Tranexamic acid

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

- អាការៈងាយហូរឈាមដែលអាចបណ្ដាលមកពីការកើនឡើងនៃសកម្មភាពរំលាយកំណកឈាមពេញរាងកាយ(ជំងឺមហារីកគ្រាប់ឈាមស ជំងឺខ្វះឈាមប្រភេទAplastic anemia ជំងឺស្នាមជាំស្វាយលើស្បែក(Purpura) ជាដើម)។

- អាការៈហូរឈាមខុសប្រក្រតីនៅក្នុងពេលឬក្រោយពេលវះកាត់។

- អាការៈហូរឈាមខុសប្រក្រតីដែលអាចបណ្ដាលមកពីការកើនឡើងនៃសកម្មភាពរំលាយកំណកឈាមដោយកន្លែង (ហូរឈាមក្នុងសួត តាមច្រមុះ នៅប្រដាប់ភេទ ក្នុងតម្រងនោម ក្នុងពេលឬក្រោយពេលវះកាត់ក្រពេញប្រូស្តាត)

- អាការៈហើមនិងរមាស់នៅពេលកើតកន្ទួលក្រហម កន្ទាលត្រអាក កន្ទួលក្រហមដោយសារប្រតិកម្មទៅនឹងឱសថឬសារធាតុពុល។

- អាការៈហើមនិងឈឺនៅពេលរលាកបំពង់ក ឬ រលាកក្រពេញអាមីដាល់(Tonsillitis)។

- អាការៈឈឺចាប់នៅពេលកើតមានជំងឺរលាកក្នុងមាត់។

ករណីថ្នាំលេប：

- មនុស្សពេញវ័យ：លេប1ថ្ងៃ 750～2,000mg (ថ្នាំម្សៅ50%ត្រូវនឹង1.5～4g) ដោយបែងចែកជា3～4ដងក្នុង1ថ្ងៃ។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

- កុមារអាយុ1ឆ្នាំចុះក្រោម：លេប1ថ្ងៃ 75～200mg (ថ្នាំទឹក5%ត្រូវនឹង1.5～4mL) ដោយបែងចែកជា3～4ដងក្នុង1ថ្ងៃ។

- កុមារអាយុ2～3ឆ្នាំ：លេប1ថ្ងៃ 150～350mg (ថ្នាំទឹក5%ត្រូវនឹង3～7mL) ដោយបែងចែកជា3～4ដងក្នុង1ថ្ងៃ។

- កុមារអាយុ4～6ឆ្នាំ：លេប1ថ្ងៃ 250～650mg (ថ្នាំទឹក5%ត្រូវនឹង5～13mL) ដោយបែងចែកជា3～4ដងក្នុង1ថ្ងៃ។

- កុមារអាយុ7～14ឆ្នាំ：លេប1ថ្ងៃ 400～1000mg (ថ្នាំទឹក5%ត្រូវនឹង8～20mL) ដោយបែងចែកជា3～4ដងក្នុង1ថ្ងៃ។

- កុមារអាយុ15ឆ្នាំឡើងទៅ：លេប1ថ្ងៃ 750～2000mg (ថ្នាំទឹក5%ត្រូវនឹង15～40mL) ដោយបែងចែកជា3～4ដងក្នុង1ថ្ងៃ។

អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

ករណីថ្នាំចាក់：

មនុស្សពេញវ័យ：ប្រើ1ថ្ងៃ 250～500mg បែងចែកជា1～2ដងក្នុង1ថ្ងៃ ដោយចាក់តាមសរសៃវ៉ែនឬក្នុងសាច់ដុំ។ នៅអំឡុងពេលវះកាត់ឬក្រោយពេលវះកាត់ជាដើម អាចប្រើក្នុងកម្រិត1ដង500～1000mg ចាក់តាមសរសៃវ៉ែន ឬ ប្រើក្នុងកម្រិត1ដង500～2500mg ដោយព្យួរសេរ៉ូមតាមសរសៃវ៉ែន។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

・អ្នកដែលកំពុងប្រើប្រាស់ឱសថThrombin។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

ផលរំខានរួមមាន បាត់បង់ចំណង់អាហារ ក្អួតចង្អោរ ក្រហាយទ្រូង រមាស់ស្បែក កន្ទួលក្រហម រាករូស ងងុយគេង។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- សាច់ដុំកន្ត្រាក់ម្ដងហើយម្ដងទៀត។

- សម្បុរខៀវស្វាយ ពិបាកដកដង្ហើម ពិបាកក្នុងទ្រូង (អាការៈប្រតិកម្មធ្ងន់ធ្ងរ(Shock))។

・ឱសថThrombin - អាចធ្វើអោយការកកើតកំណកឈាមកើនឡើង។ ដូច្នេះ ហាមប្រើរួមគ្នា។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថHemocoagulase - អាចធ្វើអោយការកកើតកំណកឈាមកើនឡើងករណីប្រើក្នុងកម្រិតខ្ពស់។

・ឱសថBatroxobin - អាចធ្វើអោយការកកើតកំណកឈាមឬការស្ទះដោយសារកំណកឈាមកើតឡើង។

・ឱសថនៃកត្តាកំណកឈាម (Eptacog alfa ជាដើម) - អាចធ្វើអោយការកកើតកំណកឈាមកើនឡើងនៅកន្លែងដែលមានសកម្មភាពរំលាយកំណកឈាមខ្លាំងក្លា។

ឱសថនេះមានប្រសិទ្ធិភាពទប់ស្កាត់សកម្មភាពរបស់សារធាតុផ្លាស់មីន(Plasmin) ដែលជាសារធាតុមានតួនាទីរំលាយកំណកឈាម(បណ្ដុំនៃសរសៃហ្វីប្រ៊ីន(Fibrin)) ជាលទ្ធផល បណ្ដុំនៃសរសៃហ្វីប្រ៊ីនអាចកកើតនិងស្ថិតនៅដើម្បីទប់ស្កាត់អាការៈហូរឈាម។ ម្យ៉ាងទៀត ឱសថនេះក៏ទប់ស្កាត់សកម្មភាពមួយទៀតរបស់ផ្លាស់មីនក្នុងការផលិតសារធាតុQuinineនិងសារធាតុផ្សេងទៀតដែលជាមូលហេតុបង្កអោយមានអាការៈរលាកឬរោគប្រតិកម្មផងដែរ។