Zoledronic acid hydrate

  • Pharmaceuticals and Medical Devices Agency នៃប្រទេសជប៉ុន (PMDA)

  • Pharmaceuticals and Medical Devices Agency នៃប្រទេសជប៉ុន (PMDA)

    • ប្រសិទ្ធិភាពព្យាបាល
    • កម្រិតប្រើប្រាស់
    • ហាមប្រើ
    • ផលរំខាន
    • អន្តរប្រតិកម្ម
    • ស្ត្រីមានផ្ទៃពោះ និង ស្ត្រីបំបៅដោះកូន
    • ការប្រុងប្រយ័ត្នជាពិសេស
    • សកម្មភាពឱសថ
    • ប្រសិទ្ធិភាពព្យាបាល

      ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

      - រោគសញ្ញានៃការកើនឡើងកម្រិតកាល់ស្យូមខ្ពស់នៅក្នុងឈាមដោយសារជំងឺមហារីក។

      - ផលប៉ះពាល់ទៅលើឆ្អឹងដោយសារជំងឺមហារីកខួរឆ្អឹងច្រើនកន្លែង(Multiple myeloma)។

      - ផលប៉ះពាល់ទៅលើឆ្អឹងដោយសារការរីករាលដាលនៃជំងឺមហារីកដុំរឹងផ្សេងៗទៅដល់ឆ្អឹង។

      - ជំងឺពុកឆ្អឹង (Osteoporosis)។

    • កម្រិតប្រើប្រាស់

      ថ្នាំចាក់:

      ・ករណីប្រើនៅក្នុងការព្យាបាលរោគសញ្ញានៃការលើសកាល់ស្យូមក្នុងឈាមដោយសារជំងឺមហារីក:

      មនុស្សពេញវ័យ:ប្រើក្នុងកម្រិត4mg ដោយព្យួរសេរ៉ូមតាមសរសៃវ៉ែនរយៈពេលយ៉ាងហោចណាស់15នាទី។ ត្រូវទុកគម្លាតយ៉ាងហោចណាស់1សប្ដាហ៍ ដើម្បីតាមដានប្រសិទ្ធិភាព មុននឹងប្រើឱសថនេះម្ដងទៀតក្នុងករណីចាំបាច់។

      ・ករណីប្រើនៅក្នុងការព្យាបាលបញ្ហាឆ្អឹងដោយសារជំងឺមមហារីកខួរឆ្អឹងប្រភេទMultiple myelomaឬជំងឺមហារីករាលដាលដល់ឆ្អឹង:

      មនុស្សពេញវ័យ:ប្រើក្នុងកម្រិត4mg ដោយព្យួរសេរ៉ូមតាមសរសៃវ៉ែនរយៈពេលយ៉ាងហោចណាស់15នាទី។ បន្តប្រើឱសថនេះដោយត្រូវទុកគម្លាត3~4សប្ដាហ៍រវាងការប្រើម្ដងៗ។

      ・ករណីប្រើនៅក្នុងការព្យាបាលជំងឺពុកឆ្អឹង (Osteoporosis):
      មនុស្សពេញវ័យ:ប្រើក្នុងកម្រិត1ដង 5mg ដោយព្យួរសេរ៉ូមតាមសរសៃវ៉ែនរយៈពេលយ៉ាងហោចណាស់15នាទី។ ប្រើឱសថនេះ1ឆ្នាំម្ដង។

    • ហាមប្រើ

      ករណីប្រើនៅក្នុងការព្យាបាលជំងឺពុកឆ្អឹង (Osteoporosis):

      ・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ ឬ ឱសថBisphosphonateផ្សេងទៀត។
      ・អ្នកដែលមានបញ្ហាតម្រងនោមធ្ងន់ធ្ងរ (Ccr ក្រោម35mL/min)។
      ・អ្នកដែលកំពុងស្ថិតក្នុងស្ថានភាពខ្សោះជាតិទឹកក្នុងរាងកាយ (អ្នកដែលកំពុងមានអាការៈក្ដៅខ្លួនខ្លាំង ឬ រាករូសខ្លាំង ឬ ក្អួចចង្អោរ ។ល។)
      ・អ្នកដែលមានកម្រិតកាល់ស្យូមក្នុងឈាមចុះទាប។
      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ។

      ករណីប្រើនៅក្នុងការព្យាបាលផ្សេងទៀត:
      ・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ ឬ ឱសថBisphosphonateផ្សេងទៀត។
      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ។

    • ផលរំខាន

      ផលរំខានរួមមាន ក្ដៅខ្លួន ចង់ក្អួត អស់កម្លាំង ឈឺក្បាល ឈឺឆ្អឹង ឈឺសន្លាក់ ឡើងកន្ទួលក្រហមឬស្នាមក្រហមលើស្បែក រមាស់ ហើមត្របកភ្នែកនិងជុំវិញមាត់ ពិបាកដកដង្ហើម កន្ទាលត្រអាក។ល។

      ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

      - បរិមាណទឹកនោមថយចុះ ហើម ស្ងួតក ញ័រដៃ (មុខងារតម្រងនោមចុះខ្សោយ រលាកតម្រងនោមប្រភេទInterstitial nephritis ជំងឺFanconi syndrome)

      - ហើមពេញខ្លួន ពិបាកដកដង្ហើមនៅពេលទម្រេតខ្លួន (ជំងឺខ្សោយបេះដូងប្រភេទCongestive heart failure)

      - សាច់ដុំកន្ត្រាក់ គ្មានកម្លាំងសាច់ដុំ ស្ពឹក មិនស្គាល់ទីកន្លែងឬពេលវេលា បេះដូងលោតញាប់ (រោគសញ្ញានៃកម្រិតកាល់ស្យូមក្នុងឈាមចុះទាប)

      - ក្ដៅខ្លួន ក្អកស្ងួត ពិបាកដកដង្ហើម (ជំងឺរលាកសួតប្រភេទInterstitial pneumonia)

      - ឈឺឬហើមចង្កា ស្ពឹកនៅចង្កា ធ្ងន់ចង្កា ធ្មេញរង្គើ ហើមអញ្ចាញធ្មេញ ក្ដៅខ្លួន (ជំងឺខូចឆ្អឹងចង្កា រលាកឆ្អឹងចង្កា)

      - រលាកនៅត្រចៀកផ្នែកខាងក្រៅ មានទឹករងៃហូរចេញពីត្រចៀក ឈឺត្រចៀក មិនស្រួលក្នុងត្រចៀក រមាស់ឬក្ដៅក្នុងត្រចៀក (ជំងឺខូចឆ្អឹងរន្ធត្រចៀក)

      - ឈឺនៅភ្លៅឬគល់ភ្លៅ (បាក់ឬប្រេះឆ្អឹងភ្លៅ)។

    • អន្តរប្រតិកម្ម

      ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

      ・ឱសថប្រភេទCalcitonin - អាចធ្វើអោយកម្រិតកាល់ស្យូមនៅក្នុងឈាមកើនឡើងខ្ពស់ភ្លាមៗ។

      ・ឱសថប្រឆាំងបាក់តេរីប្រភេទAminoglycoside - អាចធ្វើអោយកម្រិតកាល់ស្យូមនៅក្នុងឈាមធ្លាក់ចុះករណីប្រើឱសថនេះរយៈពេលយូរ។

      ・ឱសថCinacalcet - អាចធ្វើអោយកម្រិតកាល់ស្យូមនៅក្នុងឈាមធ្លាក់ចុះ។

    • ស្ត្រីមានផ្ទៃពោះ និង ស្ត្រីបំបៅដោះកូន

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនត្រូវប្រើប្រាស់ឱសថនេះទេ។

      ・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

    • ការប្រុងប្រយ័ត្នជាពិសេស

      ・មុនចាប់ផ្ដើមប្រើប្រាស់ឱសថនេះ អ្នកជំងឺគួរទទួលការពិនិត្យមាត់ធ្មេញ ហើយប្រសិនបើមានបញ្ហាមាត់ធ្មេញដែលត្រូវការដកធ្មេញឬវះកាត់ អ្នកជំងឺគួរធ្វើការព្យាបាលមាត់ធ្មេញចប់រួចរាល់ជាមុនសិន ព្រោះការដកធ្មេញជាដើមអាចធ្វើអោយផលរំខាននៃឱសថនេះរប៉ះពាល់ដល់ចង្កាងាយនឹងកើតឡើង។ ម្យ៉ាងទៀត អ្នកជំងឺគួររក្សាអនាម័យមាត់ធ្មេញជានិច្ច ព្រមទាំងទទួលការពិនិត្យសុខភាពមាត់ធ្មេញអោយបានទៀងទាត់។

      ・អ្នកជំងឺពុកឆ្អឹងគួរបរិភោគអាហារដែលមានជាតិកាល់ស្យូមអោយបានគ្រប់គ្រាន់។

    • សកម្មភាពឱសថ

      នៅក្នុងឆ្អឹងមានកោសិកា2ប្រភេទ គឺកោសិកាបំបែកឆ្អឹង និង កោសិកាផលិតឆ្អឹង។ ឱសថនេះមានប្រសិទ្ធិភាពបង្អាក់ដំណើរការនៃវដ្ដអាស៊ីតមេវ៉ាឡូនិច(Mevalonate pathway)និងប្រតិកម្មផ្សេងៗទៀតនៅក្នុងកោសិកាបំបែកឆ្អឹង ធ្វើអោយកោសិកានេះមិនអាចធ្វើសកម្មភាពរំលាយឆ្អឹងបាន។

*ព័ត៌មានឱសថត្រូវបានរៀបរៀងដោយ អ៊ីម៉ាតុគឹ មេឌីក (ខេមបូឌា) ដោយផ្អែកលើប្រភពព័ត៌មានខាងក្រោម។ សម្រាប់ព័ត៌មានលម្អិត សូមស្វែងរកនៅក្នុងក្រដាសព័ត៌មាននៃឱសថនីមួយៗ ឬ សាកសួរទៅកាន់ក្រុមហ៊ុនឱសថឬតំណាងចែកចាយនៃឱសថនីមួយៗ។

ប្រភពព័ត៌មាន៖

- ក្រដាសព័ត៌មាននៃឱសថសម្រាប់អ្នកជំនាញវេជ្ជសាស្ត្រដែលប្រើប្រាស់នៅប្រទេសជប៉ុន (Pharmaceutical and Medical Devices Agency, Pmda): https://www.pmda.go.jp

- ព័ត៌មានសង្ខេបនៃឱសថសម្រាប់អ្នកជំងឺដែលប្រើប្រាស់នៅប្រទេសជប៉ុន: http://www.rad-ar.or.jp