Interferon alfa-2b

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

- ព្យាបាលរោគសញ្ញានៃវីរុសកើនឡើងក្នុងឈាមនៅក្នុងជំងឺរលាកថ្លើមរ៉ាំរ៉ៃប្រភេទC ចំពោះអ្នកជំងឺដូចខាងក្រោម：

1. ករណីប្រើឱសថនេះតែឯង

(1) អ្នកដែលមិនមានរោគសញ្ញានៃHCV RNAកើនឡើងខ្ពស់នៅក្នុងឈាម។

2. ករណីប្រើរួមជាមួយឱសថRibavirin

(1) អ្នកដែលមានរោគសញ្ញានៃHCV RNAកើនឡើងខ្ពស់នៅក្នុងឈាម។

(2) អ្នកដែលមិនទទួលបានប្រសិទ្ធិភាពពីការព្យាបាលដោយប្រើឱសថអ៊ីនតាហ្វេរ៉ុន(Interferon)តែឯង ឬ អ្នកដែលមានរោគសញ្ញារើឡើងវិញម្ដងទៀតបន្ទាប់ពីការព្យាបាលដោយប្រើឱសថអ៊ីនតាហ្វេរ៉ុន(Interferon)តែឯង។

- ព្យាបាលរោគសញ្ញានៃវីរុសកើនឡើងក្នុងឈាមនៅក្នុងជំងឺរលាកថ្លើមរ៉ាំរ៉ៃប្រភេទBដំណាក់កាលសកម្ម ដែលគេពិនិត្យឃើញមានអង់ទីសែនHBeវិជ្ជមាននិងអង់ស៊ីមDNA polymeraseវិជ្ជមាន។

- ជំងឺមហារីកតម្រងនោម ជំងឺមហារីកខួរឆ្អឹងប្រភេទMultiple myeloma ជំងឺមហារីកគ្រាប់ឈាមសប្រភេទខួរឆ្អឹងលក្ខណៈរ៉ាំរ៉ៃ(Chronic myelogenous leukemia)។

សូមពិនិត្យព័ត៌មានលម្អិតនៅក្នុងបរិយាយប័ណ្ណនៃឱសថនីមួយៗ។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ ឬ ឱសថអ៊ីនតាហ្វេរ៉ុន(Interferon)ផ្សេងទៀត។

・អ្នកដែលធ្លាប់កើតមានរោគប្រតិកម្មជាមួយនឹងឱសថជីវៈ រួមមាន វ៉ាក់សាំង ជាដើម។

・អ្នកដែលកំពុងប្រើប្រាស់ឱសថឫសឈើឈ្មោះ Sho-saiko-to។

・អ្នកដែលមានជំងឺរលាកថ្លើមដោយសារបញ្ហាប្រព័ន្ធភាពស៊ាំប្រឆាំងខ្លួនឯង(Autoimmune hepatitis)។

ផលរំខានរួមមាន ក្ដៅខ្លួន អស់កម្លាំង បាត់បង់ចំណង់អាហារ ឈឺក្បាល ឈឺសាច់ដុំ ឈឺសន្លាក់ គេងមិនលក់ ជ្រុះរោមឬសក់ ឡើងកន្ទួលក្រហម រលាកលំពែង(ឈឺពោះ ឈឺផ្នែកចង្កេះនិងខ្នង) រងាញាក់ អស់កម្លាំង ចុះទម្ងន់ ។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ក្ដៅខ្លួន ក្អកស្ងួត ពិបាកដកដង្ហើម (រលាកសួតប្រភេទInterstitial pneumonia ក្រិនសួត ទឹកដក់ក្នុងសួត)

- គេងមិនលក់ អារម្មណ៍មិនស្ងប់ អន្ទះអន្ទែង (ជំងឺបាក់ទឹកចិត្ត អារម្មណ៍ចង់សម្លាប់ខ្លួន អារម្មណ៍រីករាយខ្លាំងខុសប្រក្រតី ងាយប្រើអំពើហឹង្សា)

- ស្ងួតក ផឹកទឹកច្រើន នោមច្រើន (ទឹកនោមផ្អែម)

- បែកញើស បាត់បង់ចំណង់អាហារ អាការៈខ្វះឈាម (រោគសញ្ញាដែលទាក់ទងនឹងប្រព័ន្ធភាពស៊ាំប្រឆាំងនឹងខ្លួនឯង រួមមាន ជំងឺមុខងារក្រពេញទីរ៉ូអ៊ីតខុសប្រក្រតី រលាកថ្លើម ជំងឺខ្វះឈាមប្រភេទHemolytic anemia ជាដើម)

