Idarubicin hydrochloride

  • Pharmaceuticals and Medical Devices Agency នៃប្រទេសជប៉ុន (PMDA)

  • Pharmaceuticals and Medical Devices Agency នៃប្រទេសជប៉ុន (PMDA)

    ប្រភេទឱសថ

    • ប្រសិទ្ធិភាពព្យាបាល
    • កម្រិតប្រើប្រាស់
    • ហាមប្រើ
    • ផលរំខាន
    • អន្តរប្រតិកម្ម
    • ស្ត្រីមានផ្ទៃពោះ និង ស្ត្រីបំបៅដោះកូន
    • ការប្រុងប្រយ័ត្នជាពិសេស
    • សកម្មភាពឱសថ

    • ប្រសិទ្ធិភាពព្យាបាល

      ជាទូទៅ ឱសថនេះប្រើនៅក្នុងការព្យាបាលជំងឺមហារីកគ្រាប់ឈាមសប្រភេទកោសិកាខួរឆ្អឹងលក្ខណៈស្រួចស្រាវ (Acute myelocytic leukemia, AML) រួមទាំង ដំណាក់កាលស្រួចស្រាវនៃជំងឺមហារីកគ្រាប់ឈាមសខួរឆ្អឹងលក្ខណៈរ៉ាំរ៉ៃ។

    • កម្រិតប្រើប្រាស់

      ថ្នាំចាក់：

      មនុស្សពេញវ័យ：ប្រើ1ថ្ងៃ1ដង12mg/m2 (ផ្ទៃក្រឡារាងកាយ) ចាក់តាមសរសៃវ៉ែន រយៈពេល3ថ្ងៃជាប់គ្នា។ បន្ទាប់ពីនោះ ផ្អាកការប្រើប្រាស់រហូតដល់មុខងារផលិតគ្រាប់ឈាមរបស់ខួរឆ្អឹងត្រឡប់មកប្រក្រតីវិញ។ អនុវត្តការបែបនេះម្ដងហើយម្ដងទៀត។

    • ហាមប្រើ

      ・អ្នកដែលធ្លាប់មានរោគប្រតិកម្មធ្ងន់ធ្ងរជាមួយនឹងសារធាតុនៅក្នុងឱសថនេះ។

      ・អ្នកដែលកំពុងឬធ្លាប់មានបញ្ហាទាក់ទងនឹងមុខងារបេះដូង។

      ・អ្នកដែលកំពុងកើតមានជំងឺឆ្លងកម្រិតធ្ងន់ធ្ងរ។

      ・អ្នកដែលកំពុងទទួលការព្យាបាលដោយប្រើឱសថប្រឆាំងមហារីកដែលផ្ដល់ផលប៉ះពាល់ដល់បេះដូង (ឱសថប្រភេទAnthracyclineផ្សេងទៀតជាដើម) ដល់កម្រិតអតិបរមា (ឧទាហរណ៍ ចំពោះឱសថEpirubicin hydrochloride កម្រិតអតិបរមាគឺ900mg/m2នៃផ្ទៃក្រឡារាងកាយ ហើយចំពោះឱសថDaunorubicin hydrochloride កម្រិតអតិបរមាគឺ25mg/kgនៃទម្ងន់រាងកាយ)។

      ・អ្នកដែលមានបញ្ហាថ្លើមធ្ងន់ធ្ងរ។

      ・អ្នកដែលមានបញ្ហាតម្រងនោមធ្ងន់ធ្ងរ។

    • ផលរំខាន

      ផលរំខានរួមមាន គ្រាប់ឈាមថយចុះ កើតជំងឺឆ្លង ក្អួត ចង្អោរ មិនឃ្លានអាហារ រាករូស រលាកក្នុងមាត់(ពងបែកក្នុងមាត់) ក្ដៅខ្លួន ជ្រុះរោមឬសក់។ល។

      ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

      - ឈឺទ្រូង ដង្ហក់ ហើមពេញខ្លួន (ប៉ះពាល់សាច់ដុំបេះដូង)

      - អាការៈខ្វះឈាម ក្ដៅខ្លួន ងាយហូរឈាម (ប៉ះពាល់មុខងារផលិតគ្រាប់ឈាមរបស់ខួរឆ្អឹង)

      - អាការៈរលាកក្នុងមាត់ធ្ងន់ធ្ងរ

      - សម្ពាធឈាមធ្លាក់ចុះ ពិបាកដកដង្ហើម ក្រហមស្បែក (អាការៈប្រតិកម្មធ្ងន់ធ្ងរ(Shock))

