំចាក់：

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

-ជំងឺឆ្លងមេរោគផ្សិត：ជំងឺឆ្លងមេរោគផ្សិតក្នុងឈាម ជំងឺឆ្លងមេរោគផ្សិតនៅផ្លូវដង្ហើម ជំងឺរលាកស្រោមខួរដោយសារមេរោគផ្សិត ជំងឺឆ្លងមេរោគផ្សិតនៅក្រពះពោះវៀន ជំងឺឆ្លងមេរោគផ្សិតនៅផ្លូវនោម ជំងឺកង់ឌីដាស៊ីសនៅក្នុងមាត់និងបំពង់ក ជំងឺកង់ឌីដាស៊ីសនៅក្នុងបំពង់អាហារ ជំងឺBlastomycosis ជំងឺHistoplasmosis ។

-ជំងឺគ្រាប់ឈាមសណឺត្រូហ្វីលថយចុះលក្ខណៈក្ដៅខ្លួន(Febrile neutropenia)ដែលសង្ស័យថាបណ្ដាលមកពីមេរោគផ្សិត។

ករណីថ្នាំគ្រាប់：

・ជំងឺឆ្លងមេរោគផ្សិតនៅក្នុងសរីរាង្គនៃរាងកាយ(ជំងឺឆ្លងមេរោគផ្សិតដែលស្ថិតនៅជ្រៅនៃរាងកាយ)：

មនុស្សពេញវ័យ：លេប1ថ្ងៃ1ដង 100～200mg ក្រោយបរិភោគអាហាររួចភ្លាម។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។ ករណីប្ដូរពីការប្រើឱសថនេះជាថ្នាំចាក់ ត្រូវប្រើថ្នាំគ្រាប់1ដង 200mg, 1ថ្ងៃ2ដង ក្រោយបរិភោគអាហាររួចភ្លាម។

・ជំងឺឆ្លងមេរោគផ្សិតនៅស្រទាប់ជ្រៅនៃស្បែក：

មនុស្សពេញវ័យ：លេប1ថ្ងៃ1ដង 100～200mg ក្រោយបរិភោគអាហាររួចភ្លាម។ កម្រិតអតិបរមាក្នុង1ថ្ងៃគឺ 200mg។

・ជំងឺឆ្លងមេរោគផ្សិតនៅស្រទាប់លើនៃស្បែក(លើកលែងជំងឺផ្សិតនៅក្រចកTinea unguium)：

មនុស្សពេញវ័យ：លេប1ថ្ងៃ1ដង 50～100mg ក្រោយបរិភោគអាហាររួចភ្លាម។ ចំពោះជំងឺកង់ឌីដាស៊ីស (Candidiasis)នៅក្រចក ប្រើ1ថ្ងៃ1ដង100mg ក្រោយបរិភោគអាហាររួចភ្លាម។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា ប៉ុន្តែ កម្រិតអតិបរមាក្នុង1ថ្ងៃគឺ 200mg។

・ជំងឺផ្សិតនៅក្រចកTinea unguium：

មនុស្សពេញវ័យ：លេប1ដង200mg, 1ថ្ងៃ2ដង ក្រោយបរិភោគអាហាររួចភ្លាម រយៈពេល1សប្ដាហ៍។ បន្ទាប់ពីនោះ ផ្អាកការប្រើឱសថរយៈពេល3សប្ដាហ៍ (1វដ្ត)។ អនុវត្តដូចនោះ អោយបានចំនួន3វដ្ត។ អាចបន្ថយកម្រិតប្រើប្រាស់ទៅតាមការចាំបាច់។

