Gusperimus hydrochloride

  • Pharmaceuticals and Medical Devices Agency នៃប្រទេសជប៉ុន (PMDA)

  • Pharmaceuticals and Medical Devices Agency នៃប្រទេសជប៉ុន (PMDA)

    ប្រភេទឱសថ

    • ប្រសិទ្ធិភាពព្យាបាល
    • កម្រិតប្រើប្រាស់
    • ហាមប្រើ
    • ផលរំខាន
    • ស្ត្រីមានផ្ទៃពោះ និង ស្ត្រីបំបៅដោះកូន
    • សកម្មភាពឱសថ

    • ប្រសិទ្ធិភាពព្យាបាល

      ជាទូទៅ ឱសថនេះប្រើនៅក្នុងការព្យាបាលប្រតិកម្មបដិសេធ(Transplant rejection)ក្រោយការវះកាត់ផ្លាស់ប្ចូរសរីរាង្គតម្រងនោម ប្រភេទកើតឡើងឆាប់រហ័សក្រោយការវះកាត់ និង ប្រភេទស្រួចស្រាវ។

    • កម្រិតប្រើប្រាស់

      ថ្នាំចាក់：

      មនុស្សពេញវ័យ ប្រើក្នុងកម្រិត1ថ្ងៃ1ដង 3～5mg/kg លាយនៅក្នុងទឹកសម្រាប់លាយថ្នាំចាក់ឬសូលុយស្យុងអំបិល(Saline)ឬសូលុយស្យុងគ្លុយកូស5% រួចបន្តពង្រាវនៅក្នុងសូលុយស្យុងអំបិល(Saline)ឬសូលុយស្យុងគ្លុយកូស5%ចំណុះ100～500mL ដើម្បីព្យួរសេរ៉ូមតាមសរសៃវ៉ែនរយៈពេល3ម៉ោង។ បន្តប្រើប្រាស់ឱសថនេះរយៈពេល7ថ្ងៃជាប់ៗគ្នា ប៉ុន្តែអាចបង្កើនដល់10ថ្ងៃជាប់ៗគ្នាទៅតាមស្ថានភាពរបស់អ្នកជំងឺ។

    • ហាមប្រើ

      ・ស្ត្រីមានផ្ទៃពោះ និង ស្ត្រីបំបៅដោះកូន។

    • ផលរំខាន

      ផលរំខានរួមមាន ចំនួនប្លាកែតថយចុះ ចំនួនគ្រាប់ឈាមសថយចុះ អេម៉ូក្លូប៊ីនថយចុះ គ្រាប់ឈាមក្រហមថយចុះ មុខក្រហម អាការៈស្ពឹកនៅមុខ ALT(GPT)កើនឡើង។ល។

      ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

      - រួយខ្លួន វិលមុខ បេះដូងលោតញាប់ ដកដង្ហើមដង្ហក់ ឈឺក្បាល ក្ដៅខ្លួន ឈឺបំពង់ក ហ៊ឹងត្រចៀក ឈាមច្រមុះ ឈាមតាមអញ្ចាញធ្មេញ ឈាមក្រោមស្បែក ងាយហូរឈាម មានស្នាមជាំលើស្បែក ឈាមក្រកក (ប៉ះពាល់ប្រព័ន្ធឈាមធ្វើអោយគ្រាប់ឈាមគ្រប់ប្រភេទថយចុះ)

      - ប៉ះពាល់ប្រព័ន្ធដំណកដង្ហើម

      - រោគសញ្ញាស្រដៀងនឹងផ្ដាសាយ រួយខ្លួន ក្ដៅខ្លួន ក្អួតចង្អោរ (ជំងឺឆ្លង)

      - ភ្លេចភ្លាំង ពិបាកផ្ដុំអារម្មណ៍ពិចារណា ស្ពឹកដៃជើង ពិបាកនិយាយ សាច់ដុំកន្ត្រាក់ បាត់បង់ស្មារតី (Progressive multifocal leukoencephalopathy, PML)

      - រួយខ្លួន ឈឺក្បាល ក្ដៅខ្លួន ហើម ឈឺផ្នែកខាងក្រោមនៃពោះ នោមញឹក នោមសល់ នោមឈាម បរិមាណទឹកនោមថយចុះ (ជំងឺតម្រងនោមBK virus nephropathy)។

    • ស្ត្រីមានផ្ទៃពោះ និង ស្ត្រីបំបៅដោះកូន

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនត្រូវប្រើឱសថនេះទេ។

      ・ស្ត្រីបំបៅដោះកូន មិនត្រូវប្រើប្រាស់ឱសថនេះទេ។

    • សកម្មភាពឱសថ

      ឱសថនេះមានប្រសិទ្ធិភាពទប់ស្កាត់ប្រតិកម្មបដិសេធ (Transplant rejection) តាមរយៈការបង្អាក់ដំណើរការនៃការវិវត្តនិងការកើនឡើងនៃកោសិកាទឹករងៃTដែលមានសកម្មភាពបំផ្លាញកោសិកា(Cytotoxic T lymphocyte) ព្រមទាំងទប់ស្កាត់ការផលិតអង់ទីករដោយការបង្អាក់ដំណើរការកើនឡើងនិងការវិវត្តនៃកោសិកាទឹករងៃBសកម្ម(Activated B lymphocyte)។

      ឱសថនេះខុសពីឱសថCiclosporinនិងឱសថស្តេរ៉ូអ៊ីត ត្រង់ឱសថនេះមិនមានសកម្មភាពទប់ស្កាត់ការផលិតLymphokineនិងសកម្មភាពបំបាត់ការរលាកនោះទេ។

      ឱសថនេះមានលក្ខណៈស្រដៀងទៅនឹងឱសថAzathioprineនិងឱសថMizoribineត្រង់សកម្មភាពទប់ស្កាត់ការកើនឡើងនៃកោសិកាទឹករងៃ ប៉ុន្តែ ខុសគ្នាត្រង់ឱសថនេះមិនមានសកម្មភាពទប់ស្កាត់ប្រតិកម្មសំយោគអាស៊ីតនុយក្លេអិច(DNA)ឬសកម្មភាពបំផ្លាញកោសិកាឡើយ។

*ព័ត៌មានឱសថត្រូវបានរៀបរៀងដោយ អ៊ីម៉ាតុគឹ មេឌីក (ខេមបូឌា) ដោយផ្អែកលើប្រភពព័ត៌មានខាងក្រោម។ សម្រាប់ព័ត៌មានលម្អិត សូមស្វែងរកនៅក្នុងក្រដាសព័ត៌មាននៃឱសថនីមួយៗ ឬ សាកសួរទៅកាន់ក្រុមហ៊ុនឱសថឬតំណាងចែកចាយនៃឱសថនីមួយៗ។

ប្រភពព័ត៌មាន៖

- ក្រដាសព័ត៌មាននៃឱសថសម្រាប់អ្នកជំនាញវេជ្ជសាស្ត្រដែលប្រើប្រាស់នៅប្រទេសជប៉ុន (Pharmaceutical and Medical Devices Agency, Pmda): https://www.pmda.go.jp

- ព័ត៌មានសង្ខេបនៃឱសថសម្រាប់អ្នកជំងឺដែលប្រើប្រាស់នៅប្រទេសជប៉ុន: http://www.rad-ar.or.jp

ត្រឡប់ទៅទំព័រដើម ត្រឡប់ទៅការប្រើប្រាស់ឱសថនៅក្នុងការព្យាបាល