Hydrocortisone sodium succinate

ជាទូទៅ ឱសថនេះប្រើនៅក្នុងការព្យាបាលជំងឺដូចខាងក្រោម ៖

- ជំងឺទាក់ទងនឹងការបញ្ចេញអរម៉ូនក្នុងរាងកាយ (ជំងឺកើនឡើងខុសប្រក្រតីនៃអរម៉ូនក្រពេញទីរ៉ូអ៊ីត(Thyrotoxicosis), ជំងឺចុះខ្សោយមុខងារAdrenal cortexស្រួចស្រាវនិងរ៉ាំរ៉ៃ(Adrenocortical insufficiency), ជំងឺកង្វះACTH (Isolated ACTH deficiency))

- ជំងឺទាក់ទងនឹងភាពខុសប្រក្រតីនៃប្រព័ន្ធភាពស៊ាំ (ជំងឺរូម៉ាទីស(Rheumatism), ជំងឺអេរីតេម៉ាតូស(Lupus erythematosus))

- ជំងឺទាក់ទងនឹងរោគប្រតិកម្ម (ជំងឺហឺត, រោគប្រតិកម្មធ្ងន់ធ្ងរ(Anaphylactic shock), ជំងឺរលាកទងសួតលក្ខណៈហឺត(Asthmatic bronchitis), រោគប្រតិកម្មទល់នឹងឱសថឬសារធាតុគីមីផ្សេងៗ, កន្ទាលត្រអាក(លើកលែងករណីរ៉ាំរ៉ៃ))

- ជំងឺទាក់ទងនឹងប្រព័ន្ធសរសៃប្រសាទ (ជំងឺរលាកខួរក្បាលឬខួរឆ្អឹងខ្នង, ជំងឺខ្សោយការបញ្ជាលើសាច់ដុំធ្ងន់ធ្ងរ(Myasthenia gravis), ជំងឺរឹងនៅតាមសរសៃប្រសាទដោយសារខូចជាលិកាព័ទ្ធជុំវិញសរសៃប្រសាទ(Multiple sclerosis) ជាដើម)

- ជំងឺទាក់ទងនឹងប្រព័ន្ធរំលាយអាហារ (ជំងឺរលាកពោះវៀនមិនរាលដាល, ជំងឺរលាកពោះវៀនធំលក្ខណៈដំបៅ)

- ជំងឺទាក់ទងនឹងប្រព័ន្ធផ្លូវដង្ហើម (ជំងឺរលាកសួតប្រភេទInterstitial pneumoniaលក្ខណៈរាលដាល ជំងឺក្រិនសួត ជំងឺរលាកសួតដោយសារវិទ្យុសកម្ម)

- ជំងឺឆ្លងលក្ខណៈធ្ងន់ធ្ងរ

- ជំងឺកម្រិតជាតិស្ករក្នុងឈាមទាប(Idiopathic hypoglycemia)

- ជំងឺមហារីកផ្សេងៗ

- រោគសញ្ញាក្រោយពីការវះកាត់ក្រពេញអាដ្រេណាល់(Adrenal gland) ឬ ការវះកាត់ផ្លាស់ប្ដូរសរីរាង្គ ឬ ការបញ្ចូលឈាម

- ទប់ស្កាត់ការស្អិតជាប់នៃស្រទាប់ពោះនៅក្រោយពេលវះកាត់

- ពិសពស់ ពិសសត្វល្អិត

- អាការៈរលាកនៅក្រោយពេលវះកាត់ភ្នែក

- អាការៈរលាកឬឡើងកន្ទួលក្រហមលើស្បែកដោយសារជំងឺស្បែកផ្សេងៗ

- ជំងឺទាក់ទងនឹងត្រចៀកច្រមុះបំពង់ក (ជំងឺមេនីអេ(Meniere's disease or syndrome), ជំងឺថ្លង់ប្រភេទSensorineural hearing lossលក្ខណៈស្រួចស្រាវ, ជំងឺរលាកនិងហើមបំពង់ក, ជំងឺរលាកបំពង់អាហារ, ជំងឺរលាកច្រមុះដោយសាររោគប្រតិកម្ម, ជំងឺឃានវិញាណខុសប្រក្រតី, ជំងឺដំបៅមាត់និងរលាកអណ្ដាតដែលពិបាកព្យាបាល)។

សម្គាល់ ៖ ឱសថនេះអាចប្រើចំពោះជំងឺផ្សេងទៀតក្រៅអំពីជំងឺខាងលើផងដែរ។ ម្យ៉ាងទៀត វិធីប្រើប្រាស់ឱសថនិងផ្នែកនៃរាងកាយដែលត្រូវប្រើប្រែប្រួលទៅតាមប្រភេទជំងឺនីមួយៗខាងលើ។ សូមពិនិត្យមើលព័ត៌មានបន្ថែម។

សូមពិនិត្យព័ត៌មានលម្អិតនៅក្នុងបរិយាយប័ណ្ណនៃឱសថនីមួយៗ។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・មិនត្រូវចាក់ឱសថនេះចូលទៅក្នុងសន្លាក់ឬបរិវេណសរសៃកែងដែលកំពុងមានជំងឺឆ្លងមេរោគនោះទេ - ឱសថនេះធ្វើអោយប្រព័ន្ធភាពស៊ាំថយចុះ ដូចនេះ អ្នកជំងឺអាចនឹងមិនអាចទប់ទល់នឹងជំងឺឆ្លងទាំងនោះបាន។

・មិនត្រូវចាក់ឱសថនេះចូលទៅក្នុងសន្លាក់ដែលមិនមានលំនឹង(Flail joint)នោះទេ - អាចធ្វើអោយចលនារបស់សន្លាក់កាន់តែគ្មានលំនឹង។

・មិនត្រូវប្រើរួមជាមួយវ៉ាក់សាំងរស់(Live vaccine)ឬវ៉ាក់សាំងខ្សោយ(Attenuated vaccine)នោះទេ - ឱសថនេះធ្វើអោយប្រព័ន្ធភាពស៊ាំថយចុះ ដូចនេះ អ្នកជំងឺអាចនឹងមិនអាចទប់ទល់នឹងមេរោគដែលមិនទាន់ងាប់នៅក្នុងវ៉ាក់សាំងប្រភេទនេះបានទេ។

ជាគោលការណ៍ អ្នកជំងឺដូចខាងក្រោមមិនត្រូវប្រើប្រាស់ឱសថនេះទេ។ ករណីចាំបាច់ត្រូវប្រើ ត្រូវតាមដានស្ថានភាពជំងឺនិងផលរំខានឱសថអោយបានដិតដល់ ៖

1. អ្នកដែលកំពុងមានជំងឺឆ្លងដែលមិនទាន់រកឃើញវិធីព្យាបាលដែលមានប្រសិទ្ធិភាពនៅឡើយ ឬ អ្នកដែលកំពុងមានជំងឺផ្សិតពេញរាងកាយ។

2. អ្នកដែលមានជំងឺដំបៅក្រពះឬពោះវៀន ឬ ជំងឺDiverticulitis។

3. អ្នកដែលមានជំងឺផ្នែកស្មារតី។

4. អ្នកដែលមានជំងឺរបេង។

5. អ្នកដែលមានជំងឺរលាកកញ្ចក់ភ្នែកដោយសារវីរុសHerpes simplex virus។

6. អ្នកដែលមានជំងឺភ្នែកឡើងបាយប្រភេទPosterior capsular cataract។

7. អ្នកដែលមានជំងឺក្លូកូម(Glaucoma)។

8. អ្នកដែលមានជំងឺលើសសម្ពាធឈាម។

9. អ្នកដែលមានកម្រិតអេឡិចត្រូឡាយ(Electrolyte)ក្នុងខ្លួនខុសប្រក្រតី។

10. អ្នកដែលមានជំងឺកំណកឈាម។

11. អ្នកដែលទើបទទួលការវះកាត់សរីរាង្គខាងក្នុងរាងកាយ។

12. អ្នកដែលកើតមានជំងឺស្ទះសរសៃឈាមក្នុងបេះដូងស្រួចស្រាវ។

13. អ្នកដែលមានជំងឺភ្នែកបង្កឡើងដោយវីរុស មេរោគផ្សិតឬជំងឺរបេង ឬ ជំងឺភ្នែកមានខ្ទុះ។

ផលរំខានរួមមាន រាករូស ក្អួតចង្អោរ ឈឺក្រពះ ក្រហាយទ្រូង សម្ពាធឈាមធ្លាក់ចុះឬកើនឡើង គេងមិនលក់ វិលមុខ ឈឺសាច់ដុំឬសន្លាក់ ហើម បញ្ហាមករដូវ រោគសញ្ញាស្រដៀងជំងឺCushing sydrome។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ពិបាកដកដង្ហើម ក្រហមពេញខ្លួន រោគសញ្ញានៃការហើមប៉ោងនៅស្រទាប់ក្រោមនៃស្បែក(Angioedema) កន្ទាលត្រអាក(រោគប្រតិកម្មធ្ងន់ធ្ងរ)

- ក្ដៅខ្លួន អាការៈស្រដៀងផ្ដាសាយ (ជំងឺឆ្លងបណ្ដាលមកពីវីរុស បាក់តេរី មេរោគផ្សិត។ល។)

- ឈឺនៅផ្នែកចង្កេះនិងខ្នង ឈឺសន្លាក់នៅគល់ភ្លៅ (ជំងឺពុកឆ្អឹង ជំងឺខូចក្បាលឆ្អឹងនៃឆ្អឹងដើមដៃនិងឆ្អឹងភ្លៅ ជាដើម)

- បត់ជើងឈាម ក្អួតឈាម ឈឺពោះ ហើមពោះ អាការៈខ្វះឈាម (ហូរឈាមនៅតាមបំពង់រំលាយអាហារ ធ្លាយក្រពះឬពោះវៀន ដំបៅក្រពះឬពោះវៀន ជាដើម)

- កម្លាំងសាច់ដុំធ្លាក់ចុះ អស់កម្លាំង (ជំងឺទាក់ទងនឹងសាច់ដុំ)

- ហើមនិងឈឺជើង ដង្ហក់ ឈឺទ្រូងនិងក្បាល (ជំងឺកំណកឈាម(Thrombosis))

- សាច់ដុំកន្ត្រាក់ឬប្រកាច់ (សម្ពាធក្នុងក្បាលកើនឡើង)

- អារម្មណ៍ធ្លាក់ទឹកចិត្ត ស្មារតីមិននឹងនរ (ជំងឺផ្នែកស្មារតី)

- ស្ងួតក ផឹកទឹកច្រើន នោមច្រើន (ជំងឺទឹកនោមផ្អែម)

- ឈឺទ្រូង បាត់បង់ស្មារតី ហើម បេះដូងលោតញាប់ (ប៉ះពាល់មុខងារបេះដូង)។

・វ៉ាក់សាំងរស់(Live vaccine)ឬវ៉ាក់សាំងខ្សោយ(Attenuated vaccine) - ឱសថនេះធ្វើអោយប្រព័ន្ធភាពស៊ាំថយចុះ ដូចនេះ អ្នកជំងឺអាចនឹងមិនអាចទប់ទល់នឹងមេរោគដែលមិនទាន់ងាប់នៅក្នុងវ៉ាក់សាំងប្រភេទនេះបានទេ។ ដូច្នេះ ហាមប្រើរួមគ្នា។

ឱសថខាងក្រោមនេះ អាចប្រើរួមជាមួយឱសថនេះបាន ប៉ុន្តែត្រូវតាមដានស្ថានភាពជំងឺនិងផលរំខានអោយបានដិតដល់។

・ឱសថErythromycin, Estrogen - អាចធ្វើអោយសកម្មភាពនៃHydrocortisone sodium succinateកើនឡើង។

・ឱសថប្រឆាំងកំណកឈាម (Parnaparin sodium, Warfarinជាដើម) - អាចធ្វើអោយប្រសិទ្ធិភាពប្រឆាំងកំណកឈាមនៃឱសថទាំងនេះប្រែប្រួល។

・ឱសថVecuronium bromide, Pancuronium bromide - អាចធ្វើអោយប្រសិទ្ធិភាពនៃឱសថទាំងនេះប្រែប្រួល។

・ឱសថបំបាត់ការឈឺចាប់និងបញ្ចុះកម្ដៅប្រភេទNSAIDs(Sasapyrine, Diclofenacជាដើម) - អាចធ្វើអោយផលរំខានចំពោះសរីរាង្គរំលាយអាហារងាយកើតឡើង។

・ឱសថបញ្ចុះទឹកនោមប្រភេទបញ្ចេញប៉ូតាស្យូម(Trichlormethiazide, Hydrochlorothiazide, Furosemideជាដើម) - អាចធ្វើអោយកម្រិតប៉ូតាស្យូមក្នុងឈាមធ្លាក់ចុះ។

・ឱសថDigoxin - អាចធ្វើអោយផលរំខាននៃDigoxinកើតឡើង។

・ឱសថប្រភេទSalicylic acid (Sasapyrineជាដើម) - អាចធ្វើអោយផលរំខាននៃឱសថទាំងនេះកើតឡើង។

・ឱសថPhenobarbital, Phenytoin, Rifampicin - អាចធ្វើអោយប្រសិទ្ធិភាពនៃHydrocortisone sodium succinateថយចុះ។

・ឱសថព្យាបាលជំងឺទឹកនោមផ្អែម ថ្នាំចាក់អាំងស៊ុយលីន - អាចធ្វើអោយសកម្មភាពបញ្ចុះជាតិស្ករក្នុងឈាមថយចុះ។

・ឱសថCiclosporin - អាចធ្វើអោយកំហាប់ក្នុងឈាមនៃឱសថទាំងពីរកើនឡើងឬធ្វើអោយកើតមានអាការៈប្រកាច់។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

ឱសថនេះមានសកម្មភាពដូចទៅនឹងអរម៉ូនAdrenocortical hormones នៅក្នុងរាងកាយ ដោយមានប្រសិទ្ធិភាពទប់ស្កាត់អាការៈរលាក អាការៈប្រតិកម្ម ការកើនឡើងនៃប្រព័ន្ធភាពស៊ាំនៅក្នុងរាងកាយ ។ល។