Allopurinol

ជាទូទៅ ឱសថនេះប្រើនៅក្នុងការព្យាបាលដូចខាងក្រោម ៖

- ជំងឺរលាកសន្លាក់ដោយសារការកើនឡើងនៃអាស៊ីតអ៊ុយរិច(Gout)។

- ជំងឺលើសសម្ពាធឈាមដែលរួមមានរោគសញ្ញានៃការកើនឡើងអាស៊ីតអ៊ុយរិចក្នុងឈាម

ថ្នាំលេប：

មនុស្សពេញវ័យ：លេប1ថ្ងៃ200～300mg បែងចែកជា2～3ដងក្នុង1ថ្ងៃ ក្រោយបរិភោគអាហារ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

ផលរំខានរួមមាន ឡើងកន្ទួលក្រហម រមាស់ ឈឺសន្លាក់ អាការៈខ្វះឈាម ស្នាមជាំស្វាយនៅលើស្បែក មិនស្រួលនៅក្នុងក្រពះ រាករូស លាមកជ្រាយ អស់កម្លាំង ជ្រុះរោមឬសក់ បាត់បង់ចំណង់អាហារ តម្រងនោមចុះខ្សោយ។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ក្តៅខ្លួន ស្នាមក្រហមលើស្បែក ភ្នែកក្រហម អស់កម្លាំង (ជំងឺនៃបណ្តុំរោគសញ្ញាលើស្បែកភ្នាសនិងភ្នែក(Muco-cutaneo-ocular syndrome ឬ StevensJohnson syndrome) ជំងឺស្លាប់កោសិកាស្បែក(TEN) ជាដើម)

- ឡើងកន្ទួលក្រហម ក្ដៅខ្លួន ហើមកូនកណ្ដុរ (រោគប្រតិកម្មប្រឆាំងនឹងឱសថ)

- វិលមុខ ពិបាកដកដង្ហើម បាត់បង់ស្មារតី (រោគប្រតិកម្មធ្ងន់ធ្ងរ)

- ឈឺបំពង់ក ក្ដៅខ្លួន អាការៈខ្វះឈាម ងាយហូរឈាមតាមច្រមុះឬតាមអញ្ចាញធ្មេញ (ជំងឺខ្វះឈាមប្រភេទAplastic anemia ជំងឺថយចុះគ្រាប់ឈាមសប្រភេទAgranulocytosis ជាដើម)

- បរិមាណទឹកនោមថយចុះ ហើម ឈឺក្បាល (មុខងារតម្រងនោមចុះខ្សោយ រលាកតម្រងនោម)

- អស់កម្លាំង ក្អួតចង្អោរ ភ្នែកនិងស្បែកប្រែពណ៌លឿង (រលាកថ្លើម ខាន់លឿង ជាដើម)

- ក្តៅខ្លួន ក្អកស្ងួត ពិបាកដកដង្ហើម (រលាកសួតប្រភេទInterstitial pneumonia )

- ឈឺសាច់ដុំ គ្មានកម្លាំង ទឹកនោមមានពណ៌ក្រហមត្នោត (ជំងឺរលាយសាច់ដុំ(Rhabdomyolysis))។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថMercaptopurine(6-MP), ឱសថAzathioprine - អាចធ្វើអោយផលប៉ះពាល់ទៅលើខួរឆ្អឹងកើនឡើង។

・ឱសថVidarabine - អាចធ្វើអោយសកម្មភាពនៃVidarabineកើនឡើង បង្កជាផលរំខានផ្សេងៗ។

・ឱសថប្រឆាំងកំណកឈាមWarfarin - អាចធ្វើអោយសកម្មភាពនៃWarfarinកើនឡើង បង្កជាផលរំខានផ្សេងៗ។

・ឱសថChlorpropamide - អាចធ្វើអោយសកម្មភាពនៃChlorpropamideកើនឡើង។

・ឱសថCyclophosphamide - អាចធ្វើអោយប៉ះពាល់ដល់ខួរឆ្អឹង។

・ឱសថCiclosporin - អាចធ្វើអោយកំហាប់ក្នុងឈាមនៃCiclosporinកើនឡើង។

・ឱសថPhenytoin - អាចធ្វើអោយកំហាប់ក្នុងឈាមនៃPhenytoinកើនឡើង។

・ឱសថប្រភេទXanthine(Theophylline ជាដើម) - អាចធ្វើអោយកំហាប់ក្នុងឈាមនៃឱសថទាំងនេះកើនឡើង។

・ឱសថDidanosine - អាចធ្វើអោយកំហាប់ក្នុងឈាមនៃDidanosineកើនឡើង។

・ឱសថPentostatin, ឱសថCaptopril, ឱសថHydrochlorothiazide, ឱសថAmpicillin - អាចធ្វើអោយកើតមានរោគប្រតិកម្មធ្ងន់ធ្ងរ។ ត្រូវបញ្ឈប់ការប្រើប្រាស់ឱសថទាំងអស់នៅពេលមានអាការៈដូចជាឡើងកន្ទួលក្រហមឬក្ដៅខ្លួន។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・នៅក្នុងការប្រើប្រាស់ឱសថនេះនៅរយៈពេលដំបូង អាចឃើញមានការកើតឡើងនូវអាការៈឈឺសន្លាក់ដោយសារបណ្ដុំនៃអាស៊ីតអ៊ុយរិចជាបណ្ដោះអាសន្ន។ ដូច្នេះ គួរពិនិត្យមើលព័ត៌មានបន្ថែមទាក់ទងនឹងកម្រិតនៃការប្រើប្រាស់ឱសថនៅដំណាក់កាលដំបូងអោយបានសមស្រប។

・ករណីកើតមានអាការៈឈឺចាប់ក្នុងអំឡុងពេលនៃការប្រើប្រាស់ឱសថនេះ គួរប្រើប្រាស់ឱសថColchicine ឬ ឱសថប្រភេទNSAIDs ឬ ឱសថស្តេរ៉ូអ៊ីត ជាដើម ដើម្បីបំបាត់អាការៈឈឺចាប់។

・អ្នកជំងឺគួរបរិភោគទឹកអោយបានច្រើន ដើម្បីបង្ការកុំអោយកើតមានក្រួសក្នុងតម្រងនោមដោយសារបណ្ដុំនៃអាស៊ីតអ៊ុយរិច។

・ករណីប្រើឱសថAllopurinolរួមជាមួយឱសថខាងក្រោម ត្រូវបន្ថយកម្រិតប្រើប្រាស់នៃឱសថខាងក្រោមនេះ：

Mercaptopurine hydrate, Azathioprine, Chlorpropamide, ឱសថប្រឆាំងកំណកឈាម។

ឱសថនេះមានប្រសិទ្ធិភាពបង្អាក់សកម្មភាពរបស់អង់ស៊ីមXanthine oxidaseដែលមានតួនាទីនៅក្នុងការសំយោគអាស៊ីតអ៊ុយរិចនៅក្នុងរាងកាយ។ ជាលទ្ធផល ធ្វើអោយកម្រិតនៃអាស៊ីតអ៊ុយរិចនៅក្នុងឈាមមានការថយចុះ។