Iohexol

ជាទូទៅ ឱសថនេះប្រើនៅក្នុងបម្រើបម្រាស់ដូចខាងក្រោម៖

- ការចាក់ឱសថនេះចូលសរសៃអាកទែរដើម្បីថតសរសៃឈាមដោយប្រើកាំរស្មីX

- ការចាក់ឱសថនេះចូលសរសៃវ៉ែនដើម្បីថតសរសៃឈាមដោយប្រើកាំរស្មីX

- ការថតCT

- ការថតសរសៃឈាមនៅតាមអវៈយវៈទាំងបួន

- ការចាក់ឱសថនេះចូលសរសៃវ៉ែនដើម្បីថតផ្លូវតម្រងនោម

- ការថតសរសៃឈាមក្នុងខួរក្បាល

- ការថតសរសៃឈាមនិងបេះដូង (រួមទាំងការថតសរសៃអាកទែរសួត)

- ការថតសរសៃឈាមនិងបេះដូងចំពោះកុមារ (រួមទាំងការថតសរសៃអាកទែរសួត

- ការថតសរសៃអាកទែរធំ

- ការថតCTខួរក្បាល

- ការថតCTខួរឆ្អឹងខ្នង

- ការថតខួរឆ្អឹងផ្នែកក ផ្នែកទ្រូង ផ្នែកចង្កេះ។

សម្គាល់៖ គោលដៅនៃការប្រើប្រាស់អាចប្រែប្រួលទៅតាមប្រភេទនីមួយៗនៃឱសថនេះ ដូច្នេះ ត្រូវពិនិត្យអោយបានច្បាស់មុននឹងប្រើប្រាស់ ដើម្បីចៀសវាងផលរំខានធ្ងន់ធ្ងរដែលអាចកើតឡើងដោយសារការប្រើខុសគោលដៅ។

ថ្នាំចាក់：

កម្រិតប្រើប្រាស់ប្រែប្រួលទៅតាមអាយុ ទម្ងន់ រោគសញ្ញារបស់អ្នកជំងឺ និង គោលដៅនៃការថតឬផ្នែកនៃរាងកាយដែលត្រូវថត។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុអ៊ីយ៉ូតឬថ្នាំជំនួយការថតប្រភេទអ៊ីយ៉ូត។

・អ្នកដែលមានជំងឺក្រពេញទីរ៉ូអ៊ីតកម្រិតធ្ងន់ធ្ងរ។

・អ្នកដែលធ្លាប់មានឬកំពុងមានជំងឺប្រកាច់ឬអាការៈកន្ត្រាក់សាច់ដុំ ឬ មានស្ថានភាពរាងកាយអាចកើតមានអាការៈទាំងនេះ។ (ករណីប្រើនៅក្នុងខួរក្បាលឬឆ្អឹងខ្នងប៉ុណ្ណោះ)

ជាគោលការណ៍ អ្នកជំងឺដូចខាងក្រោមនេះមិនគួរប្រើឱសថនេះទេ។ ប្រសិនបើចាំបាច់ត្រូវប្រើ ត្រូវតាមដានផលរំខានឱសថអោយបានដិតដល់។

・អ្នកដែលកំពុងស្ថិតក្នុងស្ថានភាពរាងកាយមិនល្អខ្លាំង។

・អ្នកដែលមានជំងឺហឺត (Bronchial asthma)។

・អ្នកដែលមានបញ្ហាបេះដូងកម្រិតធ្ងន់ធ្ងរ។

・អ្នកដែលមានបញ្ហាថ្លើមកម្រិតធ្ងន់ធ្ងរ។

・អ្នកដែលមានបញ្ហាតម្រងនោមកម្រិតធ្ងន់ធ្ងរ។

・អ្នកដែលមានជំងឺMacroglobulinemia។

・អ្នកដែលមានជំងឺមហារីកខួរឆ្អឹងប្រភេទMultiple Myeloma។

・អ្នកដែលមានអាការៈកន្ត្រាក់សាច់ដុំ(Tetany)។

・អ្នកដែលកំពុងមានឬសង្ស័យថាមានជំងឺមហារីកPheochromocytoma។

ផលរំខានរួមមាន ឡើងកន្ទួលក្រហម រមាស់ស្បែក ស្នាមក្រហមលើស្បែក កន្ទាលត្រអាក ចង់ក្អួត ក្អួត ឈឺក្បាល អារម្មណ៍ក្ដៅ អាការៈឈឺចាប់ សម្ពាធឈាមចុះទាប ។ល។

ប្រសិនបមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ពិបាកដកដង្ហើម សម្ពាធឈាមចុះទាប បាត់បង់ស្មារតី (អាការៈប្រតិកម្មធ្ងន់ធ្ងរ(Shock) រោគប្រតិកម្មធ្ងន់ធ្ងរ)