      - រោគសញ្ញានៃជំងឺចង្វាក់បេះដូងខុសប្រក្រតីលក្ខណៈស្ទះការចម្លងសញ្ញារវាងថតលើនិងថតក្រោមនៃបេះដូងទាំងស្រុង (Complete atrioventricular block)។

    • អន្តរប្រតិកម្ម

      ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

      ・ឱសថប្រឆាំងមហារីកដែលផ្ដល់ផលប៉ះពាល់ដល់បេះដូង (ឱសថប្រភេទAnthracycline) - អាចផ្ដល់ផលប៉ះពាល់ដល់សាច់ដុំបេះដូង។

      ・ការប្រើវិទ្យុសកម្មទៅលើផ្នែកបេះដូងឬផ្នែកកណ្ដាលទ្រូង(Mediastinum)នៅមុនពេលប្រើឱសថIdarubicin - អាចផ្ដល់ផលប៉ះពាល់ដល់សាច់ដុំបេះដូង។

      ・ឱសថប្រឆាំងមហារីកផ្សេងទៀតឬការព្យាបាលដោយវិទ្យុសកម្ម - អាចធ្វើអោយផលរំខានទាក់ទងនឹងខួរឆ្អឹងកើនឡើង។

    • ស្ត្រីមានផ្ទៃពោះ និង ស្ត្រីបំបៅដោះកូន

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនគួរប្រើឱសថនេះទេ ព្រោះអាចប៉ះពាល់ដល់ទារកក្នុងផ្ទៃ។

      ・ស្ត្រីបំបៅដោះកូន មិនគួរប្រើប្រាស់ឱសថនេះទេ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

    • ការប្រុងប្រយ័ត្នជាពិសេស

      ・ការប្រើឱសថនេះត្រូវស្ថិតក្រោមការគ្រប់គ្រងម៉ត់ចត់ពីវេជ្ជបណ្ឌិតដែលមានបទពិសោធន៍ច្រើនក្នុងការព្យាបាលជំងឺមហារីកគ្រាប់ឈាមស។

      ・ត្រូវប្រុងប្រយ័ត្នចំពោះការកើតមានផលរំខានធ្ងន់ធ្ងរប៉ះពាល់ដល់ខួរឆ្អឹងឬបេះដូងរបស់ឱសថនេះ ព្រោះវាអាចបង្កគ្រោះថ្នាក់ដល់ជីវិតរបស់អ្នកជំងឺ។

    • សកម្មភាពឱសថ

      ឱសថនេះមានលក្ខណៈងាយរលាយក្នុងខ្លាញ់ ធ្វើអោយឱសថនេះអាចចូលទៅក្នុងកោសិកាមហារីកបានយ៉ាងឆាប់រហ័ស។ ឱសថនេះនឹងភ្ជាប់ទៅនឹងម៉ូលេគុលDNA រួចរារាំងសកម្មភាពរបស់អង់ស៊ីមDNA Polymerase។ ម្យ៉ាងទៀត ឱសថនេះនឹងកាត់ផ្ដាច់ច្រវាក់DNAដោយសកម្មភាពរារាំងអង់ស៊ីមTopoisomerase IIផងដែរ។

*ព័ត៌មានឱសថត្រូវបានរៀបរៀងដោយ អ៊ីម៉ាតុគឹ មេឌីក (ខេមបូឌា) ដោយផ្អែកលើប្រភពព័ត៌មានខាងក្រោម។ សម្រាប់ព័ត៌មានលម្អិត សូមស្វែងរកនៅក្នុងក្រដាសព័ត៌មាននៃឱសថនីមួយៗ ឬ សាកសួរទៅកាន់ក្រុមហ៊ុនឱសថឬតំណាងចែកចាយនៃឱសថនីមួយៗ។

ប្រភពព័ត៌មាន៖

- ក្រដាសព័ត៌មាននៃឱសថសម្រាប់អ្នកជំនាញវេជ្ជសាស្ត្រដែលប្រើប្រាស់នៅប្រទេសជប៉ុន (Pharmaceutical and Medical Devices Agency, Pmda): https://www.pmda.go.jp

- ព័ត៌មានសង្ខេបនៃឱសថសម្រាប់អ្នកជំងឺដែលប្រើប្រាស់នៅប្រទេសជប៉ុន: http://www.rad-ar.or.jp

ត្រឡប់ទៅទំព័រដើម ត្រឡប់ទៅការប្រើប្រាស់ឱសថនៅក្នុងការព្យាបាល