Bromocriptine mesilate

ជាទូទៅ ឱសថនេះប្រើនៅក្នុងការព្យាបាលដូចខាងក្រោម៖

- ជំងឺរូបរាងកាយរីកធំធាត់ហួសហេតុ (Acromegaly)

- ជំងឺរូបរាងកាយរីកលូតលាស់ហួសហេតុបណ្ដាលមកពីក្រពេញPituitary (Pituitary gigantism)

- ជំងឺនៃការបញ្ចេញទឹកដោះខុសប្រក្រតី (Galactorrhea)

- ការទប់ស្កាត់ការបញ្ចេញទឹកដោះនៅក្នុងរយៈពេលក្រោយសម្រាលកូនរហូតដល់សុខភាពមាតាត្រឡប់មកប្រក្រតីវិញ(Lying-in period)

- បញ្ហាទាក់ទងនឹងដំណើរបញ្ចេញមេជីវិតញី(Ovulation)ដែលរួមមានការកើនឡើងខ្ពស់នៃអរម៉ូនប្រូឡាក់ទីន(Prolactin)

- ជំងឺមហារីកក្រពេញPituitaryដែលរួមមានការកើនឡើងខ្ពស់នៃអរម៉ូនប្រូឡាក់ទីន(Prolactin) (ករណីមិនចាំបាច់ព្យាបាលដោយការវះកាត់តែប៉ុណ្ណោះ)

- បណ្ដុំរោគសញ្ញាប៉ាឃីនសុន(Parkinsonism)។

ថ្នាំលេប：

・ករណីជំងឺរូបរាងកាយរីកធំធាត់ហួសហេតុ (Acromegaly) និង ជំងឺរូបរាងកាយរីកលូតលាស់ហួសហេតុបណ្ដាលមកពីក្រពេញPituitary (Pituitary gigantism)：

ជាទូទៅ លេប1ថ្ងៃ2.5mg～7.5mg បែងចែកជា2～3ដងក្នុង1ថ្ងៃ ក្រោយបរិភោគអាហាររួចភ្លាម។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

・ករណីជំងឺនៃការបញ្ចេញទឹកដោះខុសប្រក្រតី (Galactorrhea) ករណីទប់ស្កាត់ការបញ្ចេញទឹកដោះនៅក្នុងរយៈពេលក្រោយសម្រាលកូនរហូតដល់សុខភាពមាតាត្រឡប់មកប្រក្រតីវិញ(Lying-in period) បញ្ហាទាក់ទងនឹងដំណើរបញ្ចេញមេជីវិតញី(Ovulation)ដែលរួមមានការកើនឡើងខ្ពស់នៃអរម៉ូនប្រូឡាក់ទីន(Prolactin) និង ជំងឺមហារីកក្រពេញPituitaryដែលរួមមានការកើនឡើងខ្ពស់នៃអរម៉ូនប្រូឡាក់ទីន(Prolactin) (ករណីមិនចាំបាច់ព្យាបាលដោយការវះកាត់តែប៉ុណ្ណោះ)：

ជាទូទៅ លេប1ថ្ងៃ1ដង2.5mg ក្រោយបរិភោគអាហារពេលល្ងាចរួចភ្លាម និង អាចបង្កើនកម្រិតបន្តិចម្ដងៗរហូតដល់ 1ថ្ងៃ5～7.5mg បែងចែកជា2～3ដងក្នុង1ថ្ងៃ ក្រោយបរិភោគអាហាររួចភ្លាម។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

・ករណីបណ្ដុំរោគសញ្ញាប៉ាឃីនសុន(Parkinsonism)：

ជាទូទៅ ចាប់ផ្ដើមលេបពីកម្រិត 1ថ្ងៃ1ដង 1.25mg ឬ 2.5mg ក្រោយបរិភោគអាហារពេលព្រឹករួចភ្លាម រួចបង្កើនកម្រិតម្ដង2.5mg/ថ្ងៃ រៀងរាល់1ឬ2សប្ដាហ៍ ដើម្បីកំណត់កម្រិតប្រើជាប្រចាំដែលជាទូទៅគឺ 1ថ្ងៃ 15～22.5mg។ ករណីកម្រិតប្រើក្នុង1ថ្ងៃស្មើនឹង5mg ត្រូវបែងចែកជា2ដងដោយប្រើនៅក្រោយពេលអាហារពេលព្រឹកនិងពេលល្ងាចរួចភ្លាម។ ករណីកម្រិតប្រើក្នុង1ថ្ងៃចាប់ពី7.5mgឡើងទៅ ត្រូវបែងចែកជា3ដងដោយប្រើនៅក្រោយបរិភោគអាហាររួចភ្លាម។ អាចបង្កើនឬបន្ថយកម្រិតប្រើប្រាស់ទៅតាមអាយុនិងរោគសញ្ញា។

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ ឬ ឱសថប្រភេទErgot alkaloids។

・ស្ត្រីដែលមានបណ្ដុំរោគសញ្ញានៃការលើសសម្ពាធឈាមនៅពេលមានផ្ទៃពោះ (Pregnancy-induced hypertension)។

・ស្ត្រីដែលមានសម្ពាធឈាមឡើងខ្ពស់ក្នុងរយៈពេលក្រោយសម្រាលកូនរហូតដល់សុខភាពមាតាត្រឡប់មកប្រក្រតីវិញ(Lying-in period)។

・អ្នកដែលកំពុងឬធ្លាប់មានជំងឺទាក់ទងនឹងប្រើសបេះដូង ដែលត្រូវបានពិនិត្យបញ្ជាក់ដោយអេកូបេះដូង។

ផលរំខានរួមមាន ចង់ក្អួត ក្អួត មិនស្រួលក្នុងក្រពះ បាត់បង់ចំណង់ទល់លាមក ស្ងួតក រវើរវាយ រោគសញ្ញាDyskinesia(ចលនាមិនប្រក្រតីនៃអណ្តាតនិងជុំវិញមាត់) វិលមុខ ងងឹតមុខពេលក្រោកឈរ ឈឺក្បាល ធ្ងន់ក្បាល អស់កម្លាំង ឡើងកន្ទួលក្រហម ។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- ទឹកមុខស្លេកស្លាំង បែកញើសទាំងត្រជាក់ បាត់បង់ស្មារតី (សម្ពាធឈាមធ្លាក់ចុះទាប អាការៈប្រតិកម្មធ្ងន់ធ្ងរ(Shock))

- ក្ដៅខ្លួនខ្លាំង សាច់ដុំរឹង ញ័រដៃជើង សាច់ដុំកន្ត្រាក់ (Syndrome malin)

- ក្អក ឈឺទ្រូង ពិបាកដកដង្ហើម (រលាកស្រទាប់ទ្រូង រលាកស្រទាប់បេះដូង ក្រិនសួត ក្រិនស្រទាប់ទ្រូង)

- បេះដូងលោតញាប់ ដង្ហក់ ហើមជើង (រោគសញ្ញាប៉ះពាល់ប្រើសបេះដូង)

- ឈឺចង្កេះ ឈឺផ្នែកខ្នង ហើមជើង (រោគសញ្ញានៃការក្រិនស្រទាប់ពោះផ្នែកខាងក្រោយ)។

- មិនស្គាល់ទីកន្លែងឬពេលវេលា ឃើញរូបភាពឬស្ដាប់លឺសម្លេងដែលមិនមានពិត អស់កម្លាំង (វង្វេងវង្វាន់ រវើរវាយ ភ្លេចភ្លាំង)

- ឈឺនៅចុងដង្ហើម ចង់ក្អួត ក្រហាយទ្រូង (ជំងឺដំបៅក្រពះឬគល់ពោះវៀនតូច ហូរឈាមនៅក្រពះពោះវៀន)

- សាច់ដុំកន្ត្រាក់ សម្ពាធឈាមកើនឡើង រោគសញ្ញានៃការប៉ះពាល់សរសៃឈាមខួរក្បាល គាំងបេះដូង

- អាការៈគេងលក់ភ្លាមៗ។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថដែលភ្ញោចប្រព័ន្ធសរសៃប្រសាទSympathetic (Adrenaline ជាដើម), ឱសថប្រភេទErgot alkaloids (Ergometrine, Methylergometrine, Ergotamine, Dihydroergotamine ជាដើម) - អាចធ្វើអោយកើតមានអាការៈដូចជា សម្ពាធឈាមកើនឡើង ឈឺក្បាល សាច់ដុំកន្ត្រាក់ ជាដើម។

・ឱសថដែលធ្វើអោយសម្ពាធឈាមចុះទាប - អាចធ្វើអោយសម្ពាធឈាមចុះកាន់តែទាប។

・គ្រឿងស្រវឹង - អាចធ្វើអោយប៉ះពាល់ដល់ក្រពះពោះវៀន ជាដើម។

・ឱសថប្រភេទPhenothiazines (Prochlorperazine, Chlorpromazine, Perazine ជាដើម), ឱសថប្រភេទButyrophenones (Haloperidol, Spiperone ជាដើម), ឱសថប្រភេទIminodibenzyl (Carpipramine ជាដើម), ឱសថព្យាបាលជំងឺស្មារតីប្រភេទAtypical antipsychotic(Perospirone, Blonanserin ជាដើម), ឱសថMetoclopramide, ឱសថDomperidone - អាចធ្វើអោយសកម្មភាពនៃឱសថទាំងសងខាងថយចុះ។

・ឱសថព្យាបាលជំងឺប៉ាឃីនសុន (Levodopa, ឱសថប្រភេទThioxanthene ជាដើម) - អាចធ្វើអោយផលរំខានទាក់ទងនឹងស្មារតីកើនឡើង។

・ឱសថCiclosporin, ឱសថTacrolimus - អាចធ្វើអោយកំហាប់ក្នុងឈាមនៃឱសថទាំងនេះកើនឡើង។

・ឱសថប្រឆាំងបាក់តេរីប្រភេទMacrolide (Erythromycin, Josamycin ជាដើម), ឱសថប្រឆាំងវីរុសប្រភេទProtease inhibitors (Ritonavir, Saquinavir ជាដើម), ឱសថប្រឆាំងមេរោគផ្សិតប្រភេទAzole (Itraconazole ជាដើម) - អាចធ្វើអោយសកម្មភាពនៃBromocriptine mesilateកើនឡើង។

・ឱសថOctreotide - អាចធ្វើអោយAUCនៃBromocriptine mesilateកើនឡើង។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

・ស្ត្រីបំបៅដោះកូន មិនត្រូវប្រើប្រាស់ឱសថនេះទេ ព្រោះសារធាតុឱសថនេះអាចធ្វើអោយមិនមានការបញ្ចេញទឹកដោះ។

・នៅក្នុងអំឡុងពេលប្រើប្រាស់ឱសថនេះ អាចធ្វើអោយកើតមានអាការៈដូចជា ងងុយគេង ជាដើម ដោយសារសម្ពាធឈាមចុះទាប ដូច្នេះ គួរចៀសវាងការបើកបររថយន្តឬបញ្ជាម៉ាស៊ីនដែលមានគ្រោះថ្នាក់។

・ការប្រើប្រាស់ឱសថនេះអាចធ្វើអោយកើតមានអាការៈ ដូចជា ការលេងល្បែងឬការទិញទំនិញហួសហេតុ ចំណង់អាហារឬចំណង់ផ្លូវភេទអាចកើនឡើងខុសប្រក្រតី ជាដើម។

・គ្រឿងស្រវឹងអាចធ្វើអោយសកម្មភាពឬផលរំខានរបស់ឱសថកើនឡើង ដូច្នេះ គួរចៀសវាងការពិសាគ្រឿងស្រវឹងនៅក្នុងអំឡុងពេលប្រើប្រាស់ឱសថនេះ។

・សកម្មភាពនៃឱសថទាំងនេះមានលក្ខណៈខ្សោយជាងឱសថប្រភេទL-ដូប៉ា (L-dopa) ប៉ុន្តែ ការកើតមានការប្រែប្រួលរោគសញ្ញាចុះឡើងក្នុង1ថ្ងៃមានលក្ខណៈតិចតួចជាង។

・រោគសញ្ញាក្រពះពោះវៀនច្រើនកើតឡើងនៅពេលចាប់ផ្ដើមប្រើប្រាស់ឱសថនេះ ប៉ុន្តែ វានឹងបាត់ទៅវិញក្រោយរយៈពេលប៉ុន្មានថ្ងៃ។

ឱសថនេះមានសកម្មភាពដូចខាងក្រោម៖

- ភ្ញោចគ្រឿងទទួលដូប៉ាមីន(Dopamine receptor)ដែលស្ថិតនៅក្រពេញPituitary ដើម្បីទប់ស្កាត់ការបញ្ចេញអរម៉ូនប្រូឡាក់ទីន(Prolactin)ឬអរម៉ូនជម្រុញការរីកលូតលាត់(Growth hormone ឬ Somatotropin)

- ភ្ញោចគ្រឿងទទួលដូប៉ាមីន(Dopamine receptor)ដែលស្ថិតនៅផ្នែកStriatumនៃខួរក្បាល ដើម្បីកែលម្អរោគសញ្ញាផ្សេងៗនៃជំងឺប៉ាឃីនសុន។