Bosentan hydrate

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

- ជំងឺលើសសម្ពាធឈាមនៅសួតដោយសារបញ្ហាសរសៃអាកទែរសួត(Pulmonary arterial hypertension, PAH)។

- ទប់ស្កាត់អាការៈដំបៅនៅម្រាមដៃដោយសារជំងឺស្បែកនិងសរីរាង្គនៃរាងកាយប្រែជារឹង(Systemic scleroderma) (សម្រាប់អ្នកដែលកំពុងឬធ្លាប់មានអាការៈនេះតែប៉ុណ្ណោះ)។

ថ្នាំលេប：

- មនុស្សពេញវ័យ：

ចាប់ផ្ដើមលេបពីកម្រិត 1ដង62.5mg, 1ថ្ងៃ2ដង ក្រោយអាហារពេលព្រឹកនិងពេលល្ងាច រយៈពេល4សប្ដាហ៍។ ចាប់ពីសប្ដាហ៍ទី5ទៅ លេប1ដង125mg, 1ថ្ងៃ2ដង ក្រោយអាហារពេលព្រឹកនិងពេលល្ងាច។ អាចបង្កើនឬបន្ថយកម្រិតប្រើប្រាស់ទៅតាមរោគសញ្ញានិងលទ្ធភាពទប់ទល់នឹងឱសថរបស់អ្នកជំងឺ ប៉ុន្តែ កម្រិតអតិបរមាប្រើក្នុង1ថ្ងៃគឺ250mg។

- ទារក និង កុមារ：

ចំពោះជំងឺលើសសម្ពាធឈាមនៅសួតដោយសារបញ្ហាសរសៃអាកទែរសួត(Pulmonary arterial hypertension, PAH)

លេប1ដង2mg/kg, 1ថ្ងៃ2ដង ពេលព្រឹកនិងពេលល្ងាច ដោយលាយជាមួយទឹកបន្តិច។ កម្រិតអតិបរមាគឺ 1ដង120mgឬ1ថ្ងៃ240mg។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ។

・អ្នកដែលមានបញ្ហាថ្លើមកម្រិតមធ្យមឬកម្រិតធ្ងន់ធ្ងរ។

・អ្នកដែលកំពុងប្រើប្រាស់ឱសថCiclosporinឬTacrolimus។

・អ្នកដែលកំពុងប្រើប្រាស់ឱសថGlibenclamide។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

ផលរំខានរួមមាន ឈឺក្បាល អស់កម្លាំង ឈឺសាច់ដុំ អាការៈខ្វះឈាម ទល់លាមក ឈឺខ្នង វិលមុខ ឈាមច្រមុះ មុខក្រហម ឡើងច្រាលក្ដៅ ហើមដៃជើង ។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- អស់កម្លាំង បាត់បង់ចំណង់អាហារ ក្អួតចង្អោរ (បញ្ហាថ្លើមធ្ងន់ធ្ងរ)

- វិលមុខ ងាយហូរឈាម ឈឺបំពង់ក (រោគសញ្ញានៃការថយចុះគ្រាប់ឈាម ឬ ប្លាកែត)

- កើនទម្ងន់ភ្លាមៗ ដង្ហក់ បេះដូងលោតញាប់ (ជំងឺខ្សោយបេះដូង)។

・ឱសថCiclosporin ឬ Tacrolimus - អាចធ្វើអោយកំហាប់ក្នុងឈាមនៃឱសថទាំងសងខាងកើនឡើង បង្កជាផលរំខានផ្សេងៗ។ ដូច្នេះ ហាមប្រើរួមគ្នា។

・ឱសថGlibenclamide - អាចប៉ះពាល់ដល់មុខងារថ្លើម។ ដូច្នេះ ហាមប្រើរួមគ្នា។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថប្រឆាំងកំណកឈាមWarfarin - អាចធ្វើអោយកំហាប់ក្នុងឈាមនៃWarfarinថយចុះ។

・ឱសថKetoconazole, ឱសថFluconazole - អាចធ្វើអោយកំហាប់ក្នុងឈាមនៃBosentanកើនឡើង បង្កជាផលរំខានផ្សេងៗ។

・ឱសថប្រភេទHMG-CoA reductase inhibitors (Simvastatin ជាដើម) - អាចធ្វើអោយកំហាប់ក្នុងឈាមក៏ដូចជាប្រសិទ្ធិភាពនៃឱសថទាំងនេះថយចុះ។

・ឱសថRifampicin - អាចធ្វើអោយកំហាប់ក្នុងឈាមក៏ដូចជាប្រសិទ្ធិភាពនៃBosentanថយចុះ។

・ឱសថប្រភេទCalcium antagonists - អាចធ្វើអោយសម្ពាធឈាមចុះកាន់តែទាប និង អាចធ្វើអោយកំហាប់ក្នុងឈាមនៃឱសថប្រភេទCalcium antagonistsថយចុះ។

・ឱសថពន្យារកំណើត- អាចធ្វើអោយកំហាប់ក្នុងឈាមក៏ដូចជាប្រសិទ្ធិភាពនៃឱសថពន្យារកំណើតថយចុះ។

