Simvastatin

ជាទូទៅ ឱសថនេះប្រើនៅក្នុងការព្យាបាលជំងឺលើសកម្រិតជាតិខ្លាញ់ក្នុងឈាម និង ជំងឺលើសកូឡេស្តេរ៉ូលក្នុងឈាមលក្ខណៈតំណពូជ(Familial hypercholesterolemia)។

ថ្នាំលេប：

មនុស្សពេញវ័យ：លេប1ថ្ងៃ1ដង 5mg។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។ ករណីប្រសិទ្ធិភាពបញ្ចុះកម្រិតLDLមិនគ្រប់គ្រាន់ អាចបង្កើនកម្រិតដល់1ថ្ងៃ20mg។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・អ្នកដែលមានជំងឺថ្លើមធ្ងន់ធ្ងរ។

・ស្ត្រីមានផ្ទៃពោះ ស្ត្រីដែលអាចនឹងកំពុងមានផ្ទៃពោះ និង ស្ត្រីបំបៅដោះកូន។

・អ្នកដែលកំពុងប្រើប្រាស់ឱសថដូចខាងក្រោម ៖ Itraconazole, Miconazole, Atazanavir, Saquinavir mesilate, Telaprevir, Cobicistat, Ombitasvir/Paritaprevir/Ritonavir។

ជាគោលការណ៍ អ្នកជំងឺដូចខាងក្រោមនេះមិនគួរប្រើឱសថនេះទេ។ ប្រសិនបើចាំបាច់ត្រូវប្រើ ត្រូវតាមដានផលរំខានឱសថអោយបានដិតដល់។

・អ្នកដែលកំពុងប្រើប្រាស់ឱសថបញ្ចុះខ្លាញ់ក្នុងឈាមប្រភេទFibrates (Bezafibrateជាដើម) - អាចធ្វើអោយប៉ះពាល់ដល់មុខងារតម្រងនោមនិងបង្កអោយកើតមានជំងឺរលាយសាច់ដុំ(Rhabdomyolysis)។

ផលរំខានរួមមាន ឡើងកន្ទួលក្រហម រមាស់ ឈឺពោះ ក្អួតចង្អោរ រាករូសឬទល់លាមក ឈឺសាច់ដុំ អស់កម្លាំង ហើម ឈឺក្បាល អាការៈខ្វះឈាម ស្បែកងាយប្រតិកម្មទៅនឹងពន្លឺព្រះអាទិត្យ រលាកលំពែង។ល។

ប្រសិនបមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ឈឺសាច់ដុំ គ្មានកម្លាំង ទឹកនោមមានពណ៌ក្រហមត្នោត (ជំងឺរលាយសាច់ដុំ(Rhabdomyolysis) ជំងឺទាក់ទងនឹងសាច់ដុំ(Myopathy))

- រួយខ្លួន បាត់បង់ចំណង់អាហារ ភ្នែកនិងស្បែកប្រែពណ៌លឿង (រលាកថ្លើម មុខងារថ្លើមចុះខ្សោយ ខាន់លឿង)

- ស្ពឹកនិងឈឺនៅដៃជើង មិនសូវដឹងញាណនៅតាមដៃនិងជើង (ប៉ះពាល់ប្រព័ន្ធសរសៃប្រសាទនៅតាមអវៈយវៈ)

- ឈាមច្រមុះ ឈាមតាមអញ្ចាញធ្មេញ ឈាមក្រោស្បែកនៅដៃនិងជើង ក្ដៅខ្លួន (រោគសញ្ញានៃការថយចុះចំនួនប្លាកែត)

- ក្ដៅខ្លួន ក្អក ពិបាកដកដង្ហើម (ជំងឺរលាកសួតប្រភេទInterstitial pneumonia)

- ក្ដៅខ្លួន ឆាប់ហត់ ស្រកទម្ងន់ (រោគប្រតិកម្ម(ជំងឺLupus Erythematosus))

- ក្ដៅខ្លួន ឈឺសន្លាក់ មានស្នាមជាំពណ៌ស្វាយឬក្រហមនៅលើដៃនិងជើង (រោគប្រតិកម្ម(ជំងឺរលាកសរសៃឈាម))។

・ឱសថItraconazole, Miconazole, Atazanavir, Saquinavir mesilate, Telaprevir, Cobicistat, Ombitasvir/Paritaprevir/Ritonavir - អាចធ្វើអោយហានិភ័យនៃការកើតមានជំងឺរលាយសាច់ដុំ(Rhabdomyolysis)កើនឡើង។ ដូច្នេះ ហាមប្រើរួមគ្នា។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថបញ្ចុះខ្លាញ់ក្នុងឈាមប្រភេទFibrates (Bezafibrateជាដើម) - អាចធ្វើអោយប៉ះពាល់ដល់មុខងារតម្រងនោមនិងបង្កអោយកើតមានជំងឺរលាយសាច់ដុំ(Rhabdomyolysis)។

