Magnesium sulfate hydrate

ករណីថ្នាំលេប：

ជាទូទៅ ឱសថនេះប្រើនៅក្នុងការបំបាត់អាការៈទល់លាមក។

ករណីថ្នាំចាក់：

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

- ជំងឺក្រួសទឹកប្រមាត់

- រោគសញ្ញានៃកម្រិតម៉ាញ៉េស្យូមក្នុងឈាមធ្លាក់ចុះទាប

- ជំងឺចង្វាក់បេះដូងញាប់ខុសប្រក្រតី (Tachycardia)

- រោគសញ្ញាEclampsia

- បង្ការនិងព្យាបាលរោគសញ្ញាEclampsiaនៅក្នុងជំងឺសម្ពាធឈាមកើនឡើងខ្ពស់ក្នុងអំឡុងពេលមានផ្ទៃពោះ

- ទប់ស្កាត់ការកន្ត្រាក់នៃស្បូននៅក្នុងជំងឺទារកកើតមុនខែ(Threatened premature labor)

- បំពេញបន្ថែមនៅក្នុងសេរ៉ូមអេឡិចត្រូឡាយ។

ករណីថ្នាំលេប：

លេប 1ដង5～15g ពិសារជាមួយទឹកអោយបានច្រើន។

ករណីថ្នាំចាក់：

・ករណីជំងឺក្រួសទឹកប្រមាត់：

ប្រើជាសូលុយស្យុងកំហាប់ 20～50% បរិមាណ 20～50mL ដោយប្រើឱសថនេះជាមួយឧបករណ៍ Duodenal tube។

・ករណីរោគសញ្ញានៃកម្រិតម៉ាញ៉េស្យូមក្នុងឈាមធ្លាក់ចុះទាប：

មនុស្សពេញវ័យ：ប្រើ1ថ្ងៃ2～4g បែងចែកជាច្រើនដងក្នុង1ថ្ងៃ ចាក់តាមសាច់ដុំឬចាក់តាមសរសៃវ៉ែនដោយល្បឿនយឺតបំផុត និង បន្តប្រើរហូតដល់កម្រិតម៉ាញ៉េស្យូម(Mg)ក្នុងឈាមត្រឡប់មកភាពប្រក្រតីវិញ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

・ករណីជំងឺចង្វាក់បេះដូងញាប់ខុសប្រក្រតី (Tachycardia)：

ប្រើជាសូលុយស្យុងកំហាប់ 20ឬ25% ចាក់តាមសរសៃវ៉ែនក្នុងល្បឿនយឺតៗ ដោយមិនត្រូវប្រើលើសពីកម្រិត2.5gនោះទេ។

・ករណីរោគសញ្ញាEclampsia：

ប្រើជាសូលុយស្យុងកំហាប់ 10～25% ដោយប្រើ1ដង10～20mL ចាក់ក្នុងសាច់ដុំឬចាក់តាមសរសៃវ៉ែនក្នុងល្បឿនយឺតៗ ដោយមិនត្រូវប្រើលើសពីកម្រិត2.5gនោះទេ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា ប៉ុន្តែ ត្រូវប្រុងប្រយ័ត្ននៅពេលបង្កើនកម្រិតប្រើប្រាស់។ករណីប្រើនៅក្នុងការបង្ការនិងព្យាបាលរោគសញ្ញាEclampsiaនៅក្នុងជំងឺសម្ពាធឈាមកើនឡើងខ្ពស់ក្នុងអំឡុងពេលមានផ្ទៃពោះ：

នៅលើកដំបូង ប្រើក្នុងកម្រិត4g ចាក់បញ្ចូលតាមសរសៃវ៉ែនដោយប្រើរយៈពេលយ៉ាងហោចណាស់20នាទី។ បន្ទាប់ពីនោះ ប្រើក្នុងកម្រិត 1g រៀងរាល1ម៉ោងម្ដង ដោយបញ្ចូលតាមសរសៃវ៉ែនជាប់បន្តឥតដាច់។ អាចបង្កើនកម្រិតប្រើប្រាស់ម្ដង0.5g រៀងរាល1ម៉ោងម្ដង។ កម្រិតអតិបរមាប្រើក្នុង1ម៉ោងគឺ2g។ ត្រូវប្រើឱសថនេះជាមួយឧបករណ៍បញ្ចូលឱសថជាប់ឥតដាច់ (Continuous infusion pump) លើកលែងតែនៅពេលប្រើលើកដំបូង។

