Baclofen

ករណីថ្នាំលេប：

ជាទូទៅ ឱសថនេះប្រើនៅក្នុងការព្យាបាលអាការៈស្ពឹកសាច់ដុំលក្ខណៈកន្ត្រាក់ ដែលកើតមាននៅក្នុងជំងឺដូចខាងក្រោម：ជំងឺទាក់ទងនឹងសរសៃឈាមក្នុងខួរក្បាលឬខួរឆ្អឹង, ជំងឺទាក់ទងនឹងឆ្អឹងកងក, ជំងឺស្ពឹកសាច់ដុំដោយសារការប៉ះពាល់ខួរក្បាល(Cerebral palsy)កើតនៅលើកុមារ, អាការៈស្ពឹកលក្ខណៈកន្ត្រាក់ទាក់ទងនឹងខួរឆ្អឹង, ជំងឺរឹងនៅតាមសរសៃប្រសាទដោយសារខូចជាលិកាព័ទ្ធជុំវិញសរសៃប្រសាទ(Multiple sclerosis), ជំងឺSpinocerebellar degeneration, រោគសញ្ញាបន្សល់ក្រោយរបួសពីការប៉ះទង្គិច(ការប៉ះទង្គិចខួរឆ្អឹង ការប៉ះទង្គិចក្បាល), រោគសញ្ញាបន្សល់ក្រោយពីការវះកាត់(រួមទាំងជំងឺមហារីកខួរក្បាលឬខួរឆ្អឹង) និង ជំងឺទាក់ទងនឹងខួរក្បាលឬសាច់ដុំផ្សេងទៀត។

ករណីថ្នាំចាក់បញ្ចូលតាមខួរឆ្អឹង：

ជាទូទៅ ឱសថនេះប្រើនៅក្នុងការព្យាបាលអាការៈស្ពឹកសាច់ដុំលក្ខណៈកន្ត្រាក់កម្រិតធ្ងន់ធ្ងរ ដែលបណ្ដាលមកពីជំងឺទាក់ទងនឹងខួរក្បាលឬខួរឆ្អឹង (ករណីវិធីព្យាបាលដែលកំពុងទទួលមិនមានប្រសិទ្ធិភាពគ្រប់គ្រាន់តែប៉ុណ្ណោះ)។

ករណីថ្នាំលេប：

- មនុស្សពេញវ័យ：នៅលើកដំបូង លេប1ថ្ងៃ5～15mg បែងចែកជា1～3ដងក្នុង1ថ្ងៃ ក្រោយបរិភោគអាហារ។ បន្ទាប់ពីនោះ សង្កេតមើលរោគសញ្ញារបស់អ្នកជំងឺ ដោយអាចបង្កើនកម្រិតម្ដង5～10mg/ថ្ងៃ រៀងរាល់2～3ថ្ងៃ រហូតដល់កម្រិតប្រើប្រាស់ជាស្តង់ដារគឺ1ថ្ងៃ30mg បែងចែកជា1～3ដងក្នុង1ថ្ងៃ។

- កុមារ：នៅលើកដំបូង លេប1ថ្ងៃ5mg បែងចែកជា1～2ដងក្នុង1ថ្ងៃ ក្រោយបរិភោគអាហារ។ បន្ទាប់ពីនោះ សង្កេតមើលរោគសញ្ញារបស់អ្នកជំងឺ ដោយអាចបង្កើនកម្រិតម្ដង5mg/ថ្ងៃ រៀងរាល់2～3ថ្ងៃ រហូតដល់កម្រិតប្រើប្រាស់ជាស្តង់ដារគឺ៖

+ កុមារអាយុ4～6ឆ្នាំ：1ថ្ងៃ 5～15mg បែងចែកជា2～3ដងក្នុង1ថ្ងៃ ក្រោយបរិភោគអាហារ។

+ កុមារអាយុ7～11ឆ្នាំ：1ថ្ងៃ 5～20mg បែងចែកជា2～3ដងក្នុង1ថ្ងៃ ក្រោយបរិភោគអាហារ។

+ កុមារអាយុ12～15ឆ្នាំ：1ថ្ងៃ 5～25mg បែងចែកជា2～3ដងក្នុង1ថ្ងៃ ក្រោយបរិភោគអាហារ។

ករណីថ្នាំលេប：

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

ករណីថ្នាំចាក់បញ្ចូលតាមខួរឆ្អឹង：

・អ្នកដែលធ្លាប់កើតមានរោគប្រតិកម្មជាមួយនឹងសារធាតុនៅក្នុងឱសថនេះ។

・អ្នកដែលកើតមានជំងឺឆ្លងនៅមុនពេលបញ្ចូលឧបករណ៍Pump system។

ផលរំខានរួមមាន ងងុយគេង អស់កម្លាំង ចង់ក្អួត បាត់បង់ចំណង់អាហារ វិលមុខ ឈឺក្បាល ធ្ងន់ក្បាល ឡើងកន្ទួលក្រហម។ល។

ខាងក្រោមជាផលរំខានធ្ងន់ធ្ងរនៃឱសថនេះ ដូច្នេះ ប្រសិនបើមានអាការៈខាងក្រោម សូមរួសរាន់ទទួលការព្យាបាលពីវេជ្ជបណ្ឌិតជាបន្ទាន់។

- មើលឃើញរួបភាពឬស្ដាប់លឺសម្លេងដែលមិនមានពិត (អាការៈរវើរវាយដោយសារការញៀនឱសថ)

- ពិបាកផ្ដុំអារម្មណ៍គិត មិនស្គាល់ពេលវេលាឬទីកន្លែង (អាការៈវង្វេងវង្វាន់ដោយសារការញៀនឱសថ)

- ស្មារតីដឹងខ្លួនធ្លាក់ចុះ ពិបាកសម្រេចចិត្ត ពិបាកដកដង្ហើម (បាត់បង់ស្មារតី ប៉ះពាល់ប្រព័ន្ធដំណកដង្ហើម)។

ឱសថខាងក្រោម អាចប្រើរួមជាមួយនឹងឱសថនេះបាន ប៉ុន្តែត្រូវប្រុងប្រយ័ត្នចំពោះផលរំខានដែលអាចកើតមាន។

・ឱសថបញ្ចុះសម្ពាធឈាម - អាចធ្វើអោយកើតមានអាការៈសម្ពាធឈាមចុះទាបខ្លាំង។

・ឱសថទប់ស្កាត់សកម្មភាពប្រព័ន្ធសរសៃប្រសាទកណ្ដាល (ឱសថជំនួយការគេងលក់, ឱសថព្យាបាលអាការៈអារម្មណ៍មិនស្ងប់, ឱសថសណ្ដំ ជាដើម), គ្រឿងស្រវឹង - អាចធ្វើអោយសកម្មភាពនៃឱសថទាំងនេះកើនឡើង។

・ឱសថបំបាត់ការឈឺចាប់ប្រភេទអូភីអ័យ(Opioid analgesic) (ឱសថMorphine ជាដើម) - អាចធ្វើអោយកើតមានអាការៈសម្ពាធឈាមចុះទាបឬប៉ះពាល់ប្រព័ន្ធដំណកដង្ហើម។

・ស្ត្រីមានផ្ទៃពោះឬស្ត្រីដែលអាចនឹងកំពុងមានផ្ទៃពោះ គួរប្រើឱសថនេះក្នុងករណីចាំបាច់តែប៉ុណ្ណោះ។

・ស្ត្រីបំបៅដោះកូន មិនគួរប្រើប្រាស់ឱសថនេះទេ ព្រោះសារធាតុឱសថអាចជ្រៀតចូលក្នុងទឹកដោះម្តាយ។ ប្រសិនបើចាំបាច់ត្រូវប្រើឱសថនេះ ស្ត្រីគួរផ្អាកការបំបៅបណ្តោះអាសន្នក្នុងអំឡុងពេលប្រើប្រាស់ឱសថនេះ។

ករណីថ្នាំលេប：

・នៅក្នុងអំឡុងពេលប្រើប្រាស់ឱសថនេះ អាចធ្វើអោយកើតមានអាការៈដូចជា ងងុយគេង ជាដើម ដូច្នេះ គួរចៀសវាងការបើកបររថយន្តឬបញ្ជាម៉ាស៊ីនដែលមានគ្រោះថ្នាក់។

・គ្រឿងស្រវឹងអាចធ្វើអោយកើតមានអាការៈងងុយគេងខ្លាំង ដូច្នេះ គួរចៀសវាងការពិសាគ្រឿងស្រវឹងនៅក្នុងអំឡុងពេលប្រើប្រាស់ឱសថនេះ។

ករណីថ្នាំចាក់បញ្ចូលតាមខួរឆ្អឹង：

・ការចាក់បញ្ចូលឱសថនេះត្រូវការឧបករណ៍Pump system ដូច្នេះ ត្រូវស្វែងយល់អំពីដំណើរការនៃឧបករណ៍នេះអោយបានច្បាស់លាស់។

・នៅពេលបញ្ឈប់ការប្រើប្រាស់ឱសថនេះ បន្ទាប់ពីប្រើអស់រយៈពេលយូរមក អាចធ្វើអោយកើតមានអាការៈញៀននឹងឱសថនេះ ដូចជា ក្ដៅខ្លួនខ្លាំង ស្មារតីប្រែប្រួល កន្ត្រាក់សាច់ដុំខ្លាំង ជាដើម ឬអាចមានគ្រោះថ្នាក់ដល់ជីវិត ដូច្នេះ ត្រូវប្រុងប្រយ័ត្នជាពិសេសនៅពេលត្រូវបញ្ឈប់ការប្រើប្រាស់ឱសថនេះ។

ឱសថនេះមានសកម្មភាពទៅលើស៊ីណាប់(Synapse)នៃសរសៃប្រសាទខួរឆ្អឹង ព្រមទាំងកាត់បន្ថយសកម្មភាពនៃណឺរ៉ូនចលនាγ (Motor neurons) ដើម្បីបន្ធូរអាការៈកន្ត្រាក់ រឹង ឬស្ពឹកនៃសាច់ដុំ។