Glimepiride

ជាទូទៅ ឱសថនេះប្រើនៅក្នុងការព្យាបាលជំងឺទឹកនោមផ្អែមប្រភេទទី2។

ថ្នាំលេប：

ចាប់ផ្ដើមប្រើពីកម្រិត1ថ្ងៃ0.5～1mg បែងចែកជា1～2ដងក្នុង1ថ្ងៃ(ពេលព្រឹក ឬ ពេលព្រឹកនិងពេលល្ងាច)។ អាចប្រើនៅមុនឬក្រោយបរិភោគអាហារ។ ជាទូទៅ កម្រិតប្រើជាប្រចាំគឺ1ថ្ងៃ1～4mg ហើយកម្រិតអតិបរមាប្រើក្នុង1ថ្ងៃគឺ6mg។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ ឬ ឱសថប្រភេទSulfonamide។

・អ្នកដែលកំពុងមានរោគសញ្ញានៃការកើនឡើងសារធាតុកេតូននៅក្នុងរាងកាយ(Ketosis)ធ្ងន់ធ្ងរ ឬ ស្ថិតក្នុងស្ថានភាពបាត់បង់ស្មារតីដោយសារជំងឺទឹកនោមផ្អែម ឬ អ្នកដែលមានជំងឺទឹកនោមផ្អែមប្រភេទពឹងផ្អែកលើអាំងស៊ុយលីន(ជំងឺទឹកនោមផ្អែមប្រភេទទី1ជាដើម)។

・អ្នកដែលមានជំងឺថ្លើមឬតម្រងនោមធ្ងន់ធ្ងរ។

・អ្នកដែលកំពុងមានជំងឺឆ្លងធ្ងន់ធ្ងរ ឬ ស្ថិតនៅមុននិងក្រោយពេលវះកាត់ ឬ កំពុងមានរបួសធ្ងន់ធ្ងរ។

・អ្នកដែលកំពុងមានបញ្ហាក្រពះឬពោះវៀន ដូចជា រាករូស ក្អួតចង្អោរ ជាដើម។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ។

ផលរំខានរួមមាន កម្រិតជាតិស្ករក្នុងឈាមចុះទាបខ្លាំង ចង់ក្អួត រាករូស អារម្មណ៍មិនស្រួលក្នុងក្រពះ វិលមុខ។ល។

ប្រសិនបមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- អស់កម្លាំង អារម្មណ៍ឃ្លានខ្លាំង បែកញើស បាត់បង់ស្មារតី (កម្រិតជាតិស្ករក្នុងឈាមចុះទាបខ្លាំង)

- ឆាប់ហត់ អស់កម្លាំង បេះដូងលោតញាប់ ទឹកនោមពណ៌ក្រហមត្នោត ក្ដៅខ្លួន (ជំងឺខ្វះឈឈាមប្រភេទHemolytic anemia)

- ឈឺបំពង់ក ឈឺក្បាល ក្ដៅខ្លួនខ្លាំង រងាញាក់ (ជំងឺAgranulocytosis)

- ឆាប់ហត់ អស់កម្លាំង បេះដូងលោតញាប់ ឈាមច្រមុះ ឈាមតាមអញ្ចាញធ្មេញ ហូរឈាមក្រោមស្បែក ក្ដៅខ្លួន (ជំងឺខ្វះឈាមប្រភេទAplastic anemia, រោគសញ្ញានៃការថយចុះចំនួនប្លាកែត ជាដើម)

- អស់កម្លាំង បាត់បង់ចំណង់អាហារ ភ្នែកនិងស្បែកប្រែពណ៌លឿង រមាស់ (មុខងារថ្លើមចុះខ្សោយ ខាន់លឿង)។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថព្យាបាលជំងឺទឹកនោមផ្អែមផ្សេងទៀត - អាចធ្វើអោយកម្រិតជាតិស្ករក្នុងឈាមចុះទាបខ្លាំង។

・ឱសថប្រភេទSalicylic acid (Aspirin, Sasapyrineជាដើម) - អាចធ្វើអោយកម្រិតជាតិស្ករក្នុងឈាមចុះទាបខ្លាំង។