・ឱសថប្រឆាំងកំណកឈាមWarfarin - អាចធ្វើអោយសកម្មភាពនៃWarfarinកើនឡើងបន្តិចបន្តួច។

・ឱសថDanazol, ឱសថCiclosporin, ឱសថErythromycin, ឱសថClarithromycin, ឱសថប្រឆាំងវីរុសហ៊ីវប្រភេទHIV protease inhibitors (Ritonavirជាដើម), ឱសថNicotinic acid - អាចធ្វើអោយប៉ះពាល់ដល់មុខងារតម្រងនោមនិងបង្កអោយកើតមានជំងឺរលាយសាច់ដុំ(Rhabdomyolysis)។

・ឱសថEfavirenz - អាចធ្វើអោយកំហាប់ក្នុងឈាមនៃSimvastatinថយចុះ។

・ឱសថAmiodarone, ឱសថAmlodipine, ឱសថVerapamil, ឱសថDiltiazem, ឱសថGrazoprevir, ក្រូចថ្លុង - អាចធ្វើអោយកំហាប់ក្នុងឈាមនៃSimvastatinកើនឡើង បង្កជាផលរំខានផ្សេងៗ។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនត្រូវប្រើប្រាស់ឱសថនេះទេ ព្រោះអាចប៉ះពាល់ដល់ទារកក្នុងផ្ទៃ។

・ស្ត្រីបំបៅដោះកូន មិនត្រូវប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・ការប្រើប្រាស់ឱសថនេះគឺសម្រាប់អ្នកដែលបានអនុវត្តការគ្រប់គ្រងរបបអាហារនិងលំហាត់ប្រាណសមស្របហើយប៉ុន្តែនៅមិនអាចទទួលបានប្រសិទ្ធិភាពគ្រប់គ្រាន់ក្នុងការគ្រប់គ្រងជាតិខ្លាញ់ក្នុងឈាមតែប៉ុណ្ណោះ។ ម្យ៉ាងទៀត អ្នកជំងឺគួរបន្តអនុវត្តការគ្រប់គ្រងរបបអាហារនិងលំហាត់ប្រាណអោយបានសមស្រប ស្របពេលជាមួយនឹងការប្រើប្រាស់ឱសថនេះ ព្រមទាំងគួរកាត់បន្ថយការជក់បារីនិងព្យាបាលជំងឺលើសសម្ពាធឈាមផងដែរ ដើម្បីបង្ការការកើតមានជំងឺត្បៀតឬស្ទះសរសៃឈាមបេះដូង។

・ដំណើរការនៃការផលិតកូឡេស្តេរ៉ូលនៅក្នុងរាងកាយច្រើនមានសកម្មភាពខ្លាំងនៅពេលយប់ ដូច្នេះ ជាទូទៅ អ្នកជំងឺគួរប្រើប្រាស់ឱសថនេះនៅពេលល្ងាចដើម្បីបង្កើនប្រសិទ្ធិភាពទប់ស្កាត់ការផលិតកូឡេស្តេរ៉ូលនៅក្នុងរាងកាយនៅពេលយប់។

・សារធាតុនៅក្នុងក្រូចថ្លុងអាចធ្វើអោយកំហាប់ក្នុងឈាមនៃឱសថនេះកើនឡើងបង្កជាផលរំខានផ្សេងៗ ដូច្នេះ គួរចៀសវាងពិសាក្រូចថ្លុងក្នុងអំឡុងពេលប្រើប្រាស់ឱសថនេះ។

・បច្ចុប្បន្ននេះ ឱសថស្តាទីនជាឱសថដែលមានប្រសិទ្ធិភាពបញ្ចុះកម្រិតកូឡេស្តេរ៉ូលខ្លាំងជាងគេ។ សម្រាប់អ្នកដែលឆាប់ អាចដឹងប្រសិទ្ធិភាពក្រោយប្រើអស់រយៈពេល1សប្ដាហ៍ ប៉ុន្តែ ភាគច្រើនគេអាចដឹងពីប្រសិទ្ធិភាពឱសថនេះក្រោយរយៈពេល4～8សប្ដាហ៍។

ឱសថនេះមានប្រសិទ្ធិភាពបង្អាក់សកម្មភាពរបស់អង់ស៊ីមHMG-CoA reductaseដែលជាអង់ស៊ីមមានតួនាទីនៅក្នុងការសំយោគសារធាតុកូឡេស្តេរ៉ូលនៅក្នុងថ្លើមនិងពោះវៀនតូច។ ម្យ៉ាងទៀត ដោយសារបរិមាណកូឡេស្តេរ៉ូលនៅក្នុងថ្លើមថយចុះ ធ្វើអោយសកម្មភាពនៃគ្រឿងទទួលLDLកើនឡើង ដើម្បីបង្កើនការស្រូបសារធាតុកូឡេស្តេរ៉ូលដែលភ្ជាប់ជាមួយម៉ូលេគុលLDL (LDL-Cholesterolឬកូឡេស្តេរ៉ូលអាក្រក់)ពីក្នុងឈាមចូលទៅក្នុងថ្លើម។ ជាលទ្ធផល ឱសថនេះអាចបញ្ចុះកម្រិតកូឡេស្តេរ៉ូលនៅក្នុងឈាមបានយ៉ាងឆាប់រហ័ស។