ករណីថ្នាំទឹក(1%)：

-ជំងឺមេរោគផ្សិតក្នុងឈាម ជំងឺឆ្លងមេរោគផ្សិតនៅផ្លូវដង្ហើម ជំងឺឆ្លងមេរោគផ្សិតនៅក្រពះពោះវៀន ជំងឺឆ្លងមេរោគផ្សិតនៅផ្លូវនោម ជំងឺរលាកស្រោមខួរដោយសារមេរោគផ្សិត ជំងឺBlastomycosis ជំងឺHistoplasmosis：ពិសា 1ថ្ងៃ1ដង200mg(ត្រូវនឹង20mL) នៅពេលពោះទទេ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា ប៉ុន្តែ កម្រិតអតិបរមាគឺ 1ដង20mL, 1ថ្ងៃ40mL។

-ជំងឺកង់ឌីដាស៊ីស (Candidiasis)ក្នុងមាត់និងបំពង់ក ជំងឺកង់ឌីដាស៊ីស (Candidiasis)ក្នុងបំពង់អាហារ：ពិសា 1ថ្ងៃ1ដង200mg(ត្រូវនឹង20mL) នៅពេលពោះទទេ។

-ជំងឺគ្រាប់ឈាមសណឺត្រូហ្វីលថយចុះនិងមានអាការៈក្ដៅខ្លួនដែលសង្ស័យថាបណ្ដាលមកពីការឆ្លងមេរោគផ្សិត：ប្ដូរពីការប្រើឱសថនេះជាថ្នាំចាក់ ពិសា 1ថ្ងៃ1ដង 200mg(ត្រូវនឹង20mL) នៅពេលពោះទទេ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា ប៉ុន្តែ កម្រិតអតិបរមាគឺ 1ដង20mL, 1ថ្ងៃ40mL។

-បង្ការជំងឺឆ្លងមេរោគផ្សិតនៅសរីរាង្គក្នុងរាងកាយចំពោះអ្នកជំងឺមហារីកឈាមឬអ្នកជំងឺដែលទទួលការវះកាត់ផ្លាស់ប្ដូរកោសិកាផលិតគ្រាប់ឈាមដែលគ្រាប់ឈាមសណឺត្រូហ្វីលអាចនឹងថយចុះ：ពិសា 1ថ្ងៃ1ដង 200mg(ត្រូវនឹង20mL) នៅពេលពោះទទេ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា ប៉ុន្តែ កម្រិតអតិបរមាគឺ 1ដង20mL, 1ថ្ងៃ40mL។

ករណីថ្នាំចាក់：

មនុស្សពេញវ័យ：នៅ2ថ្ងៃដំបូង ប្រើ1ថ្ងៃ400mg បែងចែកជា2ដងក្នុង1ថ្ងៃ ដោយព្យួរសេរ៉ូមតាមសរសៃវ៉ែនរយៈពេល1ម៉ោង។ ចាប់ពីថ្ងៃទី3ទៅ ប្រើ1ថ្ងៃ1ដង 200mg ដោយព្យួរសេរ៉ូមតាមសរសៃវ៉ែនរយៈពេល1ម៉ោង។ ត្រូវប្រើតម្រងដែលភ្ជាប់មកជាមួយឱសថនេះ។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・អ្នកដែលកំពុងប្រើប្រាស់ឱសថដូចខាងក្រោម：Quinidine, Pimozide, Bepridil, Triazolam, Simvastatin, Azelnidipine, Nisoldipine, Ergotamine, Dihydroergotamine, Ergometrine, Methylergometrine, Vardenafil, Eplerenone, Blonanserin, Sildenafil, Tadalafil, Asunaprevir, Vaniprevir, Suvorexant, Ibrutinib, Ticagrelor, Aliskiren, Dabigatran, Rivaroxaban, Riociguat។

・អ្នកដែលកំពុងប្រើប្រាស់ឱសថColchicineនិងមានមុខងារតម្រងនោមឬមុខងារថ្លើមខ្សោយ។

・អ្នកដែលកំពុងឬធ្លាប់មានជំងឺថ្លើមធ្ងន់ធ្ងរ។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ។