・ករណីប្រើនៅក្នុងការទប់ស្កាត់ការកន្ត្រាក់នៃស្បូននៅក្នុងជំងឺទារកកើតមុនខែ(Threatened premature labor)：

នៅលើកដំបូង ប្រើក្នុងកម្រិត4g ចាក់បញ្ចូលតាមសរសៃវ៉ែនដោយប្រើរយៈពេលយ៉ាងហោចណាស់20នាទី។ បន្ទាប់ពីនោះ ប្រើក្នុងកម្រិត 1g រៀងរាល1ម៉ោងម្ដង ដោយបញ្ចូលតាមសរសៃវ៉ែនជាប់បន្តឥតដាច់។ ករណីនៅមិនអាចទប់ស្កាត់ការកន្ត្រាក់នៃស្បូន អាចបង្កើនកម្រិតប្រើប្រាស់ម្ដង0.5g រៀងរាល1ម៉ោងម្ដង។ កម្រិតអតិបរមាប្រើក្នុង1ម៉ោងគឺ2g។ ក្រោយការកន្ត្រាក់ស្បូនថយចុះ ត្រូវបន្ថយកម្រិតប្រើប្រាស់បន្តិចម្ដងៗ រហូតដល់បញ្បប់ការប្រើប្រាស់នៅពេលសង្កេតឃើញគ្មានការកន្ត្រាក់ស្បូនទៀត។ ត្រូវប្រើឱសថនេះជាមួយឧបករណ៍បញ្ចូលឱសថជាប់ឥតដាច់ (Continuous infusion pump) លើកលែងតែនៅពេលប្រើលើកដំបូង។

・ករណីប្រើក្នុងការបំពេញបន្ថែមនៅក្នុងសេរ៉ូមអេឡិចត្រូឡាយ： ត្រូវប្រើដោយបន្ថែមឱសថនេះទៅក្នុងសេរ៉ូមសម្រាប់បំពេញសារធាតុអេឡិចត្រូឡាយ ទៅតាមកម្រិតជាតិទឹកនិងកម្រិតនៃកង្វះសារធាតុអេឡិចត្រូឡាយរបស់អ្នកជំងឺ។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- អារម្មណ៍ក្ដៅក្នុងខ្លួន សម្ពាធឈាមធ្លាក់ចុះ មិនអាចដកដង្ហើមបាន (លើសកម្រិតម៉ាញ៉េស្យូមក្នុងឈាមធ្ងន់ធ្ងរ)។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថRitodrine hydrochloride - អាចធ្វើអោយកម្រិតCK(CPK)កើនឡើង។

・ឱសថប្រឆាំងមេរោគប្រភេទNew quinolone (Ciprofloxacin, Norfloxacin, Tosufloxacin), ឱសថប្រឆាំងមេរោគប្រភេទTetracycline(

Minocycline, Doxycycline, Tetracycline ជាដើម), ឱសថEtidronate disodium, ឱសថPenicillamine, ឱសថCefdinir - អាចធ្វើអោយប្រសិទ្ធិភាពនៃឱសថទាំងនេះថយចុះ ដូច្នេះគួរទុកគម្លាតពីគ្នានៅពេលប្រើប្រាស់រួមគ្នា។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ ព្រោះសារធាតុឱសថអាចឆ្លងកាត់សុកធ្វើអោយប៉ះពាល់ដល់ទារក។

ករណីថ្នាំលេប：

・ប្រើចំពោះអាការៈទល់លាមកដែលកើតឡើងភ្លាមៗ(ម្ដងម្កាល)។

・ត្រូវពិសារទឹកអោយបានច្រើន។ មិនអាចប្រើចំពោះអ្នកដែលមានមុខងារតម្រងនោមចុះខ្សោយនោះទេ។ គេអាចសម្រួលពេលវេលានៃការបង្ហាញប្រសិទ្ធិភាពរបស់ឱសថនេះ ដោយផ្លាស់ប្ដូរកំហាប់នៃឱសថ(3～4%→2～3ម៉ោង, 10～20%→6～12ម៉ោង,)។

ឱសថនេះនឹងផ្ដល់ជាអ៊ីយ៉ុងម៉ាញ៉េស្យូមដែលមានតួនាទីនៅក្នុងប្រតិកម្មផ្សេងៗនៃរាងកាយ។ ម្យ៉ាងទៀត ឱសថនេះមានប្រសិទ្ធិភាពទប់ស្កាត់ការស្រូបជាតិទឹកពីពោះវៀន ធ្វើអោយជាតិទឹកនៅក្នុងពោះវៀនកើនឡើង ដើម្បីជម្រុញការបន្ទោរបង់លាមក។