Heparin sodium

ករណីថ្នាំចាក់：

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

- ព្យាបាលជំងឺកកើតកំណកឈាមច្រើនក្នុងសរសៃឈាម (ជំងឺDisseminated intravascular coagulation syndrome, DIC)

- ទប់ស្កាត់ការកើតមានកំណកឈាមនៅពេលប្រើប្រាស់ឧបករណ៍ក្រៅរាងកាយទាក់ទងនឹងចរន្តឈាម ដូចជា ឧបករណ៍លាងឈាម ឧបករណ៍ជំនួសមុខងារបេះដូងនិងសួត(Heart-lung machine) ជាដើម។

- ទប់ស្កាត់ការកើតមានកំណកឈាមនៅពេលស៊កបំពង់Catheterទៅក្នុងសរសៃឈាម។

- ទប់ស្កាត់ការកើតមានកំណកឈាមនៅពេលធ្វើការបញ្ចូលឈាមឬការពិនិត្យឈាម។

- បង្ការនិងព្យាបាលជំងឺស្ទះដោយសារកំណកឈាម (ជំងឺកើតមានកំណកឈាមនៅសរសៃឈាមវ៉ែន ជំងឺស្ទះសរសៃឈាមក្នុងបេះដូង ជំងឺស្ទះកំណកឈាមនៅក្នុងសួត ជំងឺស្ទះកំណកឈាមនៅក្នុងខួរក្បាល ជំងឺស្ទះកំណកឈាមនៅតាមសរសៃឈាមអាកទែរនៃអវៈយវៈ ការស្ទះកំណកឈាមនៅក្នុងពេលឬក្រោយពេលវះកាត់។ល។)។

ករណីថ្នាំលាប：

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

- អាការៈឈឺចាប់ និង ជំងឺប្រភេទរលាកមួយចំនួន ដែលបណ្ដាលមកពីចរន្តឈាមរត់មានបញ្ហា (អាការៈរឹងនិងឈឺចាប់ក្រោយពេលចាក់ថ្នាំ)

- អាការៈហើមក្រោយរបួសដោយការប៉ះទង្គិច(ដំណំ គ្រេច ថ្លោះ) អាការៈដក់ឈាម អាការៈរលាកសរសៃកែង ឈឺសាច់ដុំ រលាកសន្លាក់

- ព្យាបាលនិងបង្កាកុំអោយស្នាមរបួសឡើងក្រាស់ឬផ្លែ

- អាការៈរលាកសរសៃវ៉ែនដោយសារកំណកឈាម (Thrombophlebitis)។

សូមពិនិត្យព័ត៌មានលម្អិតនៅក្នុងបរិយាយប័ណ្ណនៃឱសថនីមួយៗ។

ករណីថ្នាំចាក់：

ជាគោលការណ៍ អ្នកជំងឺដូចខាងក្រោមនេះមិនគួរប្រើឱសថនេះទេ។ ប្រសិនបើចាំបាច់ត្រូវប្រើ ត្រូវតាមដានផលរំខានឱសថអោយបានដិតដល់។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・អ្នកដែលកំពុងមានអាការៈហូរឈាម (ជំងឺស្នាមជាំស្វាយលើស្បែកដោយសារការថយចុះនៃចំនួនប្លាកែត(Thrombocytopenic purpura) ជំងឺឈាមក្រកក(Hemophilia) កំពុងមករដូវ កំពុងទទួលការវះកាត់ ជំងឺដំបៅក្រពះពោះវៀន ជំងឺហូរឈាមនៅប្រព័ន្ធតម្រងនោម មានអាការៈក្អួតឈាម រលូតកូន ទើបសម្រាលកូនរួចភ្លាម កំពុងសង្ស័យថាមានហូរឈាមក្នុងក្បាល ។ល។)

・អ្នកដែលអាចកើតមានអាការៈហូរឈាម (ជំងឺមហារីកនៃសរីរាង្គខាងក្នុង ជំងឺរលាកពោះវៀនធំ ជំងឺរលាកភ្នាសខាងក្នុងនៃបេះដូងដោយសារបាក់តេរី(Bacterial Endocarditis) ជំងឺលើសសម្ពាធឈាមកម្រិតធ្ងន់ ជំងឺទឹកនោមផ្អែមកម្រិតធ្ងន់ ។ល។)

・អ្នកដែលមានបញ្ហាថ្លើមធ្ងន់ធ្ងរ។

・អ្នកដែលមានបញ្ហាតម្រងនោមធ្ងន់ធ្ងរ។

・អ្នកដែលទើបទទួលការវះកាត់ផ្នែកប្រព័ន្ធសរសៃប្រសាទឬក្រោយទទួលការរងរបួសរួច។

・អ្នកដែលធ្លាប់មានជំងឺថយចុះចំនួនប្លាកែតដោយសារសារធាតុហិប៉ារីន(Heparin-induced thrombocytopenia, HIT)។

ករណីថ្នាំលាប：

・អ្នកដែលមានជំងឺទាក់ទងនឹងប្រព័ន្ធឈាមលក្ខណៈមានអាការៈហូរឈាម។

・អ្នកដែលអាចនឹងទទួលលទ្ធផលមិនល្អលក្ខណៈធ្ងន់ធ្ងរ ប្រសិនបើមានការហូរឈាមតែបន្តិចបន្តួចក៏ដោយ។

