Povidone-iodine

ករណីថ្នាំខ្ពុរមាត់：

ជាទូទៅ ឱសថនេះប្រើនៅក្នុងការសម្លាប់មេរោគនៅក្នុងមាត់ ដើម្បីព្យាបាលដំបៅក្នុងមាត់ រលាកបំពង់ក រលាកក្រពេញអាមីដាល់ និង ដើម្បីបង្ការការឆ្លងមេរោគនៅពេលមានរបួសក្នុងមាត់ដូចជាពេលដកធ្មេញ។

ករណីថ្នាំប្រើលើស្បែកជាដើម：

ជាទូទៅ ឱសថនេះប្រើនៅក្នុងការសម្លាប់មេរោគ：

- នៅលើស្បែកឬភ្នាសនៅពេលវះកាត់

- នៅលើស្បែកឬភ្នាសដែលមានរបួសឬដំបៅ

- នៅលើស្បែកដែលរលាកដោយសារកម្ដៅ

- នៅលើស្បែកដែលឆ្លងមេរោគ

- នៅលើស្បែកដែលមានបញ្ហាដោយសារការគេងសង្កត់រយៈពេលយូរ(Bedsore)

- នៅលើដៃ

- នៅក្នុងទ្វារមាសនិងបរិវេណប្រដាប់ភេទស្ត្រី នៅពេលស្ត្រីសម្រាលកូន និង នៅពេលត្រូវពិនិត្យទ្វារមាស។

សម្គាល់：គេបែងចែកឱសថនេះទៅតាមភាគរយនៃសារធាតុថ្នាំនិងផ្នែកនៃរាងកាយដែលអាចប្រើលើបាន ដូច្នេះ សូមពិនិត្យមើលការណែនាំសម្រាប់ឱសថនីមួយៗអោយបានច្បាស់លាស់។

ករណីថ្នាំខ្ពុរមាត់(7%)：

ពង្រាវ15~30ដង (ប្រើទឹកប្រមាណ60mLសម្រាប់ឱសថ2~4mL) រួចខ្ពុរក្នុងមាត់ច្រើនដងក្នុង1ថ្ងៃ។

ករណីថ្នាំលាបលើស្បែក(10%)：

លាបនៅលើស្បែកឬភ្នាសដែលមានរបួសនិងស្បែកដែលរលាកដោយសារកម្ដៅ ក្នុងបរិមាណសមស្រប។

ករណីថ្នាំលាបលើស្បែក(ប្រភេទលាយជាមួយស្ករស)：

លាបនៅលើស្បែកដែលមានបញ្ហាដោយសារការគេងសង្កត់រយៈពេលយូរ(Bedsore) ស្បែកដែលមានដំបៅដោយសារការរលាកក្ដៅ និង ស្បែកដែលមានដំបៅនៅជើង ក្នុងបរិមាណសមស្រប។

ករណីថ្នាំទឹក(10%)：

ឱសថនេះប្រើនៅក្នុងការសម្លាប់មេរោគ：

- នៅលើស្បែកឬភ្នាសនៅពេលវះកាត់

- នៅលើស្បែកឬភ្នាសដែលមានរបួសឬដំបៅ

- នៅលើស្បែកដែលរលាកដោយសារកម្ដៅ

- នៅលើស្បែកដែលឆ្លងមេរោគ។

លាបឱសថនេះនៅផ្នែកដែលត្រូវសម្លាប់មេរោគ។

ករណីថ្នាំទឹក(7.5%)：

- សម្លាប់មេរោគនៅម្រាមដៃនិងស្បែក: លាយជាមួយទឹកបន្តិច រួចឈ្លីអោយឡើងពពុះ ហើយលាងទឹកចេញ។

- សម្លាប់មេរោគនៅផ្នែកដែលត្រូវវះកាត់: ប្រើដោយផ្ទាល់ឬលាយជាមួយទឹកបន្តិច រួចឈ្លីអោយឡើងពពុះ ហើយប្រើស្បែសម្លាប់មេរោគរួចដើម្បីជូតសម្អាត។

