Liraglutide

ជាទូទៅ ឱសថនេះប្រើនៅក្នុងការព្យាបាលជំងឺទឹកនោមផ្អែមប្រភេទទី2។

ថ្នាំចាក់：

មនុស្សពេញវ័យ：ប្រើ1ថ្ងៃ1ដង0.9mg ពេលព្រឹកឬពេលល្ងាច ចាក់ក្រោមស្បែក។ ប៉ុន្តែ ត្រូវចាប់ផ្ដើមពីកម្រិត1ថ្ងៃ1ដង0.3mgទៅ ដោយបង្កើនកម្រិតម្ដង0.3mg ដោយទុកគម្លាតនៃការបង្កើនកម្រិតរយៈពេល1សប្ដាហ៍ឬយូរជាងនេះ។ អាចបង្កើនឬបន្ថយកម្រិតប្រើប្រាស់ទៅតាមស្ថានភាពរបស់អ្នកជំងឺ ដោយកម្រិតអតិបរមាក្នុង1ថ្ងៃគឺ0.9mg។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・អ្នកដែលកំពុងមានរោគសញ្ញានៃការកើនឡើងសារធាតុកេតូននៅក្នុងរាងកាយ(Ketosis)ធ្ងន់ធ្ងរ ឬ ស្ថិតក្នុងស្ថានភាពបាត់បង់ស្មារតីដោយសារជំងឺទឹកនោមផ្អែម ឬ អ្នកដែលមានជំងឺទឹកនោមផ្អែមប្រភេទទី1។

・អ្នកដែលកំពុងមានជំងឺឆ្លងធ្ងន់ធ្ងរ ឬ ស្ថិតក្នុងស្ថានភាពបន្ទាន់ដូចជាការវះកាត់ជាដើម ដែលគួរគ្រប់គ្រងស្ថានភាពកម្រិតជាតិស្ករដោយឱសថចាក់អាំងស៊ុយលីន។

ផលរំខានរួមមាន កម្រិតជាតិស្ករក្នុងឈាមចុះទាបខ្លាំង ទល់លាមកចង់ក្អួត រាករូស ហើមពោះ ឈឺក្បាល។ល។

ប្រសិនបមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- បែកញើសទាំងត្រជាក់ ញ័រដៃជើង អារម្មណ៍ឃ្លានខ្លាំង វិលមុខ អស់កម្លាំង (កម្រិតជាតិស្ករក្នុងឈាមចុះទាបខ្លាំង)

- ឈឺខ្លាំងនៅផ្នែកខាងលើនៃពោះ ឈឺផ្នែកចង្កេះនិងខ្នង ក្អួតចង្អោរ ក្ដៅខ្លួន បាត់បង់ចំណង់អាហារ (រលាកលំពែង)

- ទល់លាមកខ្លាំង ហើមពោះ ឈឺពោះជាប់រហូត ក្អួតចង្អោរ (ស្ទះពោះវៀន)។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថព្យាបាលជំងឺទឹកនោមផ្អែមផ្សេងទៀត - អាចធ្វើអោយកម្រិតជាតិស្ករក្នុងឈាមចុះទាបខ្លាំង។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើថ្នាំចាក់អាំងស៊ុយលីនជាជាងប្រើប្រាស់ឱសថនេះ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

・ការប្រើប្រាស់ឱសថនេះគឺសម្រាប់អ្នកដែលបានអនុវត្តការគ្រប់គ្រងរបបអាហារនិងលំហាត់ប្រាណសមស្របហើយប៉ុន្តែនៅមិនអាចទទួលបានប្រសិទ្ធិភាពគ្រប់គ្រាន់ក្នុងការគ្រប់គ្រងជាតិស្ករក្នុងឈាមតែប៉ុណ្ណោះ។ ម្យ៉ាងទៀត អ្នកជំងឺគួរបន្តអនុវត្តការគ្រប់គ្រងរបបអាហារនិងលំហាត់ប្រាណអោយបានសមស្រប ក្នុងអំឡុងពេលនៃការប្រើប្រាស់ឱសថនេះ។

・ជាទូទៅ ឱសថនេះមិនតម្រូវអោយរក្សាទុកនៅក្នុងទូទឹកកកនោះទេក្រោយពេលបើកប្រើ។ ម្យ៉ាងទៀត ប្រសិនបើឃើញមានការប្រែពណ៌ឬកើតមានកករ សូមកុំបន្តប្រើប្រាស់ឱសថបែបនោះ។

・ជាទូទៅ ឱសថនេះអាចប្រើនៅពេលព្រឹកក៏បានពេលល្ងាចក៏បាន ប៉ុន្តែត្រូវកំណត់ពេលវេលាអោយបានទៀងទាត់ជារៀងរាល់ថ្ងៃ។

・ត្រូវបង្កើនកម្រិតប្រើប្រាស់តាមលំដាប់លំដោយ 0.3mg→0.6mg→0.9mg។ ឱសថនេះមិនអាចជំនួសឱសថអាំងស៊ុយលីនបានទេ ដូច្នេះ មិនត្រូវបញ្ឈប់ការប្រើប្រាស់ឱសថអាំងស៊ុយលីនដើម្បីងាកមកប្រើឱសថនេះទេ។

・ការចាក់ថ្នាំអាំងស៊ុយលីននៅក្រោមស្បែកអាចធ្វើឡើងនៅដើមដៃ ភ្លៅ ឬ ពោះ។ អ្នកជំងឺគួរកំណត់យកផ្នែកណាមួយក្នុងចំណោមផ្នែកនៃរាងកាយខាងលើ ប៉ុន្តែ គួរចាក់នៅត្រង់កន្លែងផ្សេងគ្នារាល់ពេលដោយខុសគ្នាពី2ទៅ3សង់ទីម៉ែត្រ។

・ប្រសិនបើមិនឃើញមានប្រសិទ្ធិភាពគ្រប់គ្រាន់ក្រោយប្រើប្រាស់ឱសថនេះរយៈពេល3ទៅ4ខែហើយនោះទេ គួរជ្រើសរើសវិធីព្យាបាលផ្សេងទៀត។

・អ្នកដែលងាយទទួលរងនូវផលរំខាននៃឱសថ ធ្វើអោយកម្រិតជាតិស្ករក្នុងឈាមចុះទាបខ្លាំង ៖

(1) អ្នកដែលមានមុខងារក្រពេញPituitary glandឬក្រពញAdrenal glandចុះខ្សោយ

(2) អ្នកដែលមិនបរិភោគអាហារឬបរិភោគអាហារមិនទៀងពេលវេលាឬមិនមានតុល្យភាពក្នុងរបបអាហារឬអ្នកដែលមានសុខភាពរាងកាយទន់ខ្សោយ

(3) អ្នកដែលធ្វើលំហាត់ប្រាណខ្លាំងក្លា

(4) អ្នកដែលពិសារគ្រឿងស្រវឹងច្រើន

・នៅពេលកើតមានអាការៈផ្សេងៗដោយសារកម្រិតជាតិស្ករចុះទាបខ្លាំង គួរបរិភោគស្ករឬទឹកផ្លែឈើក្នុងបរិមាណសមស្របដើម្បីបង្កើនជាតិស្ករក្នុងឈាមឡើងវិញ។ ម្យ៉ាងទៀត អ្នកជំងឺគួរប្រុងប្រយ័ត្ននៅពេលបើកបរឬបញ្ជាម៉ាស៊ីនដែលមានគ្រោះថ្នាក់។

ឱសថនេះមានទម្រង់ដូចទៅនឹងសារធាតុGLP-1នៅក្នុងរាងកាយរបស់មនុស្ស ដោយមានសកម្មភាពភ្ជាប់ទៅនឹងគ្រឿងទទួល(Receptor)នៃសារធាតុGLP-1 ដើម្បីភ្ញោចអោយមានការបញ្ចេញអរម៉ូនអាំងស៊ុយលីន(ជាអរម៉ូនបញ្ចុះជាតិស្ករក្នុងឈាម) និង ទប់ស្កាត់ការបញ្ចេញអរម៉ូនគ្លុយកាហ្កុង(Glucagon)(ជាអរម៉ូនបង្កើនជាតិស្ករក្នុងឈាម)ពីក្រពេញលំពែង នៅពេលមានការកើនឡើងនៃកម្រិតជាតិស្ករក្នុងឈាម។