・ការប្រើនៅលើស្បែកដែលរលាត់ឬដំបៅ។

・ការប្រើនៅភ្នែក។

ករណីថ្នាំចាក់：

ផលរំខានរួមមាន រមាស់ស្បែក កន្ទាលត្រអាក រងាញាក់ ក្ដៅខ្លួន រលាកច្រមុះ អាការៈហឺត ហូរទឹកភ្នែក ជ្រុះរោមឬសក់ ស្នាមពណ៌សលើស្បែក ពុកឆ្អឹង។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- សម្ពាធឈាមធ្លាក់ចុះ ពិបាកដកដង្ហើម សម្បុរខៀវស្វាយ កន្ទាលត្រអាក ស្មារតីដឹងខ្លួនធ្លាក់ចុះ (រោគប្រតិកម្មធ្ងន់ធ្ងរ)

- អាការៈហូរឈាមនៅក្នុងខួរក្បាល នៅក្នុងក្រពះពោះវៀន ក្នុងសួត ក្នុងពោះ។ល។

- ឈាមច្រមុះ ឈាមតាមអញ្ចាញធ្មេញ ឈាមក្រោមស្បែកនៅតាមដៃជើង (រោគសញ្ញានៃការថយចុះចំនួនប្លាកែត)។

ករណីថ្នាំលាប：

ផលរំខានរួមមាន ឡើងកន្ទួលក្រហម ស្នាមក្រហម រមាស់ស្បែក ។ល។

ករណីថ្នាំចាក់：

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថប្រឆាំងកំណកឈាម, ឱសថរំលាយកំណកឈាម(Urokinase, t-PA ជាដើម), ឱសថដែលទប់ស្កាត់សកម្មភាពរបស់ប្លាកែត(Aspirin, Dipyridamole, Ticlopidine ជាដើម) - អាចធ្វើអោយការហូរឈាមងាយកើតឡើង។

・ឱសថប្រឆាំងបាក់តេរីប្រភេទតេត្រាសាយគ្លីន, ឱសថបង្កើនសកម្មភាពបេះដូង(ឱសថDigitalis), ឱសថប្រភេទNitroglycerin - អាចធ្វើអោយសកម្មភាពនៃឱសថHeparin Sodium ថយចុះ។

・ឱសថSugammadex sodium - អាចធ្វើអោយសកម្មភាពនៃឱសថHeparin Sodium កើនឡើង។

ករណីថ្នាំចាក់：

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

ករណីថ្នាំចាក់：

・ការបញ្ឈប់ការប្រើប្រាស់ឱសថនេះភ្លាមៗអាចធ្វើអោយកើតមានកំណកឈាមនាំអោយមានគ្រោះថ្នាក់ ដូច្នេះ ករណីឈប់ប្រើប្រាស់ឱសថនេះ ត្រូវបញ្ចុះកម្រិតប្រើប្រាស់បន្តិចម្ដងៗ។

・ដើម្បីបន្សាបឥទ្ធិពលនៃHeparin sodiumនៅពេលមានបញ្ហាកើតឡើង គេអាចប្រើប្រាស់សារធាតុProtamine sulfate ដោយត្រូវការ1～1.5mgសម្រាប់Heparin 100 IU (1mg)។

ករណីថ្នាំលាប：

・មិនត្រូវប្រើឱសថនេះនៅលើស្បែកដែលរលាត់ មានដំបៅ ឬ របួស ឬ នៅលើភ្នាសសើមដូចជាភ្នែកជាដើម។

ករណីថ្នាំចាក់：

ឱសថនេះមានប្រសិទ្ធិភាពទប់ស្កាត់ការកកើតកំណកឈាម ដោយមានសកម្មភាពភ្ញោចសារធាតុអង់ទីត្រុំប៊ីនIII (Antithrombin III)ដើម្បីទប់ស្កាត់សកម្មភាពនៃសារធាតុត្រុំប៊ីន កត្តាកំណកឈាមIXaដល់XIIa និង សារធាតុKallikrein ក្នុងដំណើរការបង្កើតកំណកឈាម។

ករណីថ្នាំលាប：

ឱសថនេះមានសកម្មភាពដូចខាងក្រោម៖

- ទប់ស្កាត់ការបំលែងពីProthrombinទៅជាThrombin ក៏ដូចជាទប់ស្កាត់ការកកើតកំណកឈាម

- ជម្រុញចរន្តឈាមរត់ និង ចរន្តរត់នៃប្រព័ន្ធទឹករងៃផងដែរ

- ទប់ស្កាត់ការភ្ជាប់នៃសារធាតុហ្វីប្រីន(Fibrin)ទៅនឹងជាលិកា ដើម្បីបំបាត់អាការៈរលាកនៅសន្លាក់ឬសរសៃកែងជាដើម

- ធ្វើប្រតិកម្មបន្ថែមជាតិទឹកដល់ស្នាមរបួសនិងរំលាយសារធាតុមួយចំនួនក្នុងជាលិកា ធ្វើអោយស្នាមរបួសមានលក្ខណៈទន់។