- ពិបាកដកដង្ហើម ទឹកមុខស្លេកស្លាំង ហើមបំពង់ក ហើមត្របកភ្នែក ហើមមុខ (រោគប្រតិកម្មធ្ងន់ធ្ងរ)

- បរិមាណទឹកនោមថយចុះ អស់កម្លាំង ហើម (មុខងារតម្រងនោមចុះខ្សោយស្រួចស្រាវ)

- ពិបាកដកដង្ហើម បេះដូងលោតញាប់នៅពេលធ្វើចលនា ស្រួលដកដង្ហើមនៅពេលអង្គុយជាជាងទម្រេតខ្លួន (ទឹកដក់ក្នុងសួត)

- បាត់បង់ចំណង់អាហារ រួយខ្លួន ភ្នែកនិងស្បែកប្រែពណ៌លឿង (មុខងារថ្លើមចុះខ្សោយ ខាន់លឿង)

- វិលមុខ បេះដូងលោតញាប់ ឈឺទ្រូង មិនស្រួលក្នុងទ្រូង ថប់ទ្រូង (ញ័រថតក្រោមនៃបេះដូង សរសៃអាកទែរបេះដូងកន្ត្រាក់)

- ក្ដៅខ្លួន ស្នាមក្រហមលើស្បែក ឡើងកន្ទួលក្រហម ពងទឹកឬពងខ្ទុះ រមាស់ស្បែក ភ្នែកក្រហម ដំបៅមាត់ (ជំងឺនៃបណ្តុំរោគសញ្ញាលើស្បែកភ្នាសនិងភ្នែក(Muco-cutaneo-ocular syndrome ឬ StevensJohnson syndrome))

- ងាយហូរឈាម ឈាមច្រមុះ ឈាមតាមអញ្ចាញធ្មេញ ស្នាមជាំស្វាយតាមដៃជើង (ចំនួនប្លាកែតថយចុះ)

- បាត់បង់ស្មារតី

- មិនសូវដឹងញាណ មិនអាចធ្វើចលនាបាន (ស្ពឹក)។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថបញ្ចុះជាតិស្ករក្នុងឈាមប្រភេទBiguanide (Metformin hydrochloride, Buformin hydrochloride ជាដើម) - អាចធ្វើអោយកើតមានរោគសញ្ញានៃLactic acidosis។

・ឱសថព្យាបាលជំងឺទាក់ទងនឹងស្មារតី (ឱសថប្រភេទPhenothiazine ជាដើម) - អាចធ្វើអោយកើតមានអាការៈកន្ត្រាក់សាច់ដុំ ដូច្នេះ គួរផ្អាកការប្រើប្រាស់ឱសថទាំងនេះយ៉ាងហោចណាស់48ម៉ោងមុនពេលប្រើប្រាស់Iohexol និង យ៉ាងហោចណាស់12ម៉ោងក្រោយបញ្ចប់ការពិនិត្យ។ ប្រសិនបើកើតមានអាការៈកន្ត្រាក់សាច់ដុំ គួរប្រើប្រាស់ឱសថប្រភេទBarbiturates (Phenobarbital ជាដើម)ឬDiazepam ដើម្បីទប់ស្កាត់។ (ករណីប្រើនៅក្នុងខួរក្បាលឬឆ្អឹងខ្នងប៉ុណ្ណោះ)

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅរយៈពេល48ម៉ោង បន្ទាប់ពីប្រើប្រាស់ឱសថនេះ។

・នៅក្នុងការប្រើប្រាស់ឱសថនេះ ត្រូវប្រុងប្រយ័ត្នជាពិសេសចំពោះការកើតមានអាការៈប្រតិកម្មធ្ងន់ធ្ងរ(Shock)។

・ទម្រង់មួយចំនួននៃឱសថនេះមិនអាចចាក់បញ្ចូលទៅក្នុងខួរក្បាលឬឆ្អឹងខ្នងបានទេ ព្រោះអាចធ្វើអោយកើតមានផលរំខានធ្ងន់ធ្ងរ ដូច្នេះ ត្រូវប្រុងប្រយ័ត្នចំពោះគោលដៅនៃការប្រើប្រាស់របស់ប្រភេទឱសថនីមួយៗ។

ឱសថនេះមានផ្ទុកសារធាតុអ៊ីយ៉ូតដែលនឹងស្រូបយកកាំរស្មីX ជាពិសេសនៅពេលវាស្ថិតនៅក្នុងជាលិកានៃរាងកាយរបស់មនុស្ស ដែលធ្វើអោយគេអាចផ្ដិតយករូបភាពនៃការថតបានច្បាស់។