Leflunomide

  • Pharmaceuticals and Medical Devices Agency នៃប្រទេសជប៉ុន (PMDA)

  • Pharmaceuticals and Medical Devices Agency នៃប្រទេសជប៉ុន (PMDA)

    • ប្រសិទ្ធិភាពព្យាបាល
    • កម្រិតប្រើប្រាស់
    • ហាមប្រើ
    • ផលរំខាន
    • អន្តរប្រតិកម្ម
    • ស្ត្រីមានផ្ទៃពោះ និង ស្ត្រីបំបៅដោះកូន
    • ការប្រុងប្រយ័ត្នជាពិសេស
    • សកម្មភាពឱសថ
    • ប្រសិទ្ធិភាពព្យាបាល

      ជាទូទៅ ឱសថនេះប្រើនៅក្នុងការព្យាបាលជំងឺរូម៉ាទីសនៅសន្លាក់(Rheumatoid arthritis)។

    • កម្រិតប្រើប្រាស់

      ថ្នាំលេប:

      មនុស្សពេញវ័យ:ចាប់ផ្ដើមលេបក្នុងកម្រិត 1ថ្ងៃ1ដង 100mg រយៈពេល3ថ្ងៃ បន្ទាប់ពីនោះ លេបជាប្រចាំក្នុងកម្រិត 1ថ្ងៃ1ដង 20mg។ ឬ ចាប់ផ្ដើមលេបពីកម្រិត1ថ្ងៃ1ដង20mg តែម្ដង។ អាចបន្ថយកម្រិតប្រើប្រាស់ជាប្រចាំមកត្រឹម 1ថ្ងៃ1ដង 10mg ទៅតាមស្ថានភាពនិងទម្ងន់របស់អ្នកជំងឺ។

    • ហាមប្រើ

      ・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ។

      ・ស្ត្រីកំពុងបំបៅដោះកូន។

      ・អ្នកដែលមានជំងឺថ្លើមរ៉ាំរ៉ៃ។

      ・អ្នកដែលកំពុងមានអាការៈផ្សេងៗដោយសារជំងឺរបេង។

    • ផលរំខាន

      ផលរំខានរួមមាន រាករូស ជ្រុះរោមឬសក់ ឡើងកន្ទួលក្រហម សម្ពាធឈាមកើនឡើង ក្ដៅខ្លួន ឈឺពោះ ជំងឺឆ្លងនៅផ្លូវដង្ហើមផ្នែកខាងលើ ចង់ក្អួត ឈឺក្បាល ស្ពឹកដៃជើង ។ល។

      ប្រសិនបមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

      - ត្រជាក់ខ្លួន ពិបាកដកដង្ហើម បែកញើសទាំងត្រជាក់ (រោគប្រតិកម្មធ្ងន់ធ្ងរ)

      - ក្ដៅខ្លួន ស្នាមក្រហមលើស្បែក ពងទឹកឬរលាត់លើស្បែក (ជំងឺនៃបណ្តុំរោគសញ្ញាលើស្បែកភ្នាសនិងភ្នែក(Muco-cutaneo-ocular syndromeឬStevens-Johnson syndrome) ជំងឺស្លាប់កោសិកាស្បែក(TEN))

      - បាត់បង់ចំណង់អាហារ អស់កម្លាំង ភ្នែកនិងស្បែកប្រែពណ៌លឿង (រលាកថ្លើម មុខងារថ្លើមចុះខ្សោយ ជាដើម)

      - ក្ដៅខ្លួន អស់កម្លាំង ឈឺបំពង់ក អាការៈដូចផ្ដាសាយ (ប៉ះពាល់មុខងារផលិតគ្រាប់ឈាមនៃខួរឆ្អឹង ជំងឺឆ្លង)

      - ក្ដៅខ្លួន ក្អកស្ងួត ពិបាកដកដង្ហើម (ជំងឺរលាកសួតប្រភេទInterstitial pneumonia)

      - ក្ដៅខ្លួន ឈឺផ្នែកខាងលើនៃពោះ ឈឺផ្នែកចង្កេះនិងខ្នង (រលាកលំពែង)។

    • អន្តរប្រតិកម្ម

      ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

      ・ឱសថWarfarin - អាចធ្វើអោយកំហាប់ក្នុងឈាមនៃWarfarinកើនឡើង។

      ・ឱសថColestyramine - អាចធ្វើអោយសកម្មភាពនៃឱសថLeflunomideថយចុះ។

      ・ឱសថដែលបន្ថយសកម្មភាពនៃប្រព័ន្ធភាពស៊ាំ(ឱសថស្តេរ៉ូអ៊ីតជាដើម) - អាចធ្វើអោយប្រព័ន្ធភាពស៊ាំកាន់តែចុះខ្សោយ នាំអោយងាយកើតមានជំងឺឆ្លងផ្សេងៗ។