・អ្នកដែលមានជំងឺតម្រងនោមធ្ងន់ធ្ងរ (Ccr<30mL/min) (ករណីថ្នាំចាក់ដែលមានផ្ទុកសារធាតុ Hydroxypropyl-β-cyclodextrin ប៉ុណ្ណោះ)។

ផលរំខានរួមមាន អារម្មណ៍មិនស្រួលក្នុងក្រពះ ចង់ក្អួត ឡើងកន្ទួលក្រហម ឈឺពោះ ខ្យល់ក្នុងពោះវៀននិងផោម រាករូស អស់កម្លាំង ។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ហើមពេញខ្លួន ចង់ក្អួត ដង្ហក់ ពិបាកដកដង្ហើម (មុខងារបេះដូងធ្លាក់ចុះ ដក់ទឹកក្នុងសួត)។

- អស់កម្លាំង បាត់បង់ចំណង់អាហារ ភ្នែកនិងស្បែកឡើងពណ៌លឿង (មុខងារថ្លើមមានបញ្ហា ខាន់លឿង ស្ទះទឹកប្រមាត់)

- ក្ដៅខ្លួនខ្លាំង ភ្នែកក្រហម រលាត់នៅតាមមាត់ មុខនិងខ្លួនឡើងក្រហម (ជំងឺនៃបណ្តុំរោគសញ្ញាលើស្បែកភ្នាសនិងភ្នែក(Muco-cutaneo-ocular syndrome) ជំងឺស្លាប់កោសិកាស្បែក(TEN)ជាដើម)

- ពិបាកដកដង្ហើម រមាស់លើស្បែក ស្មារតីដឹងខ្លួនធ្លាក់ចុះ (រោគប្រតិកម្មធ្ងន់ធ្ងរ)

- ក្ដៅខ្លួន ក្អកស្ងួត ពិបាកដកដង្ហើម (រលាកសួតប្រភេទ Interstitial pneumonia)

・ឱសថដូចខាងក្រោម：Quinidine, Pimozide, Bepridil, Triazolam, Simvastatin, Azelnidipine, Nisoldipine, Ergotamine, Dihydroergotamine, Ergometrine, Methylergometrine, Vardenafil, Eplerenone, Blonanserin, Sildenafil, Tadalafil, Asunaprevir, Vaniprevir, Suvorexant, Ibrutinib, Ticagrelor, Aliskiren, Dabigatran, Rivaroxaban, Riociguat - អាចធ្វើអោយកំហាប់ក្នុងឈាមនៃឱសថទាំងនេះកើនឡើង បណ្ដាលអោយមានផលរំខានធ្ងន់ធ្ងរ ដូច្នេះ ហាមប្រើរួមគ្នា។

ក្រៅពីនេះ មានឱសថជាច្រើនទៀតដែលអាចប្រើរួមជាមួយឱសថនេះបាន ប៉ុន្តែត្រូវតាមដានផលរំខានរបស់ឱសថអោយបានដិតដល់។ សូមពិនិត្យមើលព័ត៌មានបន្ថែម។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនត្រូវប្រើឱសថនេះទេ ព្រោះអាចប៉ះពាល់ដល់ទារកក្នុងផ្ទៃ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・ឱសថនេះអាចផ្ដល់ផលរំខានដល់មុខងារថ្លើម ដូច្នេះ ក្នុងករណីប្រើឱសថនេះរយៈពេលវែង គួរធ្វើការពិនិត្យដើម្បីតាមដានមុខងារថ្លើមរបស់អ្នកជំងឺអោយបានទៀងទាត់។

ជាឱសថប្រឆាំងមេរោគផ្សិតប្រភេទTriazole antifungal ដោយមានប្រសិទ្ធិភាពបង្អាក់សកម្មភាពបង្កើតសារធាតុErgosterolនៃភ្នាសកោសិការបស់មេរោគ ធ្វើអោយមេរោគផ្សិតមិនអាចរស់រានឬកើនចំនួនបាន។