Gemtuzumab ozogamicin

ជាទូទៅ ឱសថនេះប្រើនៅក្នុងការព្យាបាលជំងឺមហារីកគ្រាប់ឈាមសប្រភេទកោសិកាខួរឆ្អឹងលក្ខណៈស្រួចស្រាវ (Acute myelogenous leukemia) ដែលរើឡើងវិញឬពិបាកព្យាបាល និងមានវត្តមាននៃCD33។

ថ្នាំចាក់：

មនុស្សពេញវ័យ ប្រើក្នុងកម្រិត1ដង 9mg/m² ដោយព្យួរសេរ៉ូមតាមសរសៃវ៉ែនរយៈពេល2ម៉ោង។ អនុវត្តដូចនេះចំនួន2ដង ដោយទុកគម្លាតពីគ្នាយ៉ាងហោចណាស់រយៈពេល14ថ្ងៃ។

・អ្នកដែលធ្លាប់មានរោគប្រតិកម្មធ្ងន់ធ្ងរជាមួយនឹងសារធាតុនៅក្នុងឱសថនេះ។

ផលរំខានរួមមាន ក្ដៅខ្លួន ចង់ក្អួត អស់កម្លាំង មិនឃ្លានអាហារ ក្អួត រងាញាក់ ឈឺក្បាល ឈាមច្រមុះ ស្រកទម្ងន់ ជំងឺឆ្លង ជីពចរញាប់ ពិបាកដកដង្ហើម រាករូស ឈឺពោះ ។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- រងាញាក់ ក្ដៅខ្លួន ចង់ក្អួត (Infusion reaction)

- រួយខ្លួន ក្ដៅខ្លួន ងាយហូរឈាម (ប៉ះពាល់មុខងារផលិតគ្រាប់ឈាមរបស់ខួរឆ្អឹងជាដើម)

- ក្ដៅខ្លួនខ្លាំងភ្លាមៗនិងមានរងាញាក់ បេះដូងលោតញាប់ អារម្មណ៍មិនស្រួលនៅទ្រូង (ជំងឺឆ្លង)

- ឈឺក្បាល ឈឺពោះ កំអួតមានឈាម (អាការៈហូរឈាម)

- រួយខ្លួន មិនសូវឃ្លានអាហារ ភ្នែកនិងស្បែកប្រែពណ៌លឿង (ប៉ះពាល់មុខងារថ្លើម)

- បរិមាណទឹកនោមថយចុះ នោមមានឈាម ឈឺនៅផ្នែកខាងនៃពោះ (មុខងារតម្រងនោមធ្លាក់ចុះ បណ្ដុំរោគសញ្ញាដោយសារការងាប់កោសិកាមហារីកច្រើនក្នុងរយៈពេលខ្លី(Tumor lysis syndrome))

- ពិបាកដកដង្ហើម ទឹកដក់ក្នុងទ្រូង ទឹកដក់ក្នុងសួត (ប៉ះពាល់មុខងារសួត រលាកសួតប្រភេទInterstitial pneumonia)

- ងាយហូរឈាម ឈាមក្រកក (ជំងឺDisseminated intravascular coagulation syndrome, DIC)។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថដែលទទួលរងប្រតិកម្មពីឬទប់ស្កាត់សកម្មភាពរបស់អង់ស៊ីមCYP3A4 (ឱសថស្តេរ៉ូអ៊ីត(Methylprednisoloneជាដើម) ឱសថប្រឆាំងបាក់តេរីប្រភេទម៉ាក្រូឡាយ(Josamycin propionateជាដើម) ឱសថប្រឆាំងបាក់តេរីប្រភេទខេតូឡាយ(Telithromycinជាដើម) ឱសថប្រឆាំងបាក់តេរីប្រភេទស្ត្រេបតូហ្ក្រាមីន(Quinupristin/Dalfopristinជាដើម) ឱសថប្រឆាំងមេរោគផ្សិត(Itraconazoleជាដើម) - អាចមានឥទ្ធិពលដល់ប្រតិកម្មនិងប្រសិទ្ធិភាពនៃឱសថទាំងនេះ។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនគួរប្រើឱសថនេះទេ ព្រោះសារធាតុឱសថអាចប៉ះពាល់ដល់ទារកក្នុងផ្ទៃ។

・ស្ត្រីដែលអាចមានផ្ទៃពោះ ឬ អ្នកជំងឺជាបុរសដែលមានដៃគូអាចមានផ្ទៃពោះ គួរអនុវត្តវិធីពន្យារកំណើតក្នុងអំឡុងពេលប្រើប្រាស់និងក្រោយពេលបញ្ឈប់ការប្រើប្រាស់ឱសថនេះមួយរយៈ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・ការប្រើឱសថនេះត្រូវស្ថិតក្រោមការគ្រប់គ្រងម៉ត់ចត់ពីវេជ្ជបណ្ឌិតដែលមានបទពិសោធន៍ច្រើនក្នុងការព្យាបាលជំងឺមហារីកគ្រាប់ឈាមស។

・ការប្រើឱសថនេះរួមជាមួយឱសថប្រឆាំងមហារីកផ្សេងទៀតមិនត្រូវបានធានាសុវត្ថិភាពនោះទេ ដូច្នេះ ត្រូវចៀសវាងប្រើឱសថនេះស្របពេលនឹងឱសថប្រឆាំងមហារីកផ្សេងទៀត។

・ត្រូវប្រុងប្រយ័ត្នជាពិសេសចំពោះផលរំខានប៉ះពាល់ដល់មុខងារផលិតគ្រាប់ឈាមរបស់ខួរឆ្អឹង ព្រោះអាចធ្វើអោយអ្នកជំងឺបាត់បង់ជីវិតដោយសារជំងឺឆ្លងឬអាការៈហូរឈាមធ្ងន់ធ្ងរ។

・ត្រូវប្រុងប្រយ័ត្នជាពិសេសចំពោះផលរំខានinfusion reactionធ្ងន់ធ្ងរនិងការកើតឡើងនៃរោគប្រតិកម្មអាណាហ្វីឡាក់ស៊ីសដោយសារឱសថនេះ ព្រោះវាអាចមានគ្រោះថ្នាក់ដល់ជីវិតរបស់អ្នកជំងឺ។ រោគសញ្ញារួមមាន ទងសួតកន្ត្រាក់ កន្ទាលត្រអាក សម្ពាធឈាមចុះទាប បាត់បង់ស្មារតី ស្ទះសរសៃឈាមបេះដូង បេះដូងឈប់លោត ជាដើម។ ប្រសិនបើឃើញមានរោគសញ្ញាខាងលើកើតឡើង ត្រូវបញ្ឈប់ការបញ្ចូលឱសថនេះភ្លាមនិងមិនត្រូវប្រើប្រាស់ឱសថនេះទៀតឡើយ។ មុននឹងប្រើប្រាស់ឱសថនេះ ត្រូវបញ្ជាក់ថាចំនួនគ្រាប់ឈាមសមានកម្រិតទាបជាង30,000/μL។

・ត្រូវប្រុងប្រយ័ត្នចំពោះផលរំខានបង្កជាជំងឺថ្លើមដោយសារការស្ទះនៅសរសៃវែន(VOD)កម្រិតធ្ងន់ធ្ងរ ជាពិសេសអ្នកជំងឺដែលត្រូវប្រើប្រាស់ឱសថនេះនៅមុននិងក្រោយពេលវះកាត់ផ្លាស់ប្ដូរកោសិកាផលិតគ្រាប់ឈាម(Hematopoietic stem cell transplantation, HSCT)និងអ្នកដែលមានជំងឺថ្លើម គឺមានហានិភ័យខ្ពស់។

ឱសថនេះជាឱសថប្រឆាំងមហារីកដែលផ្សំឡើងពីអង់ទីករប្រឆាំងCD33និងឱសថប្រភេទCalicheamicinដែលជាឱសថប្រឆាំងបាក់តេរីជាមួយនឹងប្រសិទ្ធិភាពប្រឆាំងមហារីក។ ឱសថនេះនឹងភ្ជាប់ទៅនឹងកោសិកាមហារីកគ្រាប់ឈាមសដែលមានវត្តមានCD33 រួចចូលទៅក្នុងកោសិកា។ បន្ទាប់ពីនោះ ឱសថនេះនឹងផ្ដាច់ឱសថប្រភេទCalicheamicinចេញ ដើម្បីធ្វើសកម្មភាពបំផ្លាញកោសិកាមហារីក។