・ឱសថProbenecid, ឱសថWarfarin, ឱសថNaproxen, ឱសថLoxoprofen, ឱសថAmfenac, ឱសថNabumetone, ឱសថLornoxicam, ឱសថប្រភេទBeta blockers(Propranolol, Atenolol, Pindolol, Metoprololជាដើម), ឱសថទប់ស្កាត់សកម្មភាពអង់ស៊ីមMAO (Selegiline ជាដើម), ឱសថClarithromycin, ឱសថប្រភេទSulfonamides(Sulfamethizole, Sulfamethoxazoleជាដើម), ឱសថChloramphenicol, ឱសថប្រឆាំងបាក់តេរីប្រភេទTetracycline(Tetracycline, Minocycline, Doxycyclineជាដើម), ឱសថCiprofloxacin, ឱសថLevofloxacin, ឱសថបញ្ចុះខ្លាញ់ប្រភេទFibrates(Bezafibrate, Clofibrateជាដើម), ឱសថប្រឆាំងមេរោគផ្សិតប្រភេទAzole(Miconazole, Fluconazoleជាដើម), ឱសថCibenzoline succinate, ឱសថDisopyramide, ឱសថPirmenol - អាចធ្វើអោយកម្រិតជាតិស្ករក្នុងឈាមចុះទាបខ្លាំង។

・ឱសថAdrenalin, ឱសថស្តេរ៉ូអ៊ីត(Prednisolone, Triamcinolone, Hydrocortisoneជាដើម), ឱសថនៃក្រពេញទីរ៉ូអ៊ីត(Levothyroxineជាដើម), ឱសថប្រភេទអរម៉ូនEstradiol(Ethinylestradiol, Estriolជាដើម), ឱសថបញ្ចុះទឹកនោម(Trichlormethiazide, Furosemideជាដើម), ឱសថPyrazinamide, ឱសថIsoniazid, ឱសថRifampicin, ឱសថNicotinic acid, ឱសថប្រភេទPhenothiazines(Chlorpromazine, Fluphenazineជាដើម), ឱសថPhenytoin, ឱសថBuserelin - អាចធ្វើអោយប្រសិទ្ធិភាពបញ្ចុះកម្រិតជាតិស្ករក្នុងឈាមថយចុះ។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនត្រូវប្រើប្រាស់ឱសថនេះទេ ព្រោះអាចប៉ះពាល់ដល់ទារកក្នុងផ្ទៃ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។

・ការប្រើប្រាស់ឱសថនេះគឺសម្រាប់អ្នកដែលបានអនុវត្តការគ្រប់គ្រងរបបអាហារនិងលំហាត់ប្រាណសមស្របហើយប៉ុន្តែនៅមិនអាចទទួលបានប្រសិទ្ធិភាពគ្រប់គ្រាន់ក្នុងការគ្រប់គ្រងជាតិស្ករក្នុងឈាមតែប៉ុណ្ណោះ។ ម្យ៉ាងទៀត អ្នកជំងឺគួរបន្តអនុវត្តការគ្រប់គ្រងរបបអាហារនិងលំហាត់ប្រាណអោយបានសមស្រប ក្នុងអំឡុងពេលនៃការប្រើប្រាស់ឱសថនេះ។

・អ្នកដែលងាយទទួលរងនូវផលរំខាននៃឱសថ ធ្វើអោយកម្រិតជាតិស្ករក្នុងឈាមចុះទាបខ្លាំង ៖

(1) អ្នកដែលមានជំងឺថ្លើមឬតម្រងនោម

(2) អ្នកដែលមានមុខងារក្រពេញPituitary glandឬក្រពញAdrenal glandចុះខ្សោយ

(3) អ្នកដែលមិនបរិភោគអាហារឬបរិភោគអាហារមិនទៀងពេលវេលាឬមិនមានតុល្យភាពក្នុងរបបអាហារ

(4) អ្នកដែលធ្វើលំហាត់ប្រាណខ្លាំងក្លា

(5) អ្នកដែលពិសារគ្រឿងស្រវឹងច្រើន

(6) មនុស្សចាស់

(7) អ្នកដែលកំពុងប្រើប្រាស់ឱសថដែលមានឥទ្ធិពលបញ្ចុះជាតិស្ករក្នុងឈាមផ្សេងទៀត។

・នៅពេលកើតមានអាការៈផ្សេងៗដោយសារកម្រិតជាតិស្ករចុះទាបខ្លាំង គួរបរិភោគស្ករឬទឹកផ្លែឈើក្នុងបរិមាណសមស្របដើម្បីបង្កើនជាតិស្ករក្នុងឈាមឡើងវិញ។ ម្យ៉ាងទៀត អ្នកជំងឺគួរប្រុងប្រយ័ត្ននៅពេលបើកបរឬបញ្ជាម៉ាស៊ីនដែលមានគ្រោះថ្នាក់។

ឱសថនេះមានប្រសិទ្ធិភាពភ្ជាប់ទៅនឹងគ្រឿងទទួលSulfonylurea receptorនៅក្នុងកោសិកាβរបស់ក្រពេញលំពែងដើម្បីភ្ញោចកោសិកានេះអោយបញ្ចេញអរម៉ូនអាំងស៊ុយលីន ដែលជាអរម៉ូនមានតួនាទីបញ្ចុះជាតិស្ករក្នុងឈាម។