・ទឹកផ្លែក្រូចថ្លុង - អាចធ្វើអោយកំហាប់ក្នុងឈាមនៃBosentanកើនឡើង បង្កជាផលរំខានផ្សេងៗ។

・អាហារបំប៉នដែលមានផ្ទុកសារធាតុSt.John's wort - អាចធ្វើអោយកំហាប់ក្នុងឈាមនៃBosentanថយចុះ។

・ឱសថប្រភេទProstaglandin (Beraprost sodium, Epoprostenol sodium ជាដើម) - អាចធ្វើអោយសម្ពាធឈាមចុះកាន់តែទាប។

・ឱសថប្រភេទPDE5 inhibitors (Sildenafil citrate, Vardenafil hydrochloride) - អាចធ្វើអោយសម្ពាធឈាមចុះកាន់តែទាបនិងអាចធ្វើអោយកំហាប់ក្នុងឈាមនៃBosentanថយចុះ។

・ឱសថព្យាបាលជំងឺឆ្លងវីរុសហ៊ីវ (Ritonavir ជាដើម) - អាចធ្វើអោយកំហាប់ក្នុងឈាមនៃBosentanកើនឡើង បង្កជាផលរំខានផ្សេងៗ។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនត្រូវប្រើឱសថនេះទេ ព្រោះអាចប៉ះពាល់ដល់ទារកក្នុងផ្ទៃ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・ក្នុងការប្រើប្រាស់ឱសថនេះ ត្រូវប្រុងប្រយ័ត្នជាពិសេសចំពោះផលរំខានប៉ះពាល់ដល់មុខងារថ្លើម ដោយត្រូវធ្វើការពិនិត្យមុខងារថ្លើមអោយបានយ៉ាងហោចណាស់ម្ដងក្នុង1ខែ។ ប៉ុន្តែ សម្រាប់រយៈពេល3ខែដំបូងនៃការចាប់ផ្ដើមប្រើប្រាស់ឱសថនេះ គួរអនុវត្តការពិនិត្យមុខងារថ្លើមរយៈពេល2សប្ដាហ៍ម្ដង។

・សម្រាប់អ្នកដែលកំពុងប្រើប្រាស់ថ្នាំគ្រាប់ពន្យារកំណើត ក្នុងអំឡុងពេលប្រើប្រាស់ឱសថនេះ ប្រសិទ្ធិភាពថ្នាំពន្យារកំណើតអាចនឹងថយចុះ ដូច្នេះ គួរចៀសវាងពន្យារកំណើតដោយប្រើតែថ្នាំគ្រាប់ គឺគួរប្រើវិធីពន្យារកំណើតផ្សេងទៀតផងដែរ។ ស្ត្រីដែលអាចនឹងមានផ្ទៃពោះត្រូវធ្វើការពិនិត្យផ្ទៃពោះនៅមុនពេលប្រើប្រាស់ឱសថនេះនិងជារៀងរាល់ខែផងដែរក្នុងអំឡុងពេលប្រើប្រាស់ឱសថនេះ។

・ឱសថនេះអាចធ្វើអោយកើតមានអាការៈខ្វះឈាមឬចំនួនប្លាកែតថយចុះ ដូច្នេះ នៅមុនពេលប្រើប្រាស់ឱសថនេះ អ្នកជំងឺគួរទទួលការពិនិត្យឈាមជាមុនសិន។ ម្យ៉ាងទៀត គួរទទួលការពិនិត្យជារៀងរាល់ខែម្ដងក្នុងរយៈពេល4ខែដំបូងបន្ទាប់ពីចាប់ផ្ដើមប្រើ បន្ទាប់ពីនោះ គួរទទួលការពិនិត្យឈាមរៀងរាល់3ខែម្ដង។

・សារធាតុនៅក្នុងទឹកផ្លែក្រូចថ្លុង និង អាហារបំប៉នដែលមានផ្ទុកសារធាតុSt.John's wort អាចមានឥទ្ធិពលដល់ប្រសិទ្ធិភាពនៃឱសថនេះ ដូច្នេះ គួរចៀសវាងការបរិភោគអាហារទាំងនេះ ក្នុងអំឡុងពេលប្រើប្រាស់ឱសថនេះ។

ឱសថនេះមានសកម្មភាពភ្ជាប់ទៅនឹងគ្រឿងទទួលETA និង ETB នៃសារធាតុអិនដូសេលីន(Endothelin) ដែលជាសារធាតុនៅក្នុងរាងកាយមានតួនាទីធ្វើអោយសរសៃអាកទែរកន្ត្រាក់និងរួមតូច។ ការភ្ជាប់ទៅនឹងគ្រឿងទទួលETA と ETB របស់ឱសថនេះនឹងបង្អាក់សកម្មភាពរបស់សារធាតុអិនដូសេលីន។ ជាលទ្ធផល ឱសថនេះមានប្រសិទ្ធិភាពបញ្ចុះសម្ពាធឈាមនៅក្នុងសរសៃអាកទែរសួត និង កែលម្អបញ្ហាទាក់ទងនឹងសរសៃឈាមនៅតាមម្រាមដៃ។