- អស់កម្លាំង បាត់បង់ចំណង់អាហារ ចង់ក្អួត (បញ្ហាថ្លើមធ្ងន់ធ្ងរ)។

- ឈាមច្រមុះ ឈាមតាមអញ្ចាញធ្មេញ ឈាមក្រោមស្បែកនៅតាមដៃជើង ក្ដៅខ្លួន ឈឺបំពង់ក (រោគសញ្ញានៃការថយចុះចំនួនគ្រាប់ឈាមឬចំនួនប្លាកែត)

- លាមកមានឈាម (ហូរឈាមនៅប្រដាប់រំលាយអាហារ)

- វង្វេងវង្វាន់ មើលឃើញរូបភាពឬលឺសម្លេងដែលមិនមានពិត (បញ្ហាស្មារតី)

- ភ្នែកមើលឃើញមិនសូវច្បាស់ មានចំណុចខ្មៅនៅក្នុងគំហើញ (ជំងឺរេទីន)

- ក្តៅខ្លួន ស្នាមក្រហមលើស្បែក ភ្នែកក្រហម (ជំងឺនៃបណ្តុំរោគសញ្ញាលើស្បែកភ្នាសនិងភ្នែក(Muco-cutaneo-ocular syndrome ឬ StevensJohnson syndrome) ជំងឺស្លាប់កោសិកាស្បែក(TEN))

- ឈឺសាច់ដុំដៃនិងជើង ស្ពឹករឹង ទឹកនោមមានពណ៌ក្រហមត្នោត ( ជំងឺRhabdomyolysis)។

・ឱសថឫសឈើឈ្មោះSho-saiko-to - អាចធ្វើអោយកើតមានជំងឺរលាកសួតប្រភេទInterstitial pneumonia។ ដូច្នេះ ហាមប្រើរួមគ្នា។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថដែលទទួលប្រតិកម្មពីអង់ស៊ីមCYP1A2(ឱសថTheophylline, ឱសថTizanidine ជាដើម) - អាចធ្វើអោយកំហាប់ក្នុងឈាមនៃឱសថទាំងនេះកើនឡើង។

・ឱសថដែលទទួលប្រតិកម្មពីអង់ស៊ីមCYP2D6(ឱសថMetoprolol, ឱសថAmitriptyline ជាដើម) - អាចធ្វើអោយកំហាប់ក្នុងឈាមនៃឱសថទាំងនេះកើនឡើង។

・ឱសថAntipyrine, ឱសថWarfarin - អាចធ្វើអោយកំហាប់ក្នុងឈាមនៃឱសថទាំងនេះកើនឡើង។

・ឱសថZidovudine - អាចធ្វើអោយប៉ះពាល់ដល់មុខងារផលិតគ្រាប់ឈាមនៃខួរឆ្អឹង។

・ការព្យាបាលដោយទប់ស្កាត់សកម្មភាពនៃប្រព័ន្ធភាពស៊ាំ - អាចធ្វើអោយប្រសិទ្ធិភាពនៃការព្យាបាលថយចុះ។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។ ករណីប្រើរួមជាមួយឱសថRibavirin ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនត្រូវប្រើឱសថនេះទេ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・នៅក្នុងការប្រើប្រាស់ឱសថនេះ ត្រូវប្រុងប្រយ័ត្នចំពោះផលប៉ះពាល់ធ្វើអោយកើតមានជំងឺរលាកសួតប្រភេទ Interstitial pneumonia ឬ ធ្វើអោយអ្នកជំងឺកើតមានអារម្មណ៍ចង់សម្លាប់ខ្លួន។

・ជាទូទៅ ឱសថនេះជាថ្នាំប្រភេទកកស្ងួត សម្រាប់ប្រើនៅក្នុងការព្យាបាលជំងឺរលាកថ្លើមរ៉ាំរ៉ៃប្រភេទC ជំងឺរលាកថ្លើមរ៉ាំរ៉ៃប្រភេទBដំណាក់កាលកើតមានអាការៈ ជំងឺមហារីកតម្រងនោម ជំងឺមហារីកកោសិកាផ្លាស្មានៃខួរឆ្អឹង(Multiple myeloma, MM) ជំងឺមហារីកគ្រាប់ឈាសប្រភេទខួរឆ្អឹងលក្ខណៈរ៉ាំរ៉ៃ (Chronic myelogenous leukemia, CML)។

ឱសថនេះមានប្រសិទ្ធិភាពដូចខាងក្រោម៖

- បង្កើនសកម្មភាពនៃអង់ស៊ីម2-5AS និង បំបាត់HCV RNAនៅក្នុងឈាម។

- បង្កើនសកម្មភាពនៃកោសិកាNK(Natural killer)និងកោសិកាម៉ាក្រូហ្វាច(Macrophage)នៃប្រព័ន្ធភាពស៊ាំ ដើម្បីប្រឆាំងនឹងកោសិកាមហារីក។