ករណីថ្នាំទឹក(5%)：

សម្លាប់មេរោគនៅដៃ ដោយឈ្លីឱសថពេញបាតដៃ រហូតស្ងួត។

ករណីថ្នាំលាបប្រើក្នុងផ្នែករោគស្ត្រី(5%)：

សម្លាប់មេរោគនៅក្នុងទ្វារមាសនិងបរិវេណប្រដាប់ភេទស្ត្រី នៅពេលស្ត្រីសម្រាលកូន និង នៅពេលត្រូវពិនិត្យទ្វារមាស។ លាបនៅលើផ្នែកដែលត្រូវសម្លាប់មេរោគឬក្នុងទ្វារមាសរបស់ស្ត្រី។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះឬសារធាតុអ៊ីយ៉ូត។

ករណីប្រើលើស្បែករឺភ្នាសរឺដៃ：

ផលរំខានរួមមាន រមាស់ ក្ដៅក្រហាយ ឡើងកន្ទួលក្រហម អាការៈឈឺចាប់។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ពិបាកដកដង្ហើម អារម្មណ៍មិនស្រួលក្នុងខ្លួន ហើម (រោគប្រតិកម្មធ្ងន់ធ្ងរ)។

ករណីប្រើក្នុងមាត់：

ផលរំខានរួមមាន ចង់ក្អួត ក្រហាយក្នុងមាត់ ឡើងកន្ទួលក្រហម។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ពិបាកដកដង្ហើម អារម្មណ៍មិនស្រួលក្នុងខ្លួន ហើម (រោគប្រតិកម្មធ្ងន់ធ្ងរ)។

・ស្ត្រីកំពុងមានផ្ទៃពោះឬស្ត្រីបំបៅដោះកូន មិនគួរប្រើឱសថនេះក្នុងទំហំធំលើស្បែករយៈពេលយូរនោះទេ។

・ករណីប្រើលើស្បែកឬដៃ ប្រសិនបើត្រូវសម្អាតស្បែកដោយប្រើសាប៊ូមុនពេលប្រើឱសថនេះ សូមលាងជម្រះសាប៊ូចេញអោយអស់ជាមុនសិន ព្រោះប្រសិនបើនៅសល់សាប៊ូ នោះប្រសិទ្ធិភាពសម្លាប់មេរោគនឹងថយចុះ។

・ករណីប្រើនៅក្នុងមាត់ សារធាតុថ្នាំអាចជាប់នឹងធ្មេញសិប្បនិម្មិតធ្វើអោយប្រែពណ៌ធ្មេញ។ ម្យ៉ាងទៀត ករណីប្រើក្រោយពេលដកធ្មេញជាដើម មិនគួរខ្ពុរមាត់ខ្លាំងពេកទេ ព្រោះអាចធ្វើអោយឈាមក្រកក។

・ករណីមានផ្ទុកសារធាតុអេតាណុល(ប្រើសម្លាប់មេរោគនៅលើដៃជាដើម) មិនត្រូវប្រើនៅលើស្បែកឬភ្នាសដែលមានរបួសនោះទេ ព្រោះអាចធ្វើអោយផ្សាខ្លាំង។

・ករណីប្រើនៅលើទ្វារមាសស្ត្រីនៅពេលសម្រាលកូន ត្រូវលាងសម្អាតថ្នាំដែលនៅប្រឡាក់ជាប់លើទារកចេញអោយបានឆាប់រហ័ស ជាពិសេសត្រង់ភ្នែក។

・ប្រសិនបើអ្នកជំងឺត្រូវប្រើឱសថនេះរយៈពេលយូរនិងក្នុងបរិមាណច្រើន គួរតាមដានមុខងារក្រពេញទីរ៉ូអ៊ីតរបស់អ្នកជំងឺ។

ឱសថនេះមានផ្ទុកធាតុអ៊ីយ៉ូត(I2) ដែលធ្វើអុកស៊ីតកម្មជាមួយនឹងទឹកបង្កើតបានជាអ៊ីយ៉ុងH2OI＋ ដោយអ៊ីយ៉ុងនេះនឹងទៅភ្ជាប់ជាមួយនឹងប្រូតេអ៊ីនដែលមាននៅលើភ្នាសកោសិការបស់បាក់តេរីឬវីរុសដើម្បីកម្ចាត់មេរោគទាំងនោះ។