      ・ឱសថព្យាបាលជំងឺរូម៉ាទីសនៅសន្លាក់ផ្សេងទៀត(Methotrexateជាដើម) - អាចធ្វើអោយងាយកើតមានផលប៉ះពាល់ទៅលើថ្លើមនិងប្រព័ន្ធឈាមក្នុងរាងកាយ។

      ・ឱសថRifampicin - អាចធ្វើអោយប្រសិទ្ធិភាពនៃLeflunomideប្រែប្រួល។

    • ស្ត្រីមានផ្ទៃពោះ និង ស្ត្រីបំបៅដោះកូន

      ・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ មិនត្រូវប្រើប្រាស់ឱសថនេះទេ ព្រោះអាចប៉ះពាល់ដល់ទារកក្នុងផ្ទៃ។

      ・ស្ត្រីបំបៅដោះកូន មិនត្រូវប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។

      ・អ្នកជំងឺជាស្ត្រីដែលអាចមានផ្ទៃពោះឬជាបុរសដែលដៃគូរបស់គាត់អាចមានផ្ទៃពោះ គួរប្រើប្រាស់វិធីពន្យារកំណើតក្នុងអំឡុងពេលប្រើប្រាស់ឱសថនេះ។

    • ការប្រុងប្រយ័ត្នជាពិសេស

      ・នៅក្នុងការប្រើប្រាស់ឱសថនេះ ត្រូវប្រុងប្រយ័ត្នជាពិសេសចំពោះផលរំខានធ្វើអោយកើតមានជំងឺឆ្លង ផលប៉ះពាល់ចំពោះសួត ថ្លើម និង ប្រព័ន្ធឈាមនៅក្នុងរាងកាយ ព្រោះវាអាចធ្វើអោយមានគ្រោះថ្នាក់ដល់ជីវិតរបស់អ្នកជំងឺ។

      ・គ្រឿងស្រវឹងអាចធ្វើអោយងាយកើតមានផលរំខានប៉ះពាល់ដល់ថ្លើម ដូច្នេះ គួរចៀសវាងពិសាគ្រឿងស្រវឹង ក្នុងអំឡុងពេលប្រើប្រាស់ឱសថនេះ។

      ・ជាទូទៅ ឱសថនេះនឹងបង្ហាញប្រសិទ្ធិភាពក្នុងរយៈពេលពី2សប្ដាហ៍ទៅ3ខែបន្ទាប់ពីពេលចាប់ផ្ដើមប្រើប្រាស់ឱសថនេះ។ ដូច្នេះ គួរបន្តប្រើប្រាស់ឱសថនេះយ៉ាងហោចណាស់អោយបានរយៈពេល3ខែ មុននឹងវាយតម្លៃប្រសិទ្ធិភាពឱសថ។

      ・អ្នកជំងឺជាស្ត្រីដែលអាចមានផ្ទៃពោះឬជាបុរសដែលដៃគូរបស់គាត់អាចមានផ្ទៃពោះ គួរប្រើប្រាស់វិធីពន្យារកំណើតក្នុងអំឡុងពេលប្រើប្រាស់ឱសថនេះ។

    • សកម្មភាពឱសថ

      ឱសថនេះមានប្រសិទ្ធិភាពទប់ស្កាត់សកម្មភាពនៃអង់ស៊ីមDHODHដែលមានតួនាទីនៅក្នុងការបង្កើនចំនួនកោសិកាទឹករងៃ ដើម្បីកាត់បន្ថយសកម្មភាពនៃប្រព័ន្ធភាពស៊ាំដែលមានលក្ខណៈខុសប្រក្រតី។

*ព័ត៌មានឱសថត្រូវបានរៀបរៀងដោយ អ៊ីម៉ាតុគឹ មេឌីក (ខេមបូឌា) ដោយផ្អែកលើប្រភពព័ត៌មានខាងក្រោម។ សម្រាប់ព័ត៌មានលម្អិត សូមស្វែងរកនៅក្នុងក្រដាសព័ត៌មាននៃឱសថនីមួយៗ ឬ សាកសួរទៅកាន់ក្រុមហ៊ុនឱសថឬតំណាងចែកចាយនៃឱសថនីមួយៗ។

ប្រភពព័ត៌មាន៖

- ក្រដាសព័ត៌មាននៃឱសថសម្រាប់អ្នកជំនាញវេជ្ជសាស្ត្រដែលប្រើប្រាស់នៅប្រទេសជប៉ុន (Pharmaceutical and Medical Devices Agency, Pmda): https://www.pmda.go.jp

- ព័ត៌មានសង្ខេបនៃឱសថសម្រាប់អ្នកជំងឺដែលប្រើប្រាស់នៅប្រទេសជប៉ុន: http://www.rad-ar.or.jp