Voglibose

ជាទូទៅ ឱសថនេះប្រើនៅក្នុងការព្យាបាលដូចខាងក្រោម ៖

- បញ្ចុះជាតិស្ករក្នុងឈាមដែលកើនឡើងខ្ពស់ក្រោយពេលបរិភោគអាហារ ចំពោះអ្នកមានជំងឺទឹកនោមផ្អែម (ប្រើក្នុងករណីដែលការព្យាបាលដោយរបបអាហារនិងការហាត់ប្រាណមិនមានប្រសិទ្ធិភាពគ្រប់គ្រាន់ ឬ បូករួមទាំងការប្រើឱសថបញ្ចុះជាតិស្ករក្នុងឈាមឬអាំងស៊ុយលីនមិនមានប្រសិទ្ធិភាពគ្រប់គ្រាន់តែប៉ុណ្ណោះ)

- បង្ការការកើតជំងឺទឹកនោមផ្អែមប្រភេទទី2 ចំពោះអ្នកដែលមានការកើនឡើងនៃជាតិស្ករក្នុងឈាមខុសប្រក្រតីនៅក្រោយពេលបរិភោគអាហារ (ប្រើក្នុងករណីដែលការព្យាបាលដោយរបបអាហារនិងការហាត់ប្រាណមិនមានប្រសិទ្ធិភាពគ្រប់គ្រាន់តែប៉ុណ្ណោះ)។

ថ្នាំលេប：

- បញ្ចុះជាតិស្ករក្នុងឈាមដែលកើនឡើងខ្ពស់ក្រោយពេលបរិភោគអាហារ ចំពោះអ្នកមានជំងឺទឹកនោមផ្អែម：

មនុស្សពេញវ័យ：លេប1ដង0.2mg, 1ថ្ងៃ3ដង ភ្លាមៗមុនបរិភោគអាហារ។ ករណីប្រសិទ្ធិភាពមិនគ្រប់គ្រាន់ អាចបង្កើនកម្រិតដល់1ដង0.3mg។

- បង្ការការកើតជំងឺទឹកនោមផ្អែមប្រភេទទី2 ចំពោះអ្នកដែលមានការកើនឡើងនៃជាតិស្ករក្នុងឈាមខុសប្រក្រតីនៅក្រោយពេលបរិភោគអាហារ：

មនុស្សពេញវ័យ：លេប1ដង0.2mg, 1ថ្ងៃ3ដង ភ្លាមៗមុនបរិភោគអាហារ។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・អ្នកដែលកំពុងមានរោគសញ្ញានៃការកើនឡើងសារធាតុកេតូននៅក្នុងរាងកាយ(Ketosis)ធ្ងន់ធ្ងរ ឬ ស្ថិតក្នុងស្ថានភាពបាត់បង់ស្មារតីដោយសារជំងឺទឹកនោមផ្អែម។

・អ្នកដែលកំពុងមានជំងឺឆ្លងធ្ងន់ធ្ងរ ឬ ស្ថិតនៅមុននិងក្រោយពេលវះកាត់ ឬ កំពុងមានរបួសធ្ងន់ធ្ងរ។

ផលរំខានរួមមាន រាករូស លាមកជ្រាយ លឺសម្លេងនៅក្នុងពោះ ផោមច្រើន ឈឺពោះ ទល់លាមក បាត់បង់ចំណង់អាហារ ក្អួតចង្អោរ ក្រហាយទ្រូង ស្ងួតក វិលមុខ អាការៈខ្វះឈាម ស្ពឹក ហើមមុខ ស្រវាំងភ្នែក អារម្មណ៍ច្រាលក្ដៅ អស់កម្លាំង បែកញើស ជ្រុះរោមឬសក់ ឡើងកន្ទួលក្រហម រមាស់ ស្បែកងាយប្រតិកម្មទៅនឹងពន្លឺព្រះអាទិត្យ។ល។

ប្រសិនបមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- អស់កម្លាំង អារម្មណ៍ឃ្លានខ្លាំង បែកញើស ញ័រដៃជើង (កម្រិតជាតិស្ករក្នុងឈាមចុះទាបខ្លាំង)

- ហើមពោះខ្លាំង ឈឺពោះជាប់រហូត ក្អួតចង្អោរ (ស្ទះពោះវៀន)

- អស់កម្លាំង បាត់បង់ចំណង់អាហារ ភ្នែកនិងស្បែកប្រែពណ៌លឿង រមាស់ (មុខងារថ្លើមចុះខ្សោយធ្ងន់ធ្ងរ ខាន់លឿង)

- ទល់លាមក បាត់បង់ស្មារតី (រោគសញ្ញានៃការកើនឡើងសារធាតុអាម៉ូញាក់ក្នុងឈាម(Hyperammonemia)កាន់តែធ្ងន់ធ្ងរចំពោះអ្នកដែលមានជំងឺក្រិនថ្លើម)។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថព្យាបាលជំងឺទឹកនោមផ្អែមផ្សេងទៀត - អាចធ្វើអោយកម្រិតជាតិស្ករក្នុងឈាមចុះទាបខ្លាំង។

・ឱសថប្រភេទBeta blockers(Propranolol, Atenolol, Pindolol, Metoprololជាដើម), ឱសថប្រភេទSalicylic acid (Aspirin, Sasapyrineជាដើម), ឱសថទប់ស្កាត់សកម្មភាពអង់ស៊ីមMAO (Selegiline ជាដើម), ឱសថបញ្ចុះខ្លាញ់ប្រភេទFibrates(Bezafibrate, Clofibrateជាដើម), ឱសថWarfarin ជាដើម - អាចធ្វើអោយកម្រិតជាតិស្ករក្នុងឈាមចុះទាបខ្លាំង។

・ឱសថAdrenalin(ឬEpinephrine), ឱសថស្តេរ៉ូអ៊ីត(Methylprednisolone, Triamcinolone, Hydrocortisoneជាដើម), ឱសថនៃក្រពេញទីរ៉ូអ៊ីត(Levothyroxineជាដើម)។ល។ - អាចធ្វើអោយប្រសិទ្ធិភាពបញ្ចុះកម្រិតជាតិស្ករក្នុងឈាមថយចុះ។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះអាចបរិមាណទឹកដោះថយចុះ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・ការប្រើប្រាស់ឱសថនេះគឺសម្រាប់អ្នកដែលបានអនុវត្តការគ្រប់គ្រងរបបអាហារនិងលំហាត់ប្រាណសមស្របហើយប៉ុន្តែនៅមិនអាចទទួលបានប្រសិទ្ធិភាពគ្រប់គ្រាន់ក្នុងការគ្រប់គ្រងជាតិស្ករក្នុងឈាមតែប៉ុណ្ណោះ។ ម្យ៉ាងទៀត អ្នកជំងឺគួរបន្តអនុវត្តការគ្រប់គ្រងរបបអាហារនិងលំហាត់ប្រាណអោយបានសមស្រប ក្នុងអំឡុងពេលនៃការប្រើប្រាស់ឱសថនេះ។

・ឱសថនេះទប់ស្កាត់ការស្រូបជាតិស្ករនៅក្នុងអាហារ ដូច្នេះ ជាទូទៅ ឱសថនេះប្រើនៅមុនពេលបរិភោគអាហារភ្លាម (ក្នុងអំឡុងពេល10នាទីមុនបរិភោគអាហារ)។ ឱសថនេះនឹងមិនបង្ហាញប្រសិទ្ធិភាពទេ ប្រសិនបើមិនមានអាហារ។

・នៅពេលកើតមានអាការៈផ្សេងៗដោយសារកម្រិតជាតិស្ករចុះទាបខ្លាំង គួរបរិភោគសារធាតុគ្លុយកូសក្នុងបរិមាណសមស្របដើម្បីបង្កើនជាតិស្ករក្នុងឈាមឡើងវិញ (ស្ករឬទឹកផ្លែឈើមិនមានប្រសិទ្ធិភាពនោះទេ)។ ម្យ៉ាងទៀត អ្នកជំងឺគួរប្រុងប្រយ័ត្ននៅពេលបើកបរឬបញ្ជាម៉ាស៊ីនដែលមានគ្រោះថ្នាក់។

ឱសថនេះមានប្រសិទ្ធិភាពទប់ស្កាត់សកម្មភាពរបស់អង់ស៊ីមα-glucosidase ដែលជាអង់ស៊ីមមានតួនាទីបំបែកសមាសធាតុស្ករអោយទៅជាគ្លុយកូស។ ការទប់ស្កាត់នេះអាចកាត់បន្ថយការស្រូបគ្លុយកូសពីអាហារនៅក្នុងពោះវៀន ហើយជាលទ្ធផល អាចទប់ស្កាត់ការកើនឡើងនៃកម្រិតជាតិស្ករក្នុងឈាមនៅក្រោយពេលបរិភោគអាហារ។