Cefoperazone sodium + Sulbactam

ជាទូទៅ ឱសថនេះប្រើនៅក្នុងការព្យាបាលជំងឺបណ្តាលមកពីបាក់តេរី ដូចជា អាការៈប្រតិកម្មធ្ងន់ធ្ងរប្រឆាំងនឹងការឆ្លងមេរោគចូលក្នុងឈាម(Sepsis) ជំងឺរលាកភ្នាសខាងក្នុងនៃបេះដូងដោយសារមេរោគ(Infective endocarditis) ជំងឺឆ្លងមេរោគបណ្ដាលមកពីរបួសក្រៅឬការរលាកភ្លើងឬការវះកាត់ ជំងឺរលាកបំពង់កនិងបំពង់សម្លេង រលាកក្រពេញអាមីដាល់ ជំងឺរលាកទងសួតស្រួចស្រាវ ជំងឺរលាកសួត ជំងឺខ្ទុះក្នុងសួត(Lung abscess) ជំងឺខ្ទុះក្នុងទ្រូង ជំងឺឆ្លងមេរោគដោយសារជំងឺផ្លូវដង្ហើមរ៉ាំរ៉ៃ ជំងឺរលាកប្លោកនោម ជំងឺរលាកតម្រងនោមប្រភេទPyelonephritis ជំងឺរលាកស្រោមពោះ ជំងឺខ្ទុះក្នុងប្រហោងពោះ ជំងឺរលាកថង់ទឹកប្រមាត់ ជំងឺរលាកបំពង់ទឹកប្រមាត់ ជំងឺខ្ទុះក្នុងថ្លើម ជំងឺរលាកក្រពេញបាល់តូលីន(Bartholinitis) ជំងឺឆ្លងមេរោគក្នុងស្បូន ជំងឺរលាកដៃស្បូននិងក្រពេញអូវែរ(Adnexitis) ជំងឺរលាកជាលិកាជុំវិញស្បូន។

ថ្នាំចាក់：

- ក្នុងឱសថ 0.5g រួមមាន៖ Sulbactam sodium 0.25g, Cefoperazone sodium 0.25g។

- ក្នុងឱសថ 1g រួមមាន៖ Sulbactam sodium 0.5g, Cefoperazone sodium 0.5g។

・មនុស្សពេញវ័យ：ប្រើ1ថ្ងៃ1～2g (កម្រិតសរុបនៃសារធាតុឱសថទាំងពីរ) ដោយបែងចែកជា2ដងក្នុង1ថ្ងៃ ចាក់តាមសរសៃវ៉ែន។ ករណីរោគសញ្ញាធ្ងន់ធ្ងរឬពិបាកព្យាបាល អាចបង្កើនកម្រិតដល់1ថ្ងៃ4g(កម្រិតសរុបនៃសារធាតុឱសថទាំងពីរ) ដោយបែងចែកជា2ដងក្នុង1ថ្ងៃ។

・កុមារ： ប្រើ1ថ្ងៃ40～80mg/kg (កម្រិតសរុបនៃសារធាតុឱសថទាំងពីរ) ដោយបែងចែកជា2～4ដងក្នុង1ថ្ងៃ ចាក់តាមសរសៃវ៉ែន។ ករណីរោគសញ្ញាធ្ងន់ធ្ងរឬពិបាកព្យាបាល អាចបង្កើនកម្រិតដល់1ថ្ងៃ160mg/kg(កម្រិតសរុបនៃសារធាតុឱសថទាំងពីរ)ដោយចែកជា2～4ដងក្នុង1ថ្ងៃ។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។
ជាគោលការណ៍ អ្នកជំងឺដូចខាងក្រោមនេះមិនគួរប្រើឱសថនេះទេ។ ប្រសិនបើចាំបាច់ត្រូវប្រើ ត្រូវតាមដានផលរំខានឱសថអោយបានដិតដល់។
・អ្នកដែលធ្លាប់កើតមានរោគប្រតិកម្មជាមួយនឹងឱសថប្រឆាំងបាក់តេរីប្រភេទសេហ្វេម (Cephem antibiotics)។

ផលរំខានរួមមាន រាករូស ឡើងកន្ទួលក្រហម ក្តៅខ្លួន។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ពិបាកដកដង្ហើម អាការៈហឺត រមាស់ (រោគប្រតិកម្មធ្ងន់ធ្ងរ)

- ហើម បរិមាណទឹកនោមថយចុះ បាត់បង់ចំណង់អាហារ (រលាកតម្រងនោម)

- ឈឺពោះ រាករូសច្រើនដង (រលាកពោះរៀនធំ)

- ក្តៅខ្លួន ក្អក ពិបាកដកដង្ហើម (រលាកសួត)

- កន្ទួលក្រហមលើស្បែក ភ្នែកក្រហម ឈឺក្នុងមាត់ (ជំងឺនៃបណ្តុំរោគសញ្ញាលើស្បែកភ្នាសនិងភ្នែក(Muco-cutaneo-ocular syndrome) ជំងឺស្លាប់កោសិកាស្បែក(TEN)) ជាដើម)

- អស់កម្លាំង បាត់បង់ចំណង់អាហារ ស្បែកឬភ្នែកឡើងពណ៌លឿង (រលាកថ្លើម ខាន់លឿង មុខងារថ្លើមថយចុះ)

- ឈឺបំពង់ក អាការៈខ្វះឈាម ហូរឈាមច្រមុះឬនៅតាមអញ្ចាញ (ជំងឺប្លាកែតថយចុះ ជំងឺគ្រាប់ឈាមសថយចុះ ជំងឺខ្វះឈាមប្រភេទHemolytic anemia)

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ថ្នាំបញ្ចុះទឹកនោមFurosemide - ហានិភ័យនៃការកើតមានបញ្ហាតម្រងនោមកើនឡើង

・គ្រឿងស្រវឹង - មានផលរំខានដូចជាឈឺក្បាល ចង់ក្អួន បែកញើសច្រើន ដូច្នេះមិនគួរប្រើគ្រឿងស្រវឹងក្នុងអំឡុងពេលកំពុងប្រើឱសថឬក្នុងអំឡុងពេល1សប្តាហ៍ក្រោយប្រើឱសថនេះទេ

・ស្ត្រីមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・នៅពេលលាយថ្នាំចាក់ - ត្រូវប្រើភ្លាមៗបន្ទាប់ពីការរលាយ

・នៅពេលចាក់បញ្ចូលថ្នាំ - អាចបង្កអាការៈឈឺចាប់ឬរលាកនៅសរសៃឈាម ឬបង្កជាកំណកឈាម ដូច្នេះ ត្រូវប្រុងប្រយ័ត្នអំពីផ្នែកនៃរាងកាយដែលត្រូវចាក់ របៀបចាក់ និង ត្រូវចាក់បញ្ចូលដោយយឺតៗតាមដែលអាចធ្វើទៅបាន។

Cefoperazone sodium ជាឱសថប្រឆាំងបាក់តេរីប្រភេទសេហ្វេម(Cephem antibiotics) ដោយបង្អាក់សកម្មភាពបង្កើតភ្នាសកោសិការបស់បាក់តេរី ធ្វើអោយបាក់តេរីមិនអាចកើនចំនួនបាន។

Sulbactam ជាសារធាតុដែលមានប្រសិទ្ធិភាពបង្អាក់សកម្មភាពរបស់អង់ស៊ីមβ-lactamase ធ្វើអោយប្រសិទ្ធិភាពប្រឆាំងមេរោគមានលំនឹង មិនងាយបាត់បង់ប្រសិទ